Gaskaboddosaš internašunaliserenkonsuleanta/- ráđđeaddi virgi

Rabas virgi oahppo- ja dutkanhálddahusas

Sámi allaskuvllas lea rabas gaskaboddosaš virgi internašunaliserenkonsuleantan/- ráđđeaddin
31.12.2026 radjái. Álgin lea farggamusat.

Virgi gullá oahppo- ja dutkanhálddahussii ja virgái leat biddjon iešheanalaš ja viiddis barggut ja earenoamáš ovddasvástádus oahpuid internašunaliseren doaimmaide.

Bargoviidodat virggis

Barggut leat earret eará:

• Koordineret olgoriikka studeanttaid vuostáiváldima ja sisaváldima.
• Bagadallat lonohallanstudeanttaid ja doaimmahit guoskevaš šiehtadusaid studeanttalonohallama oktavuođas
• Koordineret oahpuid internašunaliseren vuogádagaid, nugo ee. Erasmus+
• Eaŋgalasgielat neahttasiidduide doaimmahit dieđuid ohcciide.

• Doarjut fágagođiid internašunaliseren doaimmaid.
• Doarjut oahppohálddahusa rekrutterema ja eará beaivválaš bargguid nugo sisaváldin, studeantaáššiid meannudeapmi ja eará.
• Eará doaimmat maid lagamus hoavda bidjá.

Virggi ja ossodaga bargoviidodat ja ovddasvástádussuorggit sáhttet rievdat ásahusa dárbbuid mielde.

Gelbbolašvuođagáibádusat

• Virgái ohcat olbmo geas lea relevántta oahppu universitehta dahje allaskuvlla dásis unnimustá bachelorgráda.
• Lea ovdamunnin jus dovdá alitoahpu hálddahuslaš beliid.
• Virgái deattuhit dárkilvuođa, čorgatvuođa ja iešheanalašvuođa bargguid čađaheamis.

• Virgái gáibiduvvo buorre čálalaš ja njálmmálaš máhttu sámegielas, skandinávalaš gielas ja eaŋgalasgielas. Ruoššagiel máhttu lea ovdamunni.
• Persovnnalaš heivvolašvuohta virgái deattuhuvvo.

Bálká

Virgi bálkáhuvvo virgekodas konsuleanta 1408 ( 483 800 -620 000),  1434 ráđđeaddi (565 000 - 700 000) dahje 1364 seniorráđđeaddi (665 000 -820 000).
Bálká mearriduvvo ohcci oahpu ja bargohárjáneami vuođul

Formála lassigelbbolašvuohta sámegielas unnimustá 60 oahppočuoggá bachelordásis, addá 20 000,- lassibálkán vuođđobálkái vuosttašgeardde virgáibidjamis Sámi allaskuvllas.

Bálkkás gesso 2% geatnegahtton divat Stáda penšuvdnakássii.

Mii fállat

• Sámi- ja álgoálbmotvuođut oahppo- ja dutkanásahusa gos alla fágalaš mihtut
• Ođđaáigásaš visttiid 
• Máŋggabealat čálgofálaldagaid 
• Heivehahtti bargoáiggi
• Buori bargobirrasa mas alla gelbbolaš bargit iešguđetge fágasurggiin 
• Ealli sámegielbirrasa guovddáš sámi guovllus 

Ohcan

Ohcan sáddejuvvo elektrovnnalaččat www.jobbnorge.no bokte, oktan dáiguin dokumentašuvnnaiguin: 

• CVain 
• Bargo- ja oahppoduođaštusaiguin 
• Bivdit du maiddái almmuhit unnimusat guokte referánssa.

Jus lea váttisvuohta deavdit elektrovnnalaš CV:a, de sáhttá váldit oktavuođa Jobbnorge áššebálvalusain e-poasta: support@grade.no dahje riŋget: 75 54 22 20. 

Máŋggabealatvuohta ja searvadahttin

Sámi allaskuvla galgá nu bures go vejolaš speadjalastit álbmoga girjáivuođa ja mii ávžžuhit gelbbolaš kandidáhtaid ohcat virgái beroškeahttá sohkabealis, agis, doaibmannávccas dahje kultuvrralaš duogážis. 

Jus leat gelbbolaš ohccit geat leat doaimmashehttejuvvon, leat guhkit áiggi leamaš eret bargoeallimis, dahje geain lea sisafárrejeaddjiduogáš, de bovdet unnimusat ovtta ohcci guđege joavkkus jearahallamii. 

Ávžžuhit ohccit merket bargoportálas jus lea doaimmashehttejupmi, guhkit áiggi jávkan bargoeallimis, dahje lea sisafárrejeaddjiduogáš. 

Mearkumat bargoohcciportálas hábmejit vuođu anonymiserejuvvon statistihkkii maid buot stáhtalaš ásahusat raporterejit iežaset jahkeraporttain. 

Sámi allaskuvllas lea šiehtadus Ovttastahtti bargoeallima birra, ja deattuha bargodili láhčimis juohke mielbargái.

Oppalaččat

Virgáibidjan dahkko lágaid, šiehtadusaid ja njuolggadusaid ektui mat gustojit bargiide Norgga stáhtas ja allaskuvlasektoris. 

Fárrendoarjja máksojuvvo stáhta njuolggadusaid mielde. 

Finnmárkkus lea sierra ortnet geahpedit lohkanloana ja vearrogeahpádus. Fuomášuhttit ahte dieđut ohcciid birra sáhttet almmuhuvvot vaikko ohcci ieš lea bivdán čihkkot ohcciidlisttus. Ohcci oažžu dieđu dan birra ovdagihtii. 

Virggis lea 6 mánu geahččalanáigi.

Oktavuođadieđut

Eanet dieđuid virggi birra oažžu oahppo- ja dutkanhoavddas Áilá Márge Varsi Balto tlf. +4778448503/ +47 994 09 096, eboasta: ailamvb@samas.no