Barnevernskonsulent

Vil du bidra til tryggleik, utvikling og støtte for barn og familiar som treng det?

Tysnes kommune har ledig vikariat i 100 % stilling som barnevernkonsulent, med oppstart snarast og varigheit til 31.05.2027. Me søker ein engasjert og fagleg trygg medarbeidar som kan bidra til å styrke fagmiljøet og sikre gode tenester for barn og familiar.

Barneverntenesta er organisert som ei eining under etat for oppvekst, med einingsleiar barnevern som næraste overordna. Tenesta har totalt 5 årsverk, fordelt på fire fagstillingar inkludert leiar, samt ei stilling som tiltaksarbeidar.

Kommunen er med i det barnevernfaglege samarbeidet «Små saman», med Samnanger, Austevoll og Ulvik. Dette samarbeidet legg til rette for kompetansedeling, fagleg støtte og erfaringsutveksling på tvers av kommunane, og styrker kvaliteten i det barnevernfaglege arbeidet.

Som barnevernkonsulent hos oss får du ein meiningsfull arbeidskvardag der du kan påverke utviklinga av tenesta og bidra til tryggleik og gode oppvekstvilkår i lokalsamfunnet.

Arbeidsoppgåver

• Sakshandsaming etter barnevernslova, inkludert oppfølging av barn, unge og deira familiar
• Barnevernfagleg kartlegging og utgreiing
• Delta i rettleiing, samt samarbeid både internt i tenesta og med eksterne samarbeidspartnarar
• Førebyggande arbeid med særleg vekt på tidleg innsats i kommunen
• Partsrepresentasjon i barneverns- og helsenemnda, samt andre rettsinstansar ved behov
• Bidra i tenesta sitt utviklingsarbeid for å skape ei open, tilgjengeleg og fagleg sterk barnevernteneste

Arbeid utover ordinær arbeidstid kan førekomme når behovet i tenesta tilseier det.

Kvalifikasjonar

Me ser etter deg som har: 

• relevant universitets- eller høgskuleutdanning på bachelor- eller masternivå, fortrinnsvis som barnevernspedagog eller sosionom
• erfaring frå barnevernsarbeid; særleg erfaring med sakshandsaming vil bli vektlagt
• god kjennskap til gjeldande lovverk og avtaleverk
• god skriftleg og munnleg framstillingsevne på norsk
• gode grunnleggande datakunnskapar
• førarkort klasse B

Ved ei eventuell tilsetjing må du legga fram: 

• politiattest jf. barnevernsloven § 12-11.
• eigenerklæringsskjema for MRSA og tuberkulose.

Personlege eigenskapar

Me ser etter seg som:

• er engasjert i barn og unge sine oppvekstvilkår
• er sjølvstendig og målretta
• har evne til å forstå og møte barn og unge i deira situasjon
• har gode kommunikasjons- og samarbeidsevner
• er fleksibel og løysingsorientert
• ser verdien av tverrfagleg samarbeid
• bidrar til eit positivt og utviklande arbeidsmiljø

Personlege eigenskapar blir tillagt stor vekt. 

Kvifor skal du jobba hos oss?

Me tilbyr:

• eit inkluderande arbeidsmiljø der me hjelper kvarandre, deler erfaringar og jobbar løysingsorientert.
• ein arbeidsdag som vekslar mellom planlagte oppgåver og handtering av løpande saker. 
• gode moglegheiter for utvikling og kompetanseheving.
• lønsplassering i samsvar med hovudtariffavtalen (kapittel 4 i det kommunale regulativet, ansiennitet 0–16 år), med årlege sentrale lønsjusteringar.
• fleksibel arbeidstidsordning.
• god pensjonsordning gjennom KLP, inkludert medlemskap ved tilsetjing og moglegheit for bustadlån med gunstige vilkår.

I Tysnes kan du få inntil kr 25 000 i årleg avskriving av studielånet ditt frå og med 2026. Som arbeidstakar og busett i ein distriktskommune kan du ha rett til å få sletta delar av studielånet gjennom Lånekassen si nye ordning for distriktskommunar.

Informasjon til søkar

Søkar har sjølv ansvar for å laste opp alle relevante vedlegg innan søknadsfristen. For at søknaden skal bli vurdert, må du legge ved dokumentasjon på utdanning og arbeidserfaring, som vitnemål og tenestebevis/arbeidsattestar. Dersom vitnemål, karakterutskrifter eller annan dokumentasjon ikkje er på eit skandinavisk språk eller engelsk, må du laste opp attesterte omsettingar. 

Ønske om unntak frå den offentlege søkarlista blir vurdert etter reglane i offentleglova. Søkarar som ber om slikt unntak, blir varsla dersom ønsket ikkje kan takast til følge. 

Tysnes kommune ønsker å spegle mangfaldet i befolkninga i rekrutteringa vår. Me oppmodar alle kvalifiserte kandidatar til å søke ledige stillingar uavhengig av kjønn, alder, funksjonsnedsetting eller fleirkulturell bakgrunn. Det same gjeld dersom ein har hatt eit lengre opphald frå arbeidslivet. Me ønsker å legge til rette for ei inkluderande rekruttering.