Om stillinga

Vil du ha ein jobb der du både får bryne deg på eit stort spekter av juridiske oppgåver samtidig som du har ei viktig samfunnsrolle – nemleg å skape tillit mellom naboar og myndigheiter?

I rolla som jordskiftedommar vil du handtere saker som spenner frå naboar som treng å avklare vegrett, usemjer knytt til jaktrettar og disputtar om eigedomsgrenser. Mange av partane er sjølvprosederande, så i tillegg til jordskiftefagleg spissfinde, må du bruke mellommenneskeleg kløkt og evne å formidle jussen på ein folkeleg måte.

Ein annan svært positiv side ved denne jobben er variasjonen gjennom arbeidskvardagen – og då tenkjer vi verken på dei jordskiftefaglege problemstillingane eller partane du møter, men korleis jobben blir utført. Du kan sitje på kontoret den eine dagen og vere på synfaring den andre. Ja, du kan nyte den herlege naturen midt i arbeidstida. Og få betalt for det.

Det blir ledig eit embete som jordskiftedommar ved Vestre Innlandet jordskifterett, rettsstad Vågåmo. Tiltreding etter nærare avtale.

Arbeidsoppgåver

Dine viktigaste arbeidsoppgåver vil vere:

Planleggje for gjennomføring av tildelte saker på ein effektiv måte
Leie rettsmøter
Leie rettsmeklingar
Skrive avgjerder i eigne saker
Bidra til gode fagmiljø gjennom deling av kunnskap og erfaringar

Kven er du?

Krav vi stiller for å bli jordskiftedommar er:

Jordskiftefagleg utdanning på mastergradsnivå som fyller vedtatte kompetansekrav
Brei yrkes- og livserfaring er ønskjeleg, noko du vil få bruk for i dei mange ulike sakene du vil handtere og menneska du vil møte
God skriftleg og munnleg framstillingsevne er viktig, med eit språk alle kan forstå
Analytiske evner kjem godt med, sakene er komplekse og krev eit trent auge
Du må kunne jobbe sjølvstendig og evne å ta vanskelege avgjerder
Du må vere fleksibel, med 7 dømmande årsverk blir det til at ein må trø til litt ekstra ved behov

Du må vere norsk statsborgar. Det krevst utvida politiattest dersom du blir innstilt.

Kva tilbyr vi?

Forutan ein svært variert arbeidskvardag og eit viktig samfunnsoppdrag, kan vi tilby deg følgjande i denne stillinga:

Stort rom for fagleg utvikling, du vil jobbe i kjernen av utviklinga av jordskiftefaget
Eit omfattande introduksjonsprogram for nye dommarar
Årlege oppdaterings- og etterutdanningstilbod og moglegheit for éin månads studiepermisjon kvart fjerde år
Ein heilt fabelaktig natur i nærområdet, som du kan nyte både i jobben og på fritida
Gode pensjons-, forsikrings- og låneordningar i Statens pensjonskasse

Ved tilsetjing blir det tilbydd kr 1 016 000 jf. hovudtariffavtalen. Frå lønna blir det trekt 2 % innskot til Statens pensjonskasse. Skyss- og kostgodtgjersle etter Statens regulativ. Jordskifteretten har ei felles bilordning, og søkjaren må ha førarkort for bil.

Om oss

Domstolane er den tredje statsmakta. Noreg har 49 domstolar med om lag 2000 medarbeidarar. Landet er delt inn i 19 jordskifterettar med ca. 230 tilsette. Les meir om jordskifterettane her: https://www.domstol.no/no/jordskifterettene/.

Jordskifteretten er ein særdomstol som i hovudsak arbeider med omforming av eigedomar, organisere felles bruk av eigedomar, klargjering av rettsforhold, grenser til fast eigedom og ei rekkje skjønn.

Domstolane er avgjerande for at vi har eit trygt og godt samfunn basert på tillit. Tillit mellom menneske og myndigheiter, men også mellom deg og meg. Alle skal ha tillit til og respektere våre avgjerder, uavhengig av utfall. Hos oss kan kvar og ein få avgjort si sak, sett strek og kome seg vidare.

Med vår rolle følgjer eit stort ansvar. Våre avgjerder er uavhengige og upåverka av myndigheiter eller press frå andre miljø. Med komplekse, juridiske problemstillingar bruker vi tid på å dykke ned i jussen. Arbeidskvardagen er dessutan prega av variasjon. Éin dag er vi ute på synfaring eller fastset grenser, ein annan dag leier vi retten eller er på kontoret og skriv dom. Med andre ord trivst vi i både støvlar og sko.

Jordskifteretten er lokalisert på rettsstadane Lillehammer, Fagernes og Vågåmo. Kontorstad for stillinga vil vere ved rettsstaden Vågåmo. Dersom ein intern søkjar blir utnemnd, kan det bli eit ledig embete med anna kontorstad i rettskrinsen. Søkjarane blir derfor oppmoda til å opplyse om dommarambete ved anna kontorstad kan vere av interesse.

Det må påreknast å gjere teneste på alle rettsstadane i rettskrinsen. Domstolen har i dag til saman sju dømmande årsverk og ei samla bemanning på 18,1 årsverk.

Mangfald i Noregs domstolar

Det er viktig at dei tilsette i norske domstolar representerer eit godt mangfald med ulik bakgrunn og erfaring. Vi har i dag eit rikt og fleirkulturelt samfunn. Noregs domstolar ønskjer difor å rekruttere fleire dommarar som har fleirkulturell bakgrunn og erfaring. Dette vil gje domstolane viktig kunnskap i utføringa av samfunnsoppdraget.

Mangfald er ein styrke, og vi vil leggje til rette for tilsette med ulike behov. Les meir om moglegheita for positiv særbehandling på https://arbeidsgiver.dfo.no/positivsaerbehandling.

Informasjonskapsler på arbeidsplassen.no

Rapporter annonse