Er du vår nye omvisar i Vinjestoga og diktarheimen Midtbø?

Har du interesse for, eller erfaring med kulturformidling? Vinjesenteret ser etter omvisarar til ein ny sumarsesong i utstillinga vår, i Vinjestoga og på Midtbø i Vinje i Telemark. Kanskje er du student og ynskjer relevant arbeidserfaring? Send oss ein søknad!

Diktarheimen Midtbø var heimen til forfattarane og ekteparet Tarjei Vesaas og Halldis Moren Vesaas. Vinjestoga var barndomsheimen til forfattaren og journalisten Aasmund Olavsson Vinje. I tillegg har me ei fast utstilling på Vinjesenteret.

Som omvisar hjå oss har du lyst å få besøkjande til å kjenna seg velkomne, og gje dei gode opplevingar i møte med litteratur og kultur. Har du ei interesse for skjønnlitteratur og lyrikk vil det gjera arbeidet ekstra spennande.

Du vil ha arbeidsdagar på Midtbø, i Vinjestoga, og på Vinjesenteret i løpet av veka. Som grunnlag for omvisingane vil du ha eit profesjonelt utarbeidd manus som utgangspunkt. Du vil få god opplæring og høve til å øve på manus.

Det er ein fordel med bachelor eller anna høgare utdanning, men me vil også gjerne høyre frå deg som har relevant erfaring innan kulturformidling.

Du må vera stødig i engelsk, og kan du fleire språk er det ein bonus. Du må ha førarkort klasse B.

Sesongen for omvisingane på Midtbø byrjar 13. juli og held fram til 18. august. Sesongen for omvisingane i Vinjestoga og på Vinjesenteret byrjar 23. juni og held fram til 18. august.

Opningstidene for Vinjesenteret er kl. 11.00--17.00 tysdag til sundag.

Hjå oss nyttar alle nynorsk i skriftlege samanhengar.

Løn etter lokalt lønssystem. 

Send søknad med CV og relevante attestar som eitt samla PDF-dokument snarast  til **stilling@nynorsk.no.**Hugs å ta med fullt namn, fødselsår, bustad og noverande stilling eller yrkestittel i søknaden.

Behandling av personopplysningar i samband med rekruttering  

Søkarar på stillingar i Nynorsk kultursentrum sender søknad, cv og personopplysningar til e-postadressa stilling@nynorsk.no. Det er berre ein person i organisasjonen som har tilgang til denne og behandlar opplysningane som kjem inn der.  

Når søknadsfristen er ute blir det laga ei søkarliste med følgjande informasjon om kvar kandidat til stillinga: Namn, bustadkommune, fødselsår, noverande arbeidsstad og høgaste utdanning. Desse opplysningane blir lagra etter at tilsetjingsprosessen er over. All anna personinformasjon (søknad, cv og kontaktdata) blir sletta etter at tilsetjinga er gjennomført.  

Nynorsk kultursentrum har offentlege søkarlister. Om du ikkje skal stå på ho, må du be om unntak i søknaden. Du vil eventuelt få dette innvilga frå administrasjonen. Dei offentlege søkarlistene inneheld namn, bustadkommune, fødselsår og noverande stillingstittel.  

Nynorsk kultursentrum verken kartlegg eller lagrar sensitive personopplysningar. Vi sender heller ikkje vidare noko informasjon om søkjarar utan samtykke frå kandidaten.  

Dine rettar etter personopplysningsloven  

Alle har rett til generell informasjon om korleis Nynorsk kultursentrum behandlar opplysningar. Alle personar vi har registrert personopplysningar om, har rett på innsyn i det som er registrert om ein. Om desse opplysningane er feil, kan du krevje at dei blir retta eller sletta.