Tenesteleiar for Tildelingskontoret

Vil du leie eit kontor som faktisk påverkar kvardagen til innbyggjarane i Sogndal kommune?  

Ynskjer du ei leiarrolle der du får breidde, ansvar og reell påverknad?  

No kan du få ein av dei sjeldne jobbane der du jobbar tett på både fag, folk og system, og er med og formar korleis kommunen løyser eit av dei viktigaste samfunnsoppdraga me har. 

Me har ledig eit årsvikariat som leiar for tildelingskontoret der du får arbeide frå eit overordna og heilskapleg perspektiv. Du får innsikt i helse- og omsorgstenestene våre, og kan sjå samanhengar på tvers av sektorar. Dette gir deg eit godt utgangspunkt for å vere med og drive endrings- og utviklingsarbeid i kommunen. 

Dette er ei rolle der du ikkje berre forvaltar regelverk, men også er med og påverkar retning, prioriteringar og løysingar til beste for innbyggjarane våre. 

Kva går rolla ut på? 

Som leiar for tildelingskontoret har du ansvar for personal, fag og økonomi. Du leier dyktige medarbeidarar, samarbeider tett med tenestene og er ein viktig pådrivar for vidare utvikling av kommunen sine helse og omsorgstenester. 

Andre som har hatt denne rolla peikar på nettopp breidda i oppgåvene som det mest verdifulle. Me kan garantere at du lærer mykje både fagleg og personleg, og får ei rolle der stemma di veg tungt. 

Kven ser me etter? 

Me ser etter deg som likar å jobbe i spennet mellom fag, forvaltning og utvikling, og som evnar å sjå heilskap og samanhengar. 

For å trivast og lykkast i rolla trur me at du har: 

• Høgare relevant utdanning innan helse- og sosialfag eller juss 

• God forståing for helse- og omsorgstenestene og relevant lovverk 

• Erfaring med sakshandsaming 

• God skriftleg og munnleg framstillingsevne 

• Evne til å samarbeide godt, tenkje strategisk og sjå heilskap 

Det er ein fordel om du også har erfaring eller kompetanse innan endringsarbeid, prosjekt eller prosessleiing.  

Har du leiarerfaring eller leiarutdanning er det ynskeleg,  men me tenkjer at den “rette” personen kan utvikle seg til å bli leiar. 

Personlege eigenskapar vil bli tillagd stor vekt. Me ser etter ein leiar med engasjement, pågangsmot og ekte interesse for å skape gode løysingar i lag med andre. 

Kvifor bør du søkje denne jobben? 

Fordi du får: 

• Ei leiarrolle med stor påverknad 

• Ein kvardag med variasjon, ansvar og utvikling 

• Moglegheit til å vere med og forme framtidas kommune 

Kjenner du at dette treffer deg? Då håpar me du vil søkje.