Avdelingsingeniør

Medisinsk teknisk avdeling (MTA) har ledig stilling som avdelingsingeniør ved seksjon for analyse og diagnostikk.

MTA forvaltar medisinsk teknologi og informatikk i Helse Bergen. Vi tek også del i forsking, utvikling og innovasjon og har ansvar for utstyr til heimebehandling av pasientar. Arbeidsoppgåvene spenner over eit stort spekter som for eksempel å delta i anskaffingar og installasjon, planlegge og utføre service og oppdateringar, utarbeide rutinar og dokumentasjon og konfigurere medisinsk utstyr og IKT-systemløysingar. Avdelinga legg stor vekt på kompetansebygging med kursing både internt og eksternt. Hovudfokuset for avdelinga sine om lag 90 tilsette er at meir enn 50000 utstyrseiningar og tilhøyrande IKT-systemløysingar skal kunne nyttast til beste for pasientane, og være trygge å bruke for pasientar og behandlarar. MTA er ein del av Drift/teknisk divisjon.

Arbeidsoppgåver

• Utføre reparasjonar, planlagde kontrollar/vedlikehald, oppdateringar og konfigurasjon
  
• Delta i anskaffingar av nytt utstyr og tilhøyrande IKT-systemløysingar
  
• Delta i/utføre mottak, risikovurdering og driftsetjing av utstyr og IKT-systemløysingar, oftast saman med leverandørar og andre samarbeidspartnarar
  
• Utarbeide rutinar og dokumentasjon
  
• Delta i opplæring av teknisk og klinisk personell
  
• Samarbeide med klinisk og teknisk personell for å sikre best mogeleg bruk av utstyr og IKT-systemløysingar til beste for pasientane
  
• Andre oppgåver etter behov
  

Seksjon for analyse og diagnostikk deltek i forvalting av medisinsk utstyr og tilhøyrande IKT-systemløysingar innan ei rad ulike utstyrskategoriar som til dømes laboratorieutstyr, dialyseutstyr, laser, endoskopi, elektrofysiologisk utstyr til EMG/EEG og utstyr til utgreiing av sjukdomar innan søvn, høyrsel og balanse. Arbeidsoppgåvene i denne stillinga vil blant anna være knytt til laboratorieutstyr, laser og endoskopi. Avhengig av kompetanse, interesse og Helse Bergen sitt behov, vil den som vert tilsett få oppgåver innan andre utstyrskategoriar også.

Den som vert tilsett må regne med å få hovudansvar for forvaltning av medisinsk utstyr og tilhøyrande IKT-systemløysingar innan tildelte utstyrskategoriar. Opplæring vert nokre gonger gjennomført hos leverandør eller produsent slik at ein må rekne med å reise på kurs i samband med jobben.

Kvalifikasjonar

• Bachelorgrad i medisinsk teknologi, automasjon, elektronikk eller liknande. Annan utdanning kan vurderast ved særskilt relevant erfaring
• Det er ønskjeleg med erfaring innan forvaltning og vedlikehald av medisinsk utstyr
• Førarkort kl. B
• Må meistre norsk og engelsk godt både munnleg og skriftleg
  

Utstyret som vert nytta er ofte IKT-basert og den som vert tilsett må ha både kompetanse og interesse for å arbeida med slikt utstyr. God forståing for informasjonssikkerheit og personvern i medisinsk utstyr og tilhøyrande ikt-systemløysingar er naudsynt. Vi ønskjer også at den som vert tilsett har kunnskap om kunstig intelligens eller er interessert i å tileigne seg slik kunnskap.

Det er ønskjeleg med samtykke frå Direktoratet for samfunnssikkerhet og beredskap (DSB) til å arbeide med reparasjon av elektromedisinsk utstyr. Dersom ein ikkje har samtykke, vil opplæringsløp bli lagt opp for å oppnå dette.

Personlege eigenskapar

• Du må kunne arbeide godt både sjølvstendig og i team
• Du er vennleg og hjelpsam mot kollegaene dine
• Du arbeider ryddig, målretta og strukturert
• Du tek initiativ og har evne til å gjennomføre arbeidsoppgåver
• Du tilpassar deg lett - er serviceinnstilt, løysningsorientert og fleksibel
• Du har motivasjon og interesse for fagfeltet

Vi tilbyr

• Ei utfordrande og spanande stilling ved eit av dei største sjukehusa i Noreg
• Ein allsidig jobb med gode moglegheiter for utvikling
• Opning for å delta i strukturert opplæringsløp, faglege forum, konferansar og liknande
• Eit stabilt arbeidsmiljø prega av stort mangfald både i utdanningsnivå og profesjon (fag)
• Moglegheit for å væra medlem i eit aktivt bedriftsidrettslag
• Fleksibel arbeidstidsordning
• Pensjon og forsikringsvilkår i KLP
• Lønn etter avtale

Vi oppfordrar alle søkjarar til å nytte Vitnemålsportalen for å laste opp verifiserte vitnemål og karakterutskrifter, der det er mogleg. Har du utdanning frå utlandet, legg ved godkjenning frå Direktoratet for høgare utdanning og kompetanse.

Kontaktinformasjon

Kjell Magne Nupen, Seksjonsleiar, +47 55972646

Arbeidsstad

Haukelandsveien 22
5021 Bergen

Nøkkelinformasjon:

Arbeidsgivar: Helse Bergen HF

Referansenr.: 5106462830
Stillingsprosent: 100%
Fast
Startdato: 15.06.2026
Søknadsfrist: 26.04.2026