Ledig stilling som prøveforvaltar

Om stillinga 

Stillinga høyrer heime i divisjonen for arbeidsliv og kompetanse i avdelinga for prøveforvalting.

Avdelinga har ansvar for forvaltinga av det digitale prøvesystemet, der prøver i norsk og samfunnskunnskap for vaksne innvandrarar, i tillegg til statsborgarprøva, blir gjennomførte. Vi jobbar no med å utvikle eit nytt prøvesystem som skal erstatte det gjeldande systemet. 

Avdelinga har også ansvar for å legge til rette for kommunane si gjennomføring av prøvene, og for å rettleie både kommunane og kandidatane om aktuelle prosedyrar. 

Vi har også utviklings- og forvaltingsansvaret for samfunnskunnskapsprøva , statsborgarprøva og den digitale læringsressursen samfunnskunnskap.no. 

Arbeidsoppgåver:

Hovudoppgåvene for stillinga er å ha ansvar for forvaltinga av samfunnskunnskapsprøva og statsborgarprøva, særleg retta mot:

• drift av oppgåvene til prøvene som omfattar; alle prosessane i tilknyting til vedlikehald av prøvene, pilotering av oppgåver, periodevis koordinering av oppgåveproduksjon, sikring og koordinering av omsettingsarbeid av samfunnskunnskapsprøva til over 20 språk, implementering av oppgåvene i det digitale prøvesystemet, strukturelt samarbeid med analyseavdeling for kvalitetssikring av prøvene som relevante, valide og reliable mv.
• å legge til rette for gode utviklingsprosessar for oppgåvene der aktuelle fagmiljø blir involverte 
• å legge til rette for gode informasjonsstraumar mellom alle involverte, internt og eksternt
• å hjelpe til med gjennomføring av relevante anskaffingar med påfølgjande kontrakthandtering
• å bidra i tilrettelegginga og implementeringa av oppgåvene til det nye prøvesystemet

I tillegg følgjer avdelinga eit årshjul der dei fire årlege gjennomføringane av prøver i norsk legg føringar for mykje av drifta vår. Alle medarbeidarane i avdelinga må tidvis bidra inn i det vi reknar som fellesoppgåver. Det knyt seg til dømes til handtering av innkomne førespurnader frå brukarane våre, i tillegg til kollegabistand utanfor det som vert rekna som kjerneoppgåver som ligg til stillinga.

Slike oppgåver kan til dømes vere: 

• sakshandsaming
• prosjektarbeid og oppgåvekoordinering med utspring i oppdrag frå departementet, og i samarbeid med andre direktorat, eksterne leverandørar og kommunesektoren
• driftsoppgåver knytte til prøvegjennomføringane
• rettleiing for kandidatar til prøver i norsk og samfunnskunnskap

Kva kvalifikasjonar treng vi?

Vi krev:

• høgare utdanning tilsvarande minimum bachelorgrad, fortrinnsvis master, innan eit relevant fagområde, til dømes lingvistikk og språk, pedagogikk, samfunnskunnskap eller liknande. Realkompetanse kan kompensere for delar av utdanningskravet.
• god forståing for digitale system, medrekna evne til å arbeide i digitale prøve- og forvaltingssystem
• erfaring med statistikk og statistiske analysar, fortrinnsvis arbeidserfaring og gjerne
• innsikt i kvalitetssikringsmetodar innan test- og oppgåveutvikling
• erfaring med prosjektarbeid, koordinering eller tverrfaglege prosessar 
• god framstillingsevne på norsk, tilsvarande B2 i alle ferdigheitene
• relevant arbeidserfaring, for eksempel i tilknyting til utdanningssektoren og/eller integreringsfeltet

Av personlege eigenskapar krev vi:

• at du har god evne til å jobbe sjølvstendig og ta ansvar for eigne oppgåver
• at du har gode samarbeidsevner og god evne til å bygge relasjonar på tvers av fagmiljø internt og eksternt
• at du er æringsvillig, og kan sette seg raskt inn i til dømes nye fagområde, system og regelverk
• at du er strukturert og nøyaktig, og god gjennomføringsevne

Det er i tillegg ein fordel om du har tilleggskvalifikasjonar

• erfaring frå utvikling av prøver, vurderings- eller sensurarbeid
• erfaring med opplæring for vaksne
• forståing for offentleg forvalting og byråkratiske prosessar
• kjennskap til målgruppa for prøver i norsk og samfunnskunnskap for vaksne innvandrarar
• kjennskap til Det felles europeiske rammeverket for språk (CEFR)
• kjennskap til arbeid med og forvalting av prøver i norsk og samfunnskunnskap

Hos oss får du:

• uformelt og godt fag- og arbeidsmiljø
• moglegheit for fagleg utvikling og kompetanseheving
• fleksibel arbeidstidsordning og moglegheit for arbeid heimanfrå delar av arbeidstida
• moglegheit for trening i arbeidstida med inntil to timar per veke
• medlemskap i Statens pensjonskasse, med gode pensjons- og låneordningar 

Lønsvilkår

• Lønsplassering etter kompetanse:
  • stillingstittel som rådgivar/seniorrådgivar med ei årsløn mellom kroner 580 000 og 850 000, for særskilt godt kvalifiserte søkjarar kan høgare løn vurderast. 
• To prosent trekk til lovfesta innskot i Statens pensjonskasse 

Inkluderande arbeidsliv og mangfald

I HK-dir trur vi at mangfald gir oss breiare perspektiv, og at medarbeidarar med ulik livserfaring og fagkombinasjonar vil gjere oss i stand til å finne enda fleire gode løysningar på våre oppdrag. Vi oppmodar derfor alle til å søke jobb utan omsyn til alder, kjønn, funksjonsevne eller etnisk bakgrunn. Du er også velkomen til å søke sjølv om du ikkje kan vise til ei samanhengande yrkeskarriere. Vi legg forholda til rette for personar med nedsett funksjonsevne.

Dersom du har funksjonsnedsetting, innvandrarbakgrunn eller hol i CV-en kan du verte positivt særbehandla dersom du kryssar av for dette når du søker stillinga. Vi inviterer minst éin kvalifisert søkar i kvar av desse gruppene til intervju. For å verte positivt særbehandla på denne måten, må du oppfylle visse krav. Les meir om dette på arbeidsgjevarportalen. Avkryssing i Jobbnorge gir grunnlag for anonymisert statistikk, som alle statlege verksemder rapporterer i sine årsrapportar. 

Offentleg søkjarliste

Vi gjer merksam på at opplysningar om søkjaren kan verte offentleggjort sjølv om søkjaren sjølv ber om ikkje å verte ført opp på søkjarliste, jf. Offentleglova § 25. Søkjaren vert i så tilfelle informert om dette på førehand. 

Søknad og CV

For å ha eit godt vurderingsgrunnlag ber vi deg om å registrere søknad og utfyllande CV i vår rekrutteringsportal og laste opp relevante attestar og vitnemål. Vi oppmodar deg om å gi tilgang til vitnemålsportalen.