Avdelingsdirektør i kulturvernavdelinga

Om stillinga

Kultur- og likestillingsdepartementet (KUD) søkjer ein engasjert avdelingsdirektør til seksjonen som har ansvar for politikk- og forvaltningsutvikling innan arkiv, bibliotek, museum, visuell kunst, kulturbygg, byggjesaker, immateriell kulturarv og krigsgravtenesta. Seksjonen har òg ansvar for etatsstyring av Nasjonalarkivet, Nasjonalbiblioteket og KORO. Vidare forvaltar seksjonen tilskot til museumssektoren, tiltak innan visuell kunst og ei rekkje andre kulturføremål, mellom anna Nobels Fredssenter. 

Som avdelingsdirektør får du ei sentral rolle i arbeidet med å utvikle og gjennomføre regjeringa sin kulturpolitikk på fleire viktige fagområde, i tett samarbeid med politisk leiing, andre departement, underliggjande verksemder og aktørar i kultursektoren. Stillinga gir høve til å påverke utviklinga av sentrale kulturinstitusjonar og kulturpolitiske verkemiddel med stor samfunnsmessig betydning.

Arbeidsoppgåver

Som avdelingsdirektør vil du ha det overordna ansvaret for å leie og utvikle seksjonen. Du vil ha personalansvar, noko som inneber å motivere og utvikle medarbeidarane dine og sikre at seksjonen leverer høg kvalitet på oppgåvene sine. Avdelingsdirektøren er med i leiargruppa i avdelinga og rapporterer til ekspedisjonssjefen, som er øvste leiar i avdelinga.

Du vil mellom anna

• leie, organisere og følgje opp arbeidet i seksjonen 
• ha resultatansvar for seksjonen sine oppgåver
• ha personalansvar for dei tilsette i seksjonen 
• utvikle fagområda og medarbeidarane
• bidra aktivt i leiargruppa i avdelinga og til utvikling av heile avdelinga
• samarbeide med den politiske og administrative leiinga i departementet og bidra til å utforme og setje ut i livet regjeringa sin politikk på fagområda

Det er viktig at du er fleksibel og open for endringar i porteføljen, og at du kan samarbeide på tvers av seksjonar og avdelingar.

Kvalifikasjonar

Vi ser etter ein leiar som evnar å motivere og inspirere medarbeidarane sine, og som er ein god relasjonsbyggjar. Du må vere handlekraftig, kreativ og løysingsorientert, ha evne til analytisk og strategisk tenking og kunne utvikle fagområda seksjonen har ansvar for. Stillinga krev at du er administrativt ryddig og forstår rolla som leiar i eit departement. Det inneber òg at du har god forvaltningskompetanse og forstår politiske prosessar.

• høgare utdanning på mastergradnivå
• relevant erfaring frå offentleg verksemd, fortrinnsvis frå eit departement
• relevant leiarerfaring
• god forståing av forholdet mellom politikk og forvaltning, og av embetsrolla
• god munnleg og skriftleg formidlingsevne

Vi ser etter deg som 

• har gode leiareigenskapar
• har gode evner til å organisere arbeidet, delegere oppgåver og sørgje for framdrift og gode leveransar til rett tid 
• er initiativrik, utviklingsorientert og har god gjennomføringsevne
• skapar ein god samarbeidskultur i seksjonen og på tvers av organisasjonen 
• har godt humør og er ein lagspelar

Vi vil leggje vekt på om du er personleg eigna til stillinga og kva motivasjon du har for stillinga og arbeidsområdet.

Stillinga er eit embete, og du må difor vere norsk statsborgar for å bli tilsett. Den som blir tilsett i stillinga må kunna klarerast for tilgang til informasjon gradert HEMMELEG etter sikkerhetslova.

Vi brukar bakgrunnssjekk frå Semac i rekrutteringsprosessane våre, og godkjend bakgrunnssjekk er ein føresetnad for tilsetjinga. 

Arbeidsavtalen vil innehalde ein klausul om mogleg karantene og saksforbod ved overgang til ny stilling utanfor staten.

Vi tilbyr

Kultur - og likestillingsdepartementet har eit kunnskapsrikt og stimulerande arbeidsmiljø med engasjerte, kompetente og resultatorienterte medarbeidarar. Kvardagen er prega av varierte og utfordrande arbeidsoppgåver og eit hyggjeleg og uformelt arbeidsmiljø. Du vil få brukt kunnskapane dine i samarbeid med andre, og gjennom oppgåveløysing får du høve til å halde deg fagleg oppdatert. 

Vi held til i fine lokaler i nytt regjeringskvartal. Som tilsett hos oss har du fleksibel arbeidstid, høve til trening i arbeidstida, pensjonsordning og rett til å søkje bustadlån gjennom Statens pensjonskasse. Vi har òg eit eige introduksjonsprogram for nytilsette. 

Du vil bli innplassert som avdelingsdirektør i stillingskode 1218 med ei brutto årsløn frå 1 000 000 kroner til 1 270 000 kroner. For spesielt kvalifiserte søkjarar kan høgare løn vere aktuelt. 

Som leiar hos oss får du ansvar for spennande og fagleg utfordrande arbeids- og leiaroppgåver, og du får ei aktiv rolle i å leie og utvikle avdelinga. Du må vere fleksibel og kunne bidra i nye eller endra oppgåver.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen.

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du ha meir informasjon om stillinga, kan du ta kontakt med Erik Saglie på telefon +47 95 99 58 23. 

Om avdelinga og seksjonen

Kulturvernavdelinga består av to seksjonar og har ansvar for politikkområda arkiv, bibliotek, museum, visuell kunst, litteratur, språk, kulturbygg, immateriell kulturarv, inn- og utførsel av kulturgjenstandar, samiske saker og krigsgravtenesta. 

Ansvaret omfattar mellom anna styring av Nasjonalbiblioteket, Arkivverket, KORO (Kunst i offentlege rom), Restaureringsverksemda ved Nidaros domkyrkje og Språkrådet.