Vil du bli ein del av Sivilforsvarets kompetansesenter ?

Direktoratet for samfunnssikkerhet og beredskap

2850 Lena, 3115 Tønsberg

Om jobben

Stillingstittel: Seniorrådgivar
Type ansettelse: Fast, heltid 100%
Arbeidstid: Dagtid, ukedager
Antall stillinger: 2

Søk på jobben

Søk senest fredag 8. mai

Har du lyst til å bidra til at Sivilforsvarets kompetansesenter tek vare på den nasjonale rolla i forvaltinga av tenestepliktige?

Vi søkjer to erfarne seniorrådgjevarar som ønskjer å spele ei sentral rolle i utvikling, kvalitetssikring og sakshandsaming i Sivilforsvarets viktige samfunnsoppdrag. Vi skal utvide teamet vårt og søkjer deg som er jurist eller har særleg interesse for juridiske område. Dette er ei spennande moglegheit for deg som ønskjer å jobbe systematisk og nøyaktig, samstundes som du ser moglegheiter for utvikling og forbetring.

Du skal:

utvikle nye styrande dokument, retningslinjer og rutinar for forvaltinga av tenesteplikt i Sivilforsvaret
vidareutvikle eksisterande dokument, retningslinjer og rutinar
utføre løpande juridiske vurderingar og/eller utgreiingsoppgåver innan eininga sine ansvarsområde
bidra med kvalitetssikring av tenestepliktforvaltninga
sakshandsaming innafor forvalting av tenesteplikt
rettleie i tolking og praktisering av regelverket til Direktoratet for samfunnssikkerheit og beredskap (DSB)

Kvalifikasjonskrav:

Du må ha:

relevant utdanning på masternivå (til dømes innan rettsvitskap, samfunnstryggleik eller offentleg forvalting). Relevant bachelorgrad kombinert med relevant erfaring kan kompensere for kravet om mastergrad. Utdanning frå utlandet må vere godkjend av Direktoratet for høgare utdanning og kompetanse
svært god skriftleg og munnleg framstillingsevne på norsk
erfaring frå offentleg forvalting, gjerne med innsikt i regelverk og sakshandsaming
god digital kompetanse (særleg innan bruk av Microsoft Office 365)
følgjande personlege eigenskapar:
- strukturert og nøyaktig – du evnar å halde oversikt over mange parallelle prosessar og har ein systematisk arbeidsmåte
- sjølvstendig samstundes som du har gode samarbeidsevner
- analytisk – du set deg raskt inn i nye problemstillingar
- utviklingsorientert – du tek aktivt eigarskap til oppgåvene i teamet og er nytenkjande og tilpassingsdyktig, og du likar å jobbe med varierte arbeidsoppgåver

Vi ønskjer at du har erfaring med:

utgreiingsarbeid
å leie prosessar
sakshandsaming
tolking og praktisering av regelverk

Vilkår
Fast stilling som seniorrådgjevar/ juridisk seniorrådgjevar (kode 1364) med årsløn frå kr 750 000 til 850 000.

TryggleiksklareringDen som får tilbod om stillinga, må vere klarert til nivå HEMMELEG før tiltreding.

Om Sivilforsvaret, einingaog stillingane
Sivilforsvaret er ein uniformert etat underlagt Direktoratet for samfunnstryggleik og beredskap (DSB), leia av Sjef Sivilforsvaret. I fredstid består Sivilforsvaret av 8000 tenestepliktige mannskap fordelt på 20 distrikt, kvart leia av ein distriktssjef. Det sentrale nivået er organisert gjennom Sivilforsvarsavdelinga, som består av to seksjonar og eit økonomi- og styringssekretariat leia av assisterande sjef Sivilforsvaret. Sivilforsvaret har som hovudoppdrag å verne befolkninga i krise og krig. I fredstid skal Sivilforsvaret bidra til god beredskap i heile landet og vere ein forsterkingsressurs for naudetatar og andre myndigheiter. Sivilforsvaret har lokale, regionale og nasjonale innsatsstyrkar med tenestepliktige mannskap og befal. Totalt er det om lag 230 tilsette i Sivilforsvaret. Den viktigaste ressursen er dei tenestepliktige som blir kalla ut til innsats i ulike oppdrag over heile landet. Sivilforsvaret bidreg også internasjonalt.

Sivilforsvarets kompetansesenter (SFK) har 50 tilsette fordelte på tre einingar. Senteret utdannar årleg rundt 1 200 kursdeltakarar, og har overnattingskapasitet til 170. Kursa har ei varigheit frå éi til tre veker.

Eining for kompetanse og tenestepliktsforvalting (KTF) har for tida 21 tilsette. Eininga har det faglege ansvaret for kompetanse og tenestepliktsforvalting på sentralt nivå i Sivilforsvaret.

Desse to stillingane er plasserte i team for tenestepliktsforvalting. Stillingane skal saman med resten av teamet utvikle styrande dokument, retningslinjer og rutinar for korleis Sivilforsvaret skal forvalte dei tenestepliktige. Vidare skal teamet gi råd og rettleiing til sivilforsvarsdistrikta i tolking av DSB sitt regelverk. Team for tenestepliktsforvalting behandlar òg saker innan personalforvalting, til dømes overtredingsgebyr, meldingar til politiet, vandelskontroll, klagesaker og søknader om fritak.

Eininga representerer dei tenestepliktige sitt første møte med Sivilforsvaret, og det blir stilt store krav til at haldningar og verdiar er i samsvar med verdikontrakten til DSB: Tillitsskapande – kompetent – lagspelar.
Det må reknast med noko reiseverksemd i samband med kurs-, rekrutterings- og øvingsaktivitet i sivilforsvarsdistrikta. Sivilforsvaret er ein uniformert etat.

Eininga har tilsette både på Starum og i Tønsberg, og du kan sjølv velje om du vil ha arbeidsstad anten på Starum eller i Tønsberg.

Om DSB
Direktoratet for samfunnstryggleik og beredskap (DSB) skal ha oversikt over risiko og sårbarheit i samfunnet. Vi er pådrivar i arbeidet med å førebyggje ulukker og kriser, og bidreg til effektiv ulukkes- og krisehandtering. Hovudkontoret ligg i Tønsberg, og vi har einingar over heile landet. Til saman er vi ca. 800 tilsette. DSB er underlagt Justis- og beredskapsdepartementet.

Om å jobbe i DSB
Risiko og sårbarheit i samfunnet er i stadig endring. Difor er DSB ein organisasjon i kontinuerleg utvikling. Vi treng medarbeidarar som er tillitskapande, kompetente og gode lagspelarar, og som aktivt bidreg til fornying og forbetring. Som tilsett i DSB er du med på å løyse eit viktig samfunnsoppdrag, saman med dyktige og dedikerte kollegaer. Vi ønskjer oss auka mangfald i organisasjonen, og håpar derfor at også kvalifiserte personar med innvandrarbakgrunn, hol i CV-en eller nedsett funksjonsevne vil søkje hos oss. DSB er ein stabil arbeidsgjevar med gode velferdsordningar. For å arbeida i DSB må du vera tryggleiksmessig skikka og medverke til ein god kultur for tryggleik. Les meir om tryggleik i DSB på www.dsb.no/sikkerhet-i-dsb

Hos oss får du

medlemskap i Statens pensjonskasse (SPK). Som medlem får du verdifulle fordelar gjennom særs gode pensjons-, forsikrings- og boliglånordningar. Les meir om medlemsfordelane på www.spk.no/Medlemskap-i-SPK/
fleksibel arbeidstid
bedriftshelseteneste
høve til å trene i arbeidstida
tilrettelagt for mobilt kontor når det er føremålstenleg

I Arbeidsgivarportalen kan du lese meir om goda ved å jobbe i staten: https://arbeidsgiver.dfo.no/lonn-goder-og-reise

Offentleg søkjarliste
Det vil bli utarbeidd offentleg søkjarliste ved søknadsfristens utløp, jf. Offentleglova §25. Du har høve til å be om unntak frå offentleg innsyn. Dersom du ikkje får innvilga dette, vil du bli varsla om det før søkjarlistene blir utarbeidde. Sjølv om du har fått innvilga unntak frå offentlegheit, vil du framkomme på ei utvida søkjarliste. Denne er berre tilgjengeleg på førespurnad frå andre søkjarar til stillinga.

Praktisk informasjon om søknadsprosessen
Det er viktig at du registrerer all relevant utdanning og erfaring i profilen du lagar i rekrutteringssystemet. Dette sikrar at vi har opplysningane vi treng. I tillegg er det naudsynt at du lastar opp både søknadsbrevet og CV-en som vedlegg i PDF-format. For alle stillingar som ikkje krev tryggleiksklarering, vil DSB gjennomføre bakgrunnssjekk. Interne søkjarar må sende inn søknaden i DFØ HR. Les meir om rekrutteringsprosessen i DSB på www.dsb.no/rekrutteringsprosessen

Ikkje nøl med å ta kontakt dersom du har spørsmål! Kontaktperson er

Marina Englund Skuggedal, enhetsleder:
E-post: marina.skuggedal@dsb.no
Telefon: 61 14 10 29

Du finn meir informasjon om å jobbe i DSB og oversikt over ledige stillinger på www.dsb.no/jobb.

Velkomen som søkjar hos oss!