Forskingsrådgjevar (vikariat) ved Det psykologiske fakultet

Kunnskap som formar samfunnet

UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.
 

Video: https://youtu.be/M5n6RnScNgA

Rådgjevar 

Ved Institutt for samfunnspsykologi (ISP) og Institutt for helse, miljø og likeverd (HEMIL), Det psykologiske fakultet, er det ledig ei to-årig vikarstilling som rådgjevar med oppstart snarast mogleg. Rådgjevaren vil bli tilsatt ved Institutt for samfunnspsykologi, men med fysisk arbeidsstad ved begge institutt.

50 % av stillinga er knytt til ERC Synergy Grant prosjektet “Evolution of Cognitive Tools for Quantification” (QUANTA) ved ISP og den andre 50 % av stillinga er knytt til det internasjonale forskingsnettverket «Health Behaviour in School-aged Children. A WHO Collaborative Cross-natioal survey» (HBSC) ved HEMIL. Stillinga vil ha det administrative ansvaret for å koordinere QUANTA-prosjektet ved UiB og inn mot dei internasjonale samarbeidspartane, og tilsvarande for HBSC internt på UiB og inn mot dei 50 partnarane i nettverket. Stillinga vil også jobbe tett opp mot fagområder på fakultetet og UiB sentralt innan forsking, økonomi og HR.

Forskingsrådgjevaren vil jobbe tett med dei to institutta sin administrasjon. Meir informasjon om forskingsprosjekta: https://quanta-synergy.org/  og www.hbsc.org

Arbeidsoppgåver:

• Koordinere ISP sitt ERC Synergi Grant QUANTA og støtte Principal Investigator (PI) i alle deler av koordineringa av prosjektet
• Ha kontakt med finansiør for ERC Synergi Grant QUANTA og administrativt følge opp internasjonale partnarar i prosjekta.
• Koordinere HEMIL sitt HBSC-nettverk og støtte internasjonal koordinator i alle deler av koordineringa av nettverket og samarbeidet med Verdens Helseorganisasjon (WHO)
• Ha ansvar for intern- og eksternkommunikasjon, inkludert nettsider og sosiale media, samt informasjonsinnhenting knytt til ERC-prosjektet og HBSC-nettverket
• Følge opp aktivitetane i ERC-prosjektet og HBSC-nettverket, og særleg sjå til at leveransar går som dei skal og at milælar følgjer tidsplan.
• Organisere og koordinere økonomirapportar i samarbeid med prosjektøkonom og faglege rapportar saman med prosjektleiar.
• Organisere og koordinere rekrutteringsprosessar i prosjekta
• Organisere prosjektmøter og samlingar for ERC-prosjektet og HBSC-nettverket

Andre arbeidsoppgåver knytt til prosjekta kan kome i tillegg. Reiser i samband med møte og seminar må påreknast som ein del av stillinga.

Kvalifikasjonar og eigenskapar:

Vi søker ein rådgjevar som:

• har høgre utdanning på mastergradsnivå, eventuelt med særleg erfaring og kompetanse tilpassa dei oppgåvene stillinga skal dekkje.
• har god kjennskap til universitetssystemet, forskingsfinansiering og relevante eksterne samarbeidspartnarar.
• har evne til å motivere og fremje samarbeid mellom forskarar på tvers av fagmiljø.
• har gode kommunikasjons- og samarbeidsevner, fleksibilitet og serviceinnstilling.
• har evne og vilje til raskt å setja seg inn i nye saksfelt, vere kvalitetsbevisst, kunne arbeide strategisk, effektivt og strukturert og målretta innan fristar og ta initiativ som svarar på dei behova som dukkar opp.
• kunne arbeide både sjølvstendig og i team.
• har god skriftleg og munnleg framstillingsevne, både i norsk og engelsk.

Det er ein fordel om du har:

• erfaring frå sakshandsaming innan offentleg forvalting, utgreiingsoppgåver og kjennskap til fagmiljø ved fakultetet.
• erfaring med koordinering av større forskingsprosjekt.
• erfaring med økonomioppfølging. 

Personlege eigenskapar som er naudsynte for stillinga vil bli vektlagt.

Vi kan tilby:

• Spennande og utviklande arbeidsoppgåver i sterke forskings- og administrative miljø
• Stilling som rådgjevar (kode 1434), med ei brutto årslønn på kr 614 900 - 670 000 i det statlege lønsregulativet. For særleg kvalifiserte søkjarar kan det verte aktuelt å vurdere høgare løn.
• Medlemsskap i Statens pensjonskasse
• Gode velferdsordningar

Generell informasjon:

Utfyllande opplysningar om stillinga kan ein få ved å vende seg til: 

• QUANTA: administrasjonssjef  Ida Samuelsen, tlf: 55 58 68 21, ida.samuelsen@uib.no; Prosjektleiar Andrea Bender, andrea.bender@uib.no, Institutt for samfunnspsykologi 
• HBSC: administrasjonssjef Maria Luttges Mathieu, tlf: 55 58 32 57, maria.luttges@uib.no; Prosjektleiar Oddrun Samdal, oddrun.samdal@uib.no, Institutt for helse, miljø og likeverd (HEMIL). 

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Vi oppmodar menn om å søkje. Dersom fleire søkjarar har tilnærma like kvalifikasjonar, gjeld reglane for moderat kjønnskvotering.  

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.Nærare om tilsettingsprosessen her.