UiB - Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

. Video: https://youtu.be/M5n6RnScNgA

Stipendiat

Ved Geofysisk institutt (GFI) er det ledig ei stilling som ph.d.-stipendiat i klima/fornybar energi. Stillinga er for ein åremålsperiode på tre år, med høve til eit fjerde år som består av karrierefremmande arbeid (til dømes undervisning). Stillinga er knytt til Akademiaavtalen mellom UiB og Equinor.

Om prosjektet/arbeidsoppgåver

Det er eit avgjerande behov for å auke fornybar energi for å avgrense global oppvarming til 1,5 °C. Vindkraft har potensial til å bidra vesentleg til dette målet, men mange miljømessige, økonomiske og samfunnsmessige faktorar må vurderast. Denne doktorgradsstillinga vil fokusere på å vurdere framtidig utvikling og geografisk fordeling av klimatiske forhold gjennom heile livsløpet til ein vindpark. Hovudmålet vil vere å identifisere område med dei mest gunstige klimatiske forholda for vindpark-klynger, med omsyn til påverknaden frå fleirtiårs klimavariabilitet på vindkraftproduksjon og operasjonsevne i Euro-Atlantiske og nordiske område. Lite merksemd har vore retta mot slike variasjonar, som over ein 30-årsperiode kan vere større enn dei langsiktige endringane.

Dette doktorgradsprosjektet vil vere ein del av ei større satsing ved instituttet som har som mål å utforske dei gjensidige påverknadene mellom klimaendringar og havvind. Doktorgradsstipendiaten vil vere del av eit team som inkluderer energi- og klimagruppene ved GFI og Equinor. Eit kjernefokus i forskinga vil vere å analysere langtidsobservasjonar og reanalyse-data, kombinert med detaljerte vurderingar av klimamodellsimuleringar som inkluderer påverknaden frå vindpark-vakeeffektar på vindkraftproduksjon og lokale atmosfæriske forhold. Stipendiaten vil nytte eit breitt spekter av avanserte analyse-, diagnose- og modellteknikkar. Resultata frå forskinga vil bidra til ein digital atlas som viser endringar i vindkraftpotensial og tilhøyrande miljøforhold som påverkar operasjonsevne og effektivitet i framtidige havvindparkar, og vil gi verdifull innsikt for strategisk planlegging og integrering i breiare energisystem.

Kvalifikasjonar og eigenskapar

Søkjarar må ha oppnådd mastergrad eller tilsvarande utdanning i vêr- og klimavitskap, fysisk oseanografi og meteorologi, anvendt matematikk, energi eller tilsvarande, eller ha levert masteroppgåva til vurdering innan søknadsfristen er ute. Det er ein føresetnad at mastergraden er oppnådd før tilsetjing kan skje.
Kandidaten må ha sterke programmeringsferdigheiter i eitt eller fleire språk (t.d. Python, MATLAB, Fortran, C++).
Søkjar må ha sterke analytiske evner og kompetanse innan databehandling og matematisk modellering.
Erfaring med vêr- eller klimamodellar er ein fordel.
Kunnskap om fysikken bak vind-, bølge- og solenergi er ein fordel.
Søkjarar må kunne arbeide sjølvstendig og strukturert og ha gode samarbeidsevner.
Søkjarar må ha gode skriftlege og munnlege engelskkunnskapar.

Personlege og mellommenneskelege eigenskapar vil bli lagt vekt på. Ambisjonar og potensial vil også telje ved vurdering av kandidatane.

Særeigne krav for stillinga
UiB er underlagd regelverket for eksportkontroll og regelverket gjeld ved behandling av søknadar til stillinga.

For stillinga gjeldt følgande

Om stillinga som ph.d.-stipendiat
Samla stipendperiode er 3 år, med høve til eit 4. år som består av karrierefremmande arbeid (til dømes undervisning) fordelt med 25 % over tilsetjingsperioden. Dette avheng av kandidaten sine kvalifikasjonar og instituttet sitt behov for undervisning, og vert avgjort av instituttleiar ved tilsetjing.

Om du tidlegare har vore tilsett i rekrutteringsstilling (stipendiat, vitskapleg assistent eller liknande), kan det bli gjort frådrag i tilsetjingsperioden.

Om forskarutdanninga
Som ph.d. stipendiat skal du delta i eit godkjent utdanningsprogram for ein ph.d.- grad innanfor ei tidsramme på 3 år. Frist for å søkje om opptak til ph.d.-programmet ved Fakultet for naturvitenskap og teknologi er to månadar etter tiltreding i stillinga eller etter oppstart av det forskingsprosjektet som skal leie fram til ph.d.-graden. Det er ein føresetnad at du fyller krava for opptak til ph.d.- studiet ved Universitetet i Bergen.

Vi tilbyr:

eit godt og fagleg stimulerande arbeidsmiljø
løn som stipendiat (kode 1017) i samsvar med det statlege lønsregulativet. Dette utgjer ei brutto årsløn på kr. 568 700. Vidare opprykk skjer etter stillingsansiennitet.
medlemskap i Statens pensjonskasse
gode velferdsordningar

Søknaden skal innehalde

ei kort utgreiing om forskingsinteresser og motivasjonen for å søkje stillinga
namn og kontaktopplysningar til to referansar. Ein av desse bør vere hovudrettleiaren frå masteroppgåva eller tilsvarande oppgåve.
CV
karakterutskrifter og vitnemål for bachelor- og mastergrad. Dersom du enno ikkje har fullført mastergraden må du levere ei stadfesting på at mastergradsoppgåva er levert.
relevante attestar
godkjend dokumentasjon på at du oppfyller krav til engelskkunnskapar (dersom påkravd, jfr. Krav til engelskkunnskaper ved opptak til ph.d.-programmet)
eventuell liste over vitskaplege arbeid (publikasjonslister med lenkjer)

Søknad og vedlegg med attesterte omsetjingar til engelsk eller eit skandinavisk språk må lastast opp i Jobbnorge.

Generell informasjon

Utfyllande opplysningar om stillinga kan ein få ved å vende seg til professor Noel. Keenlyside (noel.keenlyside@uib.no), Geofysisk institutt eller professor Mostafa Paskyabi (mostafa.bakhoday-paskyabi@uib.no), Geofysisk institutt.

For HR-relaterte spørsmål ta kontakt med HR rådgjevar Maria Svåsand (maria.svasand@uib.no)

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju. Nærare om tilsettingsprosessen her.

Livet som ph.d.-kandidat ved UiB

Astrid Nybø forteller om livet og arbeidshverdagen som ph.d.-kandidat ved UiB.

. Video: https://www.youtube.com/watch?v=Eo3Z63yzkKA&list=PLf8ZIYfAO0qjhROTj6SthDbSScg0lSO6G&index=5

Informasjonskapsler på arbeidsplassen.no

Rapporter annonse