Dagleg leiar for frivilligsentral

Om stillinga

Aurland kommune etablerer Aurland frivilligsentral; ein møteplass og ressurs for frivillig aktivitet i lokalsamfunnet. Sentralen skal styrkje frivilligheit, fellesskap og inkludering i kommunen, og vere ein støtte for lag, foreiningar og einskildpersonar som vil bidra.

Vi søkjer etter dagleg leiar i 100 % fast stilling. 

Du får ansvaret for å leie oppbygginga av frivilligsentralen frå start og utvikle gode rutinar for drift og samspel med frivillige og kommunale tenester. Stillinga krev evne til å arbeide sjølvstendig og målretta, med blikk for både innovasjon og kvalitet i gjennomføringa. Vi ser etter ein tydeleg, løysingsorientert person som trivst med å få ting til å skje. 
Som leiar må du òg delta aktivt i det praktiske arbeidet, og stillinga er ikkje avgrensa til administrative oppgåver.

Stillinga er i første omgang lagt til Aurland kommune, avdeling forvaltning. I etableringsfasen har kommunen ansvar for oppstart, drift, oppfølging av frivilligsentralen og rekruttering av frivillige. Den som blir tilsett vil ha eit særleg ansvar for å greie ut og føreslå ei hensiktsmessig organisering og vidare driftsform for frivilligsentralen. Det skal til dømes etablerast eit styre for frivilligsentralen.
Kommunen vil leggje til rette for ei berekraftig drift av frivilligsentralen, i tråd med gjeldande lovverk og lokale behov.

Ved forvaltning er det 8 tilsette innan fagområda plan, byggesak, oppmåling, klima/miljø, næring, og kultur. Avdelinga forvaltning er ein av to avdelingar i kommunalområdet samfunnsutvikling. Vi held til på rådhuset på Aurlandsvangen. Lokaliseringa til frivilligsentralen er ikkje avgjort enno.

Arbeids- og ansvarsområde

• bygge opp og vidareutvikle Aurland frivilligsentral i tråd med frivilligsentral.no
• vere ein samarbeidspart for frivillige, lag, foreiningar og næringsliv 
• initiere og koordinere frivillige aktivitetar og prosjekt
• bidra til rekruttering og oppfølging av frivillige
• samarbeide med kommunale avdelingar 
• ansvar for dagleg drift, økonomioppfølging, rapportering og informasjon, og elles krava i Forskrift om tilskudd til frivilligsentraler - Lovdata samt andre relevante lovkrav
• utarbeide system for framtidig drift og berekraftig økonomi
• leiarrolla omfattar både administrative oppgåver og aktiv deltaking i det daglege, praktiske arbeidet.

Vi tilbyr 

• ei spanande og meiningsfull rolle der du får vere med og forme ein ny møteplass for frivilligheit i Aurland
• varierte arbeidsoppgåver med høve til å påverke tilbodet
• eit spennande, lærerikt og inkluderande arbeidsmiljø
• løn etter avtale – leiar i HTA kap. 4  
• gratis inngang til trimrommet og bassenget i Aurlandshallen (mellombels velferdstiltak)

Sjå gjerne informasjonsbrosjyre om kommunen vår her.

Video: https://www.youtube.com/watch?v=aFXLAnqaUbI

Kvalifikasjonar

• personlege eigenskapar er ein viktig del av kvalifikasjonsvurderinga for denne stillinga
• relevant utdanning, til dømes innan samfunnsfag, kultur, helse, økonomi, sosialt arbeid, leiing eller liknande
• erfaring frå frivillig arbeid, prosjektleiing eller organisasjonsutvikling
• gode samarbeidsevner og evne til å skape engasjement og nettverk
• kjennskap til lokalt organisasjonsliv og offentleg forvaltning er ein fordel

Personlege eigenskapar

Vi ynskjer at du har desse personlege eigenskapane:  

• er initiativrik, sjølvstendig og løysingsorientert
• trivst med å jobbe med menneske i ulike livssituasjonar
• er tydeleg og samarbeidsorientert
• og evne til å motivere og engasjere 
• likar utviklingsarbeid og er innovativ
  
   Våre verdiar er:  L-Æ-R, som står for Likeverd, Ærlegdom og Respekt.  

Løns- og tilsetjingsvilkår

Tilsetting, løn og arbeidsvilkår er i samsvar med gjeldande lover, reglement og tariffavtale.

Du må pårekne noko kvelds- og helgearbeid.

Krav til språk

Du må kommunisere godt på norsk, både munnleg og skriftleg. Aurland kommune nyttar nynorsk som målform.

Generell informasjon 

Aurland kommune praktiserer meiroffentlegheit og kunngjer forenkla søkarlister til ledige stillingar. Søkarar, som har oppmoda om at namnet blir unnateke søkarlista, må krysse av for dette og grunngje valet i søknadsteksten. Vi tek kontakt med søkarar som har bedt om dette, dersom vi meinar at grunngjevinga ikkje er tilstrekkeleg. 

Mangfald kan gje oss eit breiare perspektiv. Medarbeidarar med ulik livserfaring og fagkombinasjonar kan gjere oss i stand til å finne gode løysingar i kommunen vår. Vi oppfordrar derfor alle til å søke jobb utan omsyn til alder, kjønn, funksjonsevne eller etnisk bakgrunn. Du er også velkomen til å søke sjølv om du ikkje kan syne til ei samanhengende yrkeskarriere. 

Vi ynskjer deg velkomen som arbeidssøkar i Aurland kommune.

NB! Vi overfører nytilsette direkte til lønsystemet vårt, det er difor veldig viktig at du skriv namnet ditt slik det er registrert i folkeregisteret når du søker stilling, samt at du skriv med stor forbokstav.