Fagkontakt førebyggjande/politikontakt

Om stillinga

Førebygging er politiet sin hovudstrategi og ligg til grunn for all oppgåveløysing. Vi har no ledig ei spennande stilling der du får kombinere rolla som fagkontakt førebygging og som politikontakt på Søre Sunnmøre!

Her søkjer vi deg som er samfunnsorientert og har lyst til å bidra i vidareutviklinga av det førebyggjande arbeidet i Møre og Romsdal politidistrikt, og då i regionen Søre Sunnmøre (omfatter kommunane Hareid, Herøy, Sande, Ulstein, Vanylven, Volda og Ørsta). I tillegg vil 50 % av stillinga innebere å ha funksjon som politikontakt for kommunane Volda og Ørsta. 

Om rolla som fagkontakt førebygging:

Som førebyggjande fagkontakt vil du vere regionen Søre Sunnmøre sin fagperson innan det kriminalitetsførebyggjande arbeidet, og må samhandle godt med andre førebyggjande avdelingar i politidistriktet. Du vil jobbe tett med dei operative førebyggjarane, andre politikontakter, etterforskarar, patruljemannskap og forvaltningsseksjonen gjennom planlegging og fordeling av oppgåver innan det førebyggjande fagfeltet.

Om rolla som politikontakt:

Som politikontakt vil du vere synleg pådrivar og eit viktig bindeledd mellom politiet og ulike samfunnsaktørar i kommunane Volda og Ørsta, som til dømes offentlege etatar og næringsliv. Formålet med samhandlinga er å førebyggje kriminalitet, skape tryggleik og byggje tillit mellom innbyggjarar og politi. 

Samla sett vil du i denne stillinga som fagansvarleg førebyggjande og politikontakt vere ein viktig bidragsytar til kunnskapsdeling, kompetanseutvikling og til tiltak som vil styrke politiet sitt nærver i lokalsamfunnet. Om du synest dette høyrest kjekt ut så vil vi gjerne høyre frå deg!

Dette ser vi etter hos ein ny medarbeidar

Vi ser etter motiverte personar som er interesserte i å møte utfordringar knytt til kriminalitetsnedkjemping og trygge nærmiljø. Vi stiller høge krav til fagleg kompetanse, motivasjon, arbeidsmoral og etisk integritet.

Vi er på jobb for eit trygt Noreg. Som ein del av politiet sitt viktige samfunnsoppdrag, skal vi førebyggje og nedkjempe kriminalitet, skape tryggleik og vareta rettstryggleiken. Vi trur at mangfald bidrar til betre oppgåveløysing, og søkjer derfor medarbeidarar med ulik bakgrunn, erfaring, perspektiv og kompetanse. Dersom du har behov for tilrettelegging i rekrutteringsprosessen eller arbeidskvardagen, vil vi gjere vårt beste for å gi deg det du treng.

Arbeidsoppgåver

Førebyggjande fagkontakt

• på vegne av politistasjonssjef(ane) i vaktregionen drifte det kunnskapsbaserte førebyggjande politiarbeidet, og gjennom samhandling med øvrige tilsette og avdelingar sørgje for at førebyggjande tiltak vert prioritert, vedteke og utført til rett tid
• gjennom foredrag, møter og i media gi råd om bruk av førebyggjande metoder og tiltak ovanfor eksterne aktørar 
• bidra til kompetanseutvikling på tenesteeininga(ne) innanfor kunnskapsbasert og etterretningsstyrt førebyggjande arbeid, under dette støtte og rettleiing
• sørgje for god notoritet på det førebyggjande arbeidet, under dette bidra til rapportering i PSV

Politikontakt

• vere kontaktpunkt for Volda og Ørsta kommunar innanfor deira ansvarsområde, samt overfor samarbeidsaktørar i det offentlege, kommune, næringsliv og innbyggjarane elles
• vere oppdatert om trendar i kriminaliteten og ha god lokalkunnskap
• sørgje for kunnskapsdeling og erfaringsutveksling internt i politiet, og mellom politiet og samarbeidsaktørar i kommune, næringsliv og interesseorganisasjonar
• følgje opp personar i faresona, til dømes gjennomføring av bekymringssamtalar, rusoppfølging, alternative straffereaksjonar eller andre kriminalitetsførebyggjande metodar og tiltak 
• bistå politistasjonssjef i planlegging og gjennomføring av møter i politiråd og andre møtearenaer mellom kommune/politi, samt utarbeide høyringssvar til kommunale planprosessar 
• noko turnusteneste i kvardag og helg må påreknast (dag- eller kveldsvakt)
• andre oppgåver må påreknast

Kvalifikasjonar

Nødvendig:

• fullført og bestått politi(høg)skule
• brei politifagleg kompetanse og relevant erfaring frå ulike fagområde i politiet
• godkjent som AOP eller moglegheit til å bli det
• god kunnskap om etterretnings- og tiltaksprosessen i politiet
• politiattest (uttømmande og utvida) må innhentast ved eventuell tilsetting, jamfør politiloven § 18 og politiregisterloven § 41. Ved søknad på stillinga må du pårekne at det blir henta inn opplysningar frå enkelte av politiet sine register til bruk i vandels- og skikkaheitsvurderinga

Ønskjeleg: 

• erfaring/vidareutdanning innan kriminalitetsførebygging 
• erfaring med tverretatleg samarbeid
• moglegheit til å bli IP4-godkjent 
• god kunnskap om kunnskapsbasert og kriminalitetsførebyggjande arbeid og metodikkar
• gode ferdigheiter i bruk av relevante datasystem i politiet

Personlege eigenskapar

• gode relasjonelle ferdigheiter
• tillitsskapande kommunikasjon og atferd, medrekna god skriftleg og munnleg formuleringsevne
• gode samarbeidsevner internt og tverretatleg
• strukturert og ha god notoritet
• resultatorientert med evne til å sjå løysingar for god gjennomføringsevne

Som medarbeidar i politiet har du høg etisk medvit, du blir kjenneteikna av å vere modig og heilskapsorientert, du viser respekt og er tett på. Du kan lese meir om dei etiske retningslinjene våre og medarbeidarplattformen her.

Dette kan vi tilby om du vel oss

• ein utfordrande og givande stilling for deg som vil vere med på å forme politiet i framtida
• fast stilling som politiførstebetjent (SKO 0285) med brutto årslønn frå kr. 610 000 til kr. 730 000, eventuelt som politioverbetjent (SKO 0287) brutto årslønn frå kr. 660 000 - kr. 730 000). For særleg kvalifiserte kandidatar kan ein vurdere noko høgare lønn. 
• ved endring av tjenesteområde vert det gitt lønnsplassering etter gjeldande lønnsnivå for området
• godtgjersle etter gjeldande ATB på for tida kr. 44 708, og tillegg for eventuell turnusteneste
• du vil bli medlem i Statens pensjonskasse som gir deg mange gode i tillegg til livsvarig alderspensjon. Les meir om tilsettingsgoda dine på www.spk.no 
• mogelegheit for trening i arbeidstida
• Møre og Romsdal politidistrikt er ei IA-bedrift og er knytt til bedriftshelseteneste

Tilsetting skjer på vilkår fastsett i statsansatteloven og personalreglementet for politiet, derunder at prøvetida er seks månadar.

Mangfald i politiet

Dersom du har funksjonsnedsetting, innvandrarbakgrunn eller hol i CV-en, er det høve til å krysse av for dette i søknaden. Er du kvalifisert for stillinga, vil du bli vurdert for positiv særbehandling. Det inneber at minst éin søkjar frå kvar av desse gruppene blir innkalla til intervju.

Les meir om positiv særbehandling når ein søkjer jobb i staten her. 

Opplysningane du gir, blir brukt til å utarbeide anonymisert statistikk som alle statlege verksemder rapporterer i sine årsrapportar.

Video: https://www.youtube.com/watch?v=uUTjHmSB_Wc

Slik søkjer du

Du søkjer ved å fylle ut CV i Jobbnorge sitt CV-skjema og skrive eit kort søknadsbrev. I tillegg må du leggje ved relevante vitnemål og attestar. Relevante kandidatar vil bli kalla inn til intervju.

Opplysningar om deg kan bli offentleggjorde sjølv om du har bede om ikkje å bli ført opp på søkjarlista. Dersom oppmodinga ikkje blir teken til følgje, vil du bli varsla om dette.