Norges Skiforbund søkjer ny dagleg leiar for Sogn og Fjordane Skikrins

Sogn og Fjordane Skikrins er organisasjonsleddet mellom Norges Skiforbund og alle skiklubbane i Sogn og Fjordane. Krinsen har i dag 47 klubbar og om lag 3 400 medlemmar. Skikrinsen held til på Idrettens Hus i Førde.

Norges Skiforbund søkjer etter dagleg leiar til skikrinskontoret i Sogn og Fjordane i 100 % fast stilling.

Dagleg leiar har hovudansvar for utviklinga av skiidretten i krinsen, samt den daglege drifta av administrasjonen. Vi søkjer ein person med eit brennande engasjement for skisporten, og som har interesse for og erfaring innan generell idrettsadministrasjon og økonomi. Arbeidet ved skikrinskontoret skjer i tett samarbeid med frivillige både i skikrinsen og i skiklubbane.

Løpande oppgåver omfattar mellom anna:

• Administrasjon av skikrinskontoret

• Utviklingsarbeid i tråd med strategiplanen vedteken av krinsstyret

• Informasjonsarbeid via nettsider, sosiale medium og bruk av idretten sine IT-verktøy

• Idrettsregistrering og medlemstenester ovanfor skiklubbar, aktive medlemmar og andre skiinteresserte

• Marknads- og inntektsbringande arbeid, inkludert arbeid med offentlege støtteordningar

• Støtte til lag og team knytte til krinsen

• Sekretariatsfunksjon for skikrinsstyret, komitear og utval

• Terminlistearbeid i krinsen sine greiner, samt støtte til klubbane i deira administrative arbeid og anleggsutvikling/-rådgjeving

• Tilrettelegging av tiltak for å heve kompetansen på klubb- og krinsnivå (leiarar, trenarar, arrangørar og anleggseigarar)

• Personalansvar for krinsen sine trenarar og administrasjon

Stillinga inneber noko reiseverksemd innan skikrinsen, samt deltaking på møte og samlingar i regi av Norges Skiforbund. Det må reknast med deltaking på møte og arrangement, og stillinga krev fleksibilitet til å arbeide utanom ordinær arbeidstid, herunder kveld og helg.

Arbeidsstaden er i utgangspunktet Idrettens Hus i Førde, men det er moglegheit for dialog om alternative arbeidsstader.

Kven ser vi etter?
Vi søkjer ein kandidat med høgare utdanning innan administrasjon, idrettsleiing eller økonomi. Personleg eignaheit og kompetanse opparbeidd gjennom relevant erfaring frå idrettsarbeid vil bli vektlagt, og kan kompensere for manglande formell utdanning. Det er ein fordel med forståing for budsjett- og rekneskapsarbeid.

Vidare ser vi etter ein sjølvstendig, strukturert og initiativrik person som trivst med å leie utviklingsprosessar og samstundes har interesse for marknads- og inntektsbringande arbeid. Du har eit sterkt engasjement for skisporten og trivst med tett samarbeid med både tilsette og frivillige.

Kva kan vi tilby?

Ei spennande stilling i ein skikrins med brei aktivitet. Du blir ein del av eit administrativt fellesskap saman med krinstilsette og sentralt tilsette i Norges Skiforbund. I tillegg til eit godt arbeidsmiljø, der både tillitsvalde og tilsette har eit stort engasjement for skiidretten, kan vi tilby ein fleksibel arbeidskvardag der du i stor grad kan styre eigen tid og aktivitet. Vi har gode pensjons- og forsikringsordningar.

For nærare informasjon, eller ein uforpliktande samtale, ta kontakt med Daglig leiar Oppland Skikrets og personalleier krets, Ellie Lein på telefon 977 71 953.

Søknadsfrist: 01.februar 2026