Departementet skal ordne papirarkiva sine og vil i den samanhengen lyse ut stillingar til eit ordningsprosjekt. I prosjektgruppa skal det vere ein prosjektleiar, ein til to prosjektmedarbeidarar og ein til to studentar. Arbeidsstaden vil for det meste vere Nasjonalarkivet på Sognsvann. Stillinga vil vere fleksibel og timebasert. Oppstart etter avtale.

Målet for prosjektet er at papirarkivet til KUD skal leverast til Nasjonalarkivet, i tråd med gjeldande lovkrav og retningslinjer for offentlege arkiv.

Dokumentasjonseininga har ansvaret for dagleg drift og utvikling av arkivet og dokumentasjonsforvaltninga til departementet, og ho sørgjer for at rutinar og dokumenthandtering er i tråd med gjeldande reglar og instruksar.

Arbeidsoppgåver

ordne og listeføre papirarkivet til KUD, i samsvar med gjeldande regelverk
hjelpe til med å finne fram arkivmateriale for departementet i ordningsperioden

Fram til oppstarten av ordningsprosjektet skal du arbeide med driftsoppgåver i dokumentasjonseininga og/eller prosjektoppgåver i departementet.

Kvalifikasjonar

Du må ha:

påbyrja høgare utdanning ved universitet eller høgskule innan arkivvitskap
kunnskap om relevant lovverk
gode norskkunnskapar skriftleg og munnleg
god samfunnsforståing

Og gjerne erfaring frå arkivarbeid i offentleg sektor, helst departementsarkiv

Vi søkjer deg som er:

er systematisk, nøyaktig og strukturert
er initiativrik og er ein positiv bidragsytar til arbeidsmiljøet
har gode samarbeidsevner og kan jobbe sjølvstendig
er løysingsorientert og har god gjennomføringsevne
har stor arbeidskapasitet

Den som blir tilsett i stillinga, må kunne autoriserast for tilgang til informasjon som er gradert som "BEGRENSET" etter sikkerhetsloven.

Vi tilbyr

Lønn i stillingskode:
konsulent (årslønn kr 450 000-510 000) eller
førstekonsulent (årslønn kr 500 000-570 000)
For stilling som førstekonsulent er kravet 3 års høgare utdanning eller bachelorgrad.

ein spennande jobb med eit svært interessant arkiv som dokumenterer verksemda til KUD
moglegheit for sjølvstendig arbeid
eit godt arbeidsmiljø og arbeidsplass på Sognsvann
gode forsikrings- og pensjonsordningar, med automatisk medlemskap i Statens pensjonskasse

Kultur- og likestillingsdepartementet er del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen (https://arbeidsgiver.dfo.no/strategisk-hr/inkluderingsarbeid/bli-bedre-pa-rekruttering/hvordan-skrive-stillingsannonser-som-inkluderer/positiv-saerbehandling-nar-man-soker-jobb-i-staten?size=n_20_n).

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du vite meir om stillinga, kan du ta kontakt med Ida Tobro, kontorsjef, tlf.: 920 48 820 eller på e-post: ida.tobro@kud.dep.no

Om avdelinga og seksjonen

Administrasjonsavdelinga utviklar system for styring og fastset overordna retningslinjer for ei effektiv og samordna leiing og drift av departementet. Avdelinga tek seg av administrative saker og ser til at departementet blir styrt i samsvar med gjeldande lovar og reglar.

Forvaltningsseksjonen har ansvaret for drift og utvikling av arkiv og dokumentforvaltning i departementet, oppfølging og utvikling av IKT og andre fellestenester og generelle driftsoppgåver. Seksjonen har òg ansvar for førebyggjande tryggleik og beredskap.

Rapporter annonse