Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

. Video: https://youtu.be/M5n6RnScNgA

Om stillinga:

Universitetsmuseet i Bergen har forsking, samlingsforvalting og formidling som kjerneoppgåver. Museet har fagfelta antropologi, arkeologi, kunst- og kulturhistorie, botanikk, geologi og zoologi. Til museet ligg òg ansvaret for utgravingsverksemda i medfør av Kulturminnelova med forskrifter, samt for Arboretet og to botaniske hagar. Universitetsmuseet har omfattande vitskaplege samlingar og er ein sentral arena for forskingskommunikasjon for UiB. Museet har om lag 153 årsverk fordelt på om lag 200 tilsette. Nærare informasjon om museet finn ein her: http://www.uib.no/universitetsmuseet

Instituttleiar (avdelingsleiar) for Avdeling for naturhistorie
Vil du vere med å leie og vidareutvikle Universitetsmuseet i Bergen (UM), ein av dei mest spennande kunnskapsinstitusjonane i landet? Ved Universitetsmuseet i Bergen er det ledig åremålsstilling som instituttleiar (avdelingsleiar) ved Avdeling for naturhistorie med tiltreding seinast 01.12.2025.

Vi søkjer etter ein leiar som har høge ambisjonar på vegne av Universitetsmuseet i Bergen, har vilje og evne til å reflektere over den rolla eit universitetsmuseum skal ha i dag og er interessert i å utforske nye arbeids- og samarbeidsformer for å styrke Universitetsmuseet. Vi søkjer etter ein leiar med gode evner til å kommunisere, motivere og utøve leiarskap, og etablere gode relasjonar til dei tilsette.

Universitetsmuseet i Bergen skal medverke til synleggjering av Universitetet i Bergen som forskingsuniversitet nasjonalt og internasjonalt. Vår oppgåve er å drive innsamling, samlingsforvalting, grunnforsking og publisering på høgt internasjonalt nivå, i breidda av museet sine fagdisiplinar. Leiarane ved museet skal dyrke fram kritisk tenking og tverrvitskaplege perspektiv gjennom bygging av kreative forskingsmiljø innanfor og på tvers av avdelingane, og godt fungerande nasjonale og internasjonale nettverk. Vi skal formidle eigen forsking og aktivitet, og dessutan samarbeide med UiB sine ulike forskingsmiljø for å utvikle museet til ein sentral arena for forskingskommunikasjon for heile universitetet.

Universitetsmuseet i Bergen har fire avdelingar: Avdeling for kulturhistorie, naturhistorie, samlingsforvalting, og forskingskommunikasjon og -formidling. I tillegg har UM ein administrasjon, leia av underdirektør, som gjev dei fire avdelingane administrativ støtte.

Avdeling for naturhistorie
Avdeling for naturhistorie har to seksjonar: Seksjon for forsking og samlingar og Seksjon for universitetshagane (der sistnemnde har tilsett leiar). Avdelingsleiaren skal bidra til å sikre god samhandling innanfor avdelinga sine seksjonar samt mot dei andre avdelingane. Avdeling for naturhistorie har om lag 65 tilsette, inkludert syv professorar, syv førsteamanuensar og fire forskarar/post- doktorar. Det er i dag fem ph.d.-kandidatar ved avdelinga. Avdelinga omfattar fagområda botanikk, geologi, zoologi og paleobiologi. Avdelinga har breitt nasjonalt og internasjonalt forskingssamarbeid, nært samarbeid med dei andre universitetsmusea knytt til samlingsforvalting, og samarbeid med forvaltingsinstitusjonar som til dømes Havforskingsinstituttet, Artsdatabanken, Norsk institutt for kulturminneforsking (NIKU) og botaniske hagar.

Arbeidsoppgåver:

Instituttleiaren har det overordna personalansvaret for tilsette i avdelinga, irekna ansvar for helse, miljø og sikkerheit (HMS). Det er leiaren si oppgåve å leie og utvikle avdelinga, og for at ressursane i avdelinga vert brukte effektivt og formålstenleg. Instituttleiaren har òg resultatansvar for avdelinga si totale verksemd. Seksjonsleiar for universitetshagane rapporterer til instituttleiar. Instituttleiar rapporterer til direktøren i faglege saker og til underdirektør i økonomiske saker. Som del av leiargruppa ved Universitetsmuseet skal instituttleiaren bidra til strategisk utvikling av museet, styrke det tverrfaglege samarbeidet og forsterke museet sin posisjon som eit leiande, nyskapande og anerkjent universitetsmuseum.

Avdelingsleiaren har òg ansvar for:

Å leie den strategiske utviklinga av Avdeling for naturhistorie
Bidra til drøftingane i museet si leiargruppe
Organisere og koordinere pliktarbeidet til dei vitskapeleg tilsette
Å sikre at avdelinga sin vitskaplege produksjon og forskingsaktivitet ligg på eit høgt internasjonalt nivå
Å leggje til rette for gode forskingsmiljø, og inspirere og motivere tilsette til fagleg utvikling
Sikre god samlingsforvalting ved avdelinga
Bidra til godt samarbeid mellom museet sine avdelingar og til at ein ved museet utviklar fagleg samarbeid mellom kultur- og naturvitskapelege disiplinar
At det over tid vert etablert ei portefølje av nasjonale og internasjonale forskingsprosjekt
Sikre at avdelinga både set i verk og tek aktivt del i museet sine formidlingsprosjekt
Kunne ta sakshandsamings-, utviklings- og utgreiingsoppgåver innanfor stillinga sine arbeids- og ansvarsområde, og ha ansvar for utvikling, implementering og oppfølging av sentrale prosedyrar og rutinar
I dialog med aktuelle institutt å vurdere korleis og i kva for eit omfang avdelinga sine tilsette kan bidra i undervising

Kvalifikasjonar og eigenskapar:

Kvalifikasjonskrav:

Førstestillingskompetanse innanfor eit av avdelinga sine fagområde
Gode resultat frå forskingsleiing
Erfaring med økonomi- og personalleiing
Kjennskap til Universitetsmuseets organisasjon og relevante forvaltingsinstitusjonar
God skriftleg og munnleg framstillingsevne på norsk eller eit anna skandinavisk språk
Gode skriftlege og munnlege engelskkunnskapar

Ønska kvalifikasjonar:

Erfaring frå tverrvitskapeleg forsking
Erfaring frå museumsarbeid
Evne til strategisk utviklingsarbeid i kunnskapsorganisasjonar

Personlege eigenskapar:

Kapasitet til å følgje opp og koordinere mange og varierte arbeidsoppgåver
Evne til å leie, inkludere, skape tillit og byggje nettverk og relasjonar
Handlekraftig, fleksibel og tydeleg

Vi kan tilby:

Eit godt og fagleg utfordrande arbeidsmiljø
Stilling som instituttleiar (kode 1475) i årsløn kr. 1 134 700. For særskilt kvalifiserte søkjarar kan det vurderast høgare løn.
Medlemsskap i Statens pensjonskasse
Stilling i ei inkluderande arbeidslivsverksemd (IA-verksemd)
Gode velferdsordningar

Generell informasjon:

Utfyllande opplysningar om stillinga kan ein få ved å vende seg til: Direktør Kari Loe Hjelle, telefon 55583323, mobil 97557123, e-post Kari.Hjelle@uib.no

Stillinga er ei åremålsstilling for fire år. Ingen kan tilsetjast samanhangande i same stilling i meir enn to åremålsperiodar. Ved utløpet av kvar åremålsperiode skal stillinga kunngjerast offentleg. Vedkomande som vert tilsett vil få tilbod om kompetanseutvikling innanfor leiing.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Universitetet i Bergen arbeider målretta for auka likestilling og legg vekt på kjønnsbalanse og mangfald i leiargruppene. Kunnskap om og resultat frå aktivt likestillings- og mangfaldsarbeid blir tillagt vekt ved rekruttering av leiarar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

UiB er underlagt regelverket for eksportkontroll og regelverket kan komme til anvending ved behandling av søknader til stillinga.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.Nærare om tilsettingsprosessen her.

Informasjonskapsler på arbeidsplassen.no

Rapporter annonse