Førstekonsulent/rådgjevar (eittårig vikariat – jurist)

Om stillinga

Kultur- og likestillingsdepartementet (KUD) har ledig eit eittårig vikariat som førstekonsulent/rådgjevar i avdeling for likestilling, diskriminering og internasjonale saker, i seksjon for juridiske og internasjonale saker (LI2). Det er fleire større arbeid innanfor departementet sitt diskrimineringsrettslege ansvarsområde no, og vi søkjer etter deg som har interesse for å arbeide med juridiske saker i eit departement. 

Du bør ha særleg interesse for diskrimineringsrett, forvaltningsrett, internasjonale menneskerettar og EU/EØS-rett. Stillinga omfattar eit breitt spekter av juridiske oppgåver med stort rom for fagleg og personleg utvikling. 

Det vil òg vere aktuelt å jobbe med andre oppgåver som høyrer til avdelinga. Du vil inngå som del av eit stimulerande og tverrfagleg miljø som består av engasjerte og kompetente juristar, økonomar og samfunnsvitarar. KUD er eit relativt lite departement, men sakene våre får ofte mykje offentleg merksemd. Ansvarsområda er viktige for samfunnet, og arbeidskvardagen kan vere hektisk.

Arbeidsoppgåver

• juridiske oppgåver i heile breidda av diskrimineringsretten
• lovarbeid, mellom anna utarbeiding av høyringsnotat og lovproposisjonar
• vurdering og implementering av relevant EU-regelverk på området
• oppfølging av dei internasjonale konvensjonane på området
• oppfølging av Likestillings- og diskrimineringsombodet og Diskrimineringsnemnda
• generelle oppgåver innanfor heile breidda av avdelinga sitt ansvarsområde

Kvalifikasjonar

Du må ha:

• juridisk embetseksamen eller mastergrad i rettsvitskap, med gode resultat

• god skriftleg og munnleg framstillingsevne på norsk og engelsk

  Det vil vere ein fordel om du har kjennskap til og erfaring med diskrimineringsrett, EU/EØS-rett eller relevante FN-konvensjonar. Erfaring med juridisk oppgåveløysing innanfor statleg offentleg forvaltning vil òg vere ein fordel. 

Vi ser etter deg som:

• arbeider systematisk og nøye
• evnar å tenkje strategisk og analytisk
• er initiativrik og utviklingsorientert og evnar å gjennomføre 
• er fleksibel, sjølvstendig og svært god til å samarbeide

• forstår embetsrolla og forholdet mellom politikk og forvaltning

  Vi vil leggje vekt på motivasjon og personlege eigenskapar.
   

  Den som blir tilsett i stillinga, må kunne autoriserast for tilgang til informasjon som er gradert som BEGRENSET etter sikkerhetsloven.

Vi tilbyr

• lønn frå 570 000–630 000 kroner per år som førstekonsulent eller frå 600 000–710 000 kroner per år som rådgjevar (for spesielt kvalifiserte søkarar kan høgare lønn vurderast)
• fleksibel arbeidstid, med sommar- og vintertid
• høve til å trene i arbeidstida, tilgang til treningsrom og treningstilbod
• medlemskap i Statens pensjonskasse (SPK) med gode vilkår for pensjon, bustadlån og forsikring
• introduksjonsprogram for nytilsette og gode høve til kompetanseutvikling gjennom KUD-skolen og Departementsakademiet
• eit kunnskapsrikt, inkluderande og uformelt arbeidsmiljø

Vi held til midt i Oslo sentrum og skal i 2026 flytte inn i det nye Regjeringskvartalet som er under oppføring.

Kvardagen i departementsfellesskapet er prega av varierte og utfordrande arbeidsoppgåver. Vi har eit omfattande og viktig samfunnsoppdrag, og hos oss får du høve til å vere med på å utvikle den statlege politikken og forvaltninga av våre politikkområde.

Kultur- og likestillingsdepartementet er del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Vi oppmodar deg om å krysse av for det i jobbportalen dersom du fell inn under ein av kategoriane.  Les meir om krava for positiv særbehandling på Arbeidsgiverportalen.

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du ha meir informasjon om stillinga, kan du ta kontakt med avdelingsdirektør Cecilia Schwoerer Lyche på telefon 91 18 71 73 eller seniorrådgjevar Christine Tellnes på telefon 92 80 83 48.

Om avdelinga og seksjonen

Avdeling for likestilling, diskriminering og internasjonale saker har sektoransvar og koordineringsansvar på politikkområda likestilling og diskriminering, og ansvar for å følgje opp internasjonale konvensjonar og internasjonalt arbeid på området. Avdelinga har i tillegg ansvar for regelverk på likestillings- og diskrimineringsområdet, kulturelt mangfald og generelle internasjonale kultursaker.

Ansvaret for styringa av Diskrimineringsnemnda, Likestillings- og diskrimineringsombodet og likestillingsoppgåvene i Barne-, ungdoms- og familiedirektoratet ligg til avdelinga.

Avdelinga arbeider med eit breitt spekter av verkemiddel innanfor politikkområda, med hovudvekt på lov- og politikkutvikling, tilskotsordningar, strategiar og handlingsplanar, forskings- og utviklingsarbeid (FoU) og styring av underliggjande verksemder. Avdelinga deltek i internasjonalt arbeid på det likestillingspolitiske og kulturpolitiske området i forum som FN, EU/EØS, Europarådet, Nordisk ministerråd og OECD.

Stillinga er plassert i seksjon for juridiske og internasjonale saker, som har ansvar for juridiske oppgåver i avdelinga og oppfølging av likestillings- og diskrimineringsregelverket. Seksjonen arbeider med forvaltning av regelverket innanfor eige sektorområde og samarbeider elles mykje med andre departement. 

Seksjonen har i tillegg ansvar for internasjonale oppgåver på likestillingsfeltet og på kulturområdet. Seksjonen koordinerer arbeid knytt til EU/EØS, EØS-midlar og nordområdesatsinga og dessutan samarbeid med FN, Europarådet, Nordisk ministerråd og OECD.