Ledig vikariat som fyrstekonsulent på politistasjonen i Sogndal

Om stillinga

I geografisk driftseining Sogn og Fjordane, tenesteeining Sogn, er det ledig vikariat som fyrstekonsulent med dagleg oppmøte ved Sogndal politistasjon.

Stillinga inngår i eit team som handterer publikumsekspedisjon og pass/id i Sogndal primært, og der nest Lærdal.

Vest politidistrikt er i kontinuerleg utvikling, og du må pårekna endring av arbeidsoppgåver. Det inneber også i større grad å skulle ta del i felles funksjonar for heile politidistriktet. I dag bidreg teamet i Sogn inn i heilskapen i Vest på fleire arbeidsfelt, bla. politiet sitt kontaktsenter 02800. Framover vil også den digitale utviklinga med forenkling og nye digitale verktøy påverka arbeidskvardagen vår.

Sogn politistasjonsdistrikt består av kommunane Aurland, Lærdal, Årdal, Sogndal, Luster og Vik. Me er inndelt i seksjon Indre Sogn (Aurland, Lærdal, Årdal), seksjon Sogndal (Sogndal, Luster), samt seksjon Vik. Hovudkontoret er i Sogndal.

I Sogn er me om lag 35 tilsette som er på jobb for å yta best mogeleg service for tett opp under 30000 innbyggjarar. Me ynskjer å vera i forkant av kriminaliteten, og samarbeider tett med kommune, frivillige organisasjonar og næringsliv. Me utsteder pass og id-kort til alle i Sogn, i tillegg til andre enkle forvaltningsgjeremål.

Me er på jobb for eit trygt Noreg. Som ein del av politiet sitt viktige samfunnsoppdrag, skal me førebyggja og nedkjempa kriminalitet, skapa tryggleik og vareta rettstryggleiken. Me trur at mangfald bidrar til betre oppgåveløysing, og søkjer difor medarbeidarar med ulik bakgrunn, erfaring, perspektiv og kompetanse. Dersom du har behov for tilrettelegging i rekrutteringsprosessen eller arbeidskvardagen, vil me gjere vårt beste for å gje deg det du treng.

Dette ser me etter hos ein ny medarbeidar

Arbeidsdagen vår er variert og hektisk, der det er behov for å snu seg rundt på kort varsel. Me ynskjer deg som er eit fleksibelt ja-menneske, som tek ansvar og jobbar godt åleine eller i lag med andre. Du er vårt andlet utover og møter menneske med smil, god service og respekt. Du bidreg til endring og utvikling, er positiv og nysgjerrig til nye arbeidsoppgåver. 

Høyres dette interessant ut? Då er det nettopp deg me treng på laget vårt i Sogn.

Arbeidsoppgåver

• Sakshandsaming pass og ID-kort
• ID-kontroll, person- og dokumentkontroll (GTK)
• Publikumsekspedering i skranke og på telefon
• Posthandtering fysisk og elektronisk
• Forkynningar i sivile- og strafferettslege saker
• Enkle forvaltningsoppgåver knytt til hittegods, våpenforvalting, køyresetlar, tapsmeldingar, osv.
• Merkantile oppgåver som enkel rekneskapsføring, arkiv, varebestillingar
• Signalering og andre støtteoppgåver til politi
• Ta del i andre naturlege arbeidsfelt for Vest politidistrikt alt etter behov, t.d. kontaktsenteret 02800
• Andre oppgåver pålagd av leiar

Kvalifikasjonar

Dette må du ha for å vera kvalifisert:

• 3 årig vidaregåande skule eller fagbrev innan fagfeltet
• God system- og IT-kompetanse
• God munnleg og skriftleg framføring på norsk og engelsk 
• Du må ha plettfri vandel og vera skikka for teneste i politiet. Politiattest (uttømmande og utvida) må hentast inn ved eventuell tilsetjing, jf. politiloven § 18 og politiregisterloven § 41. Ved å søkje på stilling i politiet samtykkjer ein til at det vil bli gjort ei skikkaheitsvurdering, herunder søk i registre, i forkant av eventuelt intervju.

Ynskjeleg med:

• Relevant utdanning på høgskule- eller universitetsnivå vil bli vektlagt
• Relevant arbeidserfaring vil bli vektlagt

Personlege eigenskapar

• Du tek ansvar, er fleksibel og løysingsorientert
• Du jobbar godt åleine, eller i lag med andre
• Du er nøyaktig og effektiv
• Du er serviceinnstilt og trivst i arbeid med menneske
• Du taklar høgt arbeidspress der det skjer mange ting på ein gong

Som medarbeidar i politiet har du høg etisk medvit, der du blir kjenneteikna av å vere modig og heilskapsorientert, du viser respekt og er tett på. Du kan lesa meir om dei etiske retningslinjena våre og medarbeidarplattforma her.

Dette kan me tilby om du vel oss

• Ein utfordrande og spennande arbeidsplass for deg som vil vera med på samfunnsoppdraget vårt
• Stillinga vert lønna som fystekonsulent (stillingskode 1408) med årslønn frå kr. 485.000,- .  Vidare lønnsutvikling vil skje i henhold til hovudtariffavtalane i staten
• Medlemskap i Statens pensjonskasse, med mellom anna gode pensjons- og forsikringsordningar. Les meir på www.spk.no 
• Gode arbeidsvilkår (fleksibel arbeidstid, trening i arbeidstida) 

Medarbeidarane i Sogn fortel om eit ope og inkluderande arbeidsmiljø med godt ytrings- og samarbeidsklima. Politistasjonane i Sogndal og Lærdal er nyoppussa og innbydande.

Slik søkjer du

Du søkjer ved å fylle ut CV i Jobbnorge sitt CV-skjema og skriva ein kort søknad. I tillegg må du leggja ved relevante vitnemål og attestar. Relevante søkjarar vil bli kalla inn til intervju.

Opplysningar om deg kan bli offentleggjorde sjølv om du har bede om ikkje å bli ført opp på søkjarlista. Dersom oppmodinga ikkje blir teken til følgje, vil du bli varsla om dette.

Mangfald i politiet

Dersom du har funksjonsnedsetting, innvandrarbakgrunn eller hol i CV-en, er det høve til å krysse av for dette i søknaden. Er du kvalifisert for stillinga, vil du bli vurdert for positiv særbehandling. Det inneber at minst éin søkjar frå kvar av desse gruppene blir innkalla til intervju.

Les meir om positiv særbehandling når ein søkjer jobb i staten her. 

Opplysningane du gjev, blir brukt til å utarbeida anonymisert statistikk som alle statlege verksemder rapporterar på i sine årsrapportar.

Video: https://www.youtube.com/watch?v=uUTjHmSB_Wc