Pedagogihkka bistevaš virgi - joatkkaoahput

Oanehaččat virggi birra

Sámi allaskuvlla Sámi oahpaheaddjeoahpuid goađis lea rabas 100 % bistevaš pedagogihkkavirgi. Virggehas galgá ovddidit joatkkaoahpuid oahpaheddjiide ja bargiide mánáidgárddis ja vuođđoskuvllas. Mii ohcat olbmo geas lea pedagogalaš gelbbolašvuohta ja
bargovásáhus oahpposurggiin. Virgái sáhttá virgáduvvot vuosttašamanueansan, vuosttašlektorin dahje allaskuvlalektorin gelbbolašvuođa mielde. Álgin sohppojuvvo. Virgi gullá Sámi oahpaheaddjeoahpuid goahtái, gos lea nana sámi pedagogihkka ja fágadidaktihka
fágabiras. Goađis lea sámegielat fágabiras ja sámegiella lea váldogiella oahpahusas, dutkamis ja gaskkusteamis.

Bargoviidodat virggis

Bargui gullá earret eará:
- Iešguđet oahpahan-, koordineren-, bagadallan- ja hálddašanbarggut joatkkaoahpuin, lassioahpuin, oahppoovttadagain ja prográmmaoahpuin.

- Ovdánahttit joatkkaoahpuid ja dárbbu mielde lasseoahpuid, oahppoovttadagaid ja oahppoprográmmaid.

- Áŋgiruššat ovdánahttit oahpaheaddjeoahpuid fágabirrasa, ovddidit kvalitehta oahpahusas, ja čađahit dutkan- ja ovdánahttinbargguid Sámi allaskuvlla strategiijaid
mielde.

- Doarjut kollegaid ja studeanttaid fágalaš ovdáneami ja ovddidit kollegiála oassálastinja ovttasbargovieruid sihke fágasurggiid ja instituhtaid siskkobealde ja rastá.

- Virggi sajádat organisašuvnnas ja bargoviidodat sáhttá rievdat organisašuvnna dárbbuid geažil.

Gelbbolašvuođagáibádusat

Virgái ohcat vuosttažettiin olbmo geas lea doavttergráda dahje vástideaddji gelbbolašvuohta pedagogihkas dahje oahppodiehtagis. Ohcciin geain lea okta dáin čuovvovaš oahpuin árvvoštallojuvvojit maid virgái:

• Master, váldofága dahje vástideaddji gelbbolašvuohta
pedagogihkas dahje oahppodiehtagis.
• Mastergráda dahje váldofága mas lea čiekŋudan bajásšaddandahje oahpposurggiin, omd. oahpaheaddjeoahpus (omd. VUOMA/SGLU1-7 ja VUOMA/SGLU5-10), profešuvdnadiehtagis, earenoamášpedagogihkas, lohkan- ja čállimis, fágadidaktihkas dahje sullasaš suorggis

Virgáibidjamis gáibiduvvo ahte bargi hálddaša davvisámegiela mii vástida unnimus B2- dási Eurohpá gielaid oktasaš rámmain (CEFR) ja dárogiela/ ruoŧagiela/ dánskkagiela B2-dásis. Bargi galgá hálddašit eŋgelasgiela internationála doaimmaid ja
gaskkusteami ektui.

Oahpahanfágalaš gelbbolašvuohta. Jus ohccis váilu oahpahanfágalaš gelbbolašvuohta, eaktuduvvo háhkat dán guovtti jagi sisa virgádeami rájis.

Geabbil ja buorit ovttasbargo- ja gulahallanattáldagat studeanttaiguin, kollegaiguin ja ovttasbargoguimmiiguin. Galgá struktuvrralaš ja systemáhtalaš lahkoneapmi bargui.
Áŋgiruššan ja mokta virgái. Mielalaččat duddjot buori bargobirrasa. Persovnnalaš heivvolašvuohta deattuhuvvo.

Ovdamunni jus virggehasas lea
- Bargohárjáneapmi vuođđoskuvllas dahje joatkkaoahpahusas.
- Bargohárjáneapmi allaskuvlla dahje universitehta dási oahpahusas.

Mii fállat

Mii fállát earet eará: 

• Virggi mas ovdánahttinvejolašvuođat, viiddis ja máŋggabealat fágabirrasis
• Máŋggabealat čálgofálaldagaid ja heivehahtti bargoáiggi
• Buori bargobirrasa gos alla gelbbolaš bargit iešguđetge fágasurggiin
• Ealli sámegielbirrasa guovddáš sámi guovllus 

Sámi allaskuvlla fágabargiid bargoresurssat juhkkojuvvojit oahpahandoaimmaid, dutkan- ja ovdánahttinbargguid ja hálddašanbargguid gaskka, ulbmilin joksat allaskuvlla fágalaš mihtuid ja alla fágalaš kvalitehta. 

Bálká

Virgi bálkáhuvvo Stáda bálkáregulatiivva mielde. Bálká mearriduvvo ohcci oahpu ja bargohárjáneami vuođul čuovvovaš virgekodaid mielde:
Vuosttašamanueansa - virgekoda 1011
Vuosttašlektor virgekoda 1198 
Allaskuvlalektor virgekoda 1008 

Formála lassigelbbolašvuohta sámegielas unnimustá 60 oahppočuoggá bachelordásis, addá 20 000,- lassibálkán vuođđobálkái vuosttašgeardde virgáibidjamis Sámi allaskuvllas.
Bálkkás gesso 2% geatnegahtton divat Stáda penšuvdnakássii.

Máŋggabealatvuohta ja searvadahttin

Sámi allaskuvla galgá nu bures go vejolaš speadjalastit álbmoga girjáivuođa ja mii ávžžuhit gelbbolaš kandidáhtaid ohcat virgái beroškeahttá sohkabealis, agis, doaibmannávccas dahje kultuvrralaš duogážis. Jus leat gelbbolaš ohccit geat leat doaimmashehttejuvvon, leat guhkit áiggi leamaš eret bargoeallimis, dahje geain lea sisafárrejeaddjiduogáš, de bovdet unnimusat ovtta ohcci guđege joavkkus jearahallamii.

Ávžžuhit ohccit merket bargoportálas jus lea doaimmashehttejupmi, guhkit áiggi jávkan bargoeallimis, dahje lea sisafárrejeaddjiduogáš.

Mearkumat bargoohcciportálas hábmejit vuođu anonymiserejuvvon statistihkkii maid buot stáhtalaš ásahusat raporterejit iežaset jahkeraporttain.

Sámi allaskuvllas lea šiehtadus Ovttastahtti bargoeallima birra, ja deattuha bargodili láhčimis juohke mielbargái.

Oppalaččat

Virgáibidjan dahkko lágaid, šiehtadusaid ja njuolggadusaid ektui mat gustojit bargiide Norgga stáhtas ja allaskuvlasektoris.

Virggehasa bargosadji lea Diehtosiiddas, muhto lea vejolaš ohcat ruovttokantuvrras beassat bargat.

Ohccit sáhttet gohččot bargojearahallamii ja doallat geahččalanlogaldallama.

Fárrendoarjja máksojuvvo stáhta njuolggadusaid mielde.

Finnmárkkus lea sierra ortnet geahpedit lohkanloana ja vearrogeahpádus.

Fuomášuhttit ahte dieđut ohcciid birra sáhttet almmuhuvvot vaikko ohcci ieš lea bivdán čihkkot ohcciidlisttus. Ohcci oažžu dieđu dan birra ovdagihtii.

Dievdoolbmot ávžžuhuvvojit ohccát virgái universitehta- ja allaskuvlalága (ual.) § 7-1 vuođul. Jus leat guokte dahje eambbo ohcci geain lea sullii ovttadássásaš gelbbolašvuohta, de vuoruhuvvo dievdoolmmoš ovddabeallai nissonolbmo, gč. ual. 7- 1 (2) gos boahtá ovdan ahte galgá deattuhit dásseárvvu virgáibidjamis.

Virggis lea 6 mánu geahččalanáigi.

Ohcan

Ohcan sáddejuvvo elektrovnnalaččat www.jobbnorge.no bokte, oktan daid dokumentašuvnnaguin:

• CV 
• Duođaštuvvon oahppo- ja bargoduođaštusat
• Ollislaš listu dieđalaš publikašuvnnain
• Relevánta publikašuvnnat
• Duođaštus oahpahanfágalaš/vuođđo pedagogalaš gelbbolašvuođas
• Eará relevántta duođaštusat, omd bargoduođaštusat jna.
• Bivdit du maiddái almmuhit guokte (2) referánssa

Jus lea váttisvuohta deavdit elektrovnnalaš CV:a, de sáhttá váldit oktavuođa Jobbnorge áššebálvalusain e-poasta: support@grade.no dahje riŋget telefovdnii: 75 54 22 20.

Oktavuođadieđut

Eanet dieđuid virggi birra oažžu goahtejođiheaddjis John-Marcus Kuhmunen, epoasta: johnmk@samas.no, tlf. 78 44 84 91.