Vitskapleg assistent ved Senter for vitskapsteori (SVT)

UiB - Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

. Video: https://youtu.be/M5n6RnScNgA

Vitskapleg assistent ved Senter for vitskapsteori

Ved Senter for vitskapsteori (SVT) er det ledig ei mellombels 100 % stilling som vitskapeleg assistent i perioden 01.10.2025-01.09.2026 med moglegheit for forlenging. Stillinga er knytt til forskingsprosjektet BUTTERFLY som er koordinert av SVT.

SVT er eit tverrfakultært og tverrfagleg forskings- og undervisningssenter. SVT si kjerneverksemd er å tilby og utvikle relevante forskingsbaserte undervisingstilbod i vitskapsteori og etikk i ph.d.-programma ved UiB. SVT har òg koordineringsansvar for det tverrfaglege masterprogrammet i berekraft. Forskingsprofilen til SVT femner breitt, med fokus på kritisk refleksjon rundt tilhøvet mellom vitskap og samfunn. Ei lang rekke større, eksternfinansierte forskings- og samarbeidsprosjekt er forankra ved senteret. Les meir om senteret her: www.uib.no/svt

Om prosjektet/arbeidsoppgåver

Stillinga er knytt til det EU-finansierte forskingsprosjektet «Mainstreaming pollinator stewardship in view of cascading ecological, societal and economic impacts of pollinator decline (BUTTERFLY)». BUTTERFLY-prosjektet, finansiert av EU sitt Horizon Europe-program, har som mål å ta tak i nedgangen av pollinatorar og dei påfølgjande konsekvensane for økosystem, samfunn og økonomi. Det fokuserer på å integrere forvaltning av pollinatorar ved å utvikle og demonstrere innovative løysingar, særleg gjennom Living Labs, for å styrke kapasiteten til ulike sektorar til å respondere på nedgangen av pollinatorar.

For meir informasjon, sjå nettsida: Pollinatorar: Dei vesle skapningane som styrer verda | Senter for vitenskapsteori | UiB

Vi søker ein person som kan bidra inn i forskingsprosjektet. Oppgåvene vil vere varierte og utfordrande. Den som blir tilsett, må forvente å ha fleire oppgåver samstundes.

• Arbeidsstøtte for prosjektleiar og forskarar knytt til prosjektet.
• Litteraturgjennomgang
• Hjelpe til med å koordinere forskingsaktivitetar på tvers av fleire forskingsgrupper i Europa.
• Bistå med organisering og presentasjon av arbeid på workshops, vitskaplege møte og konferansar.
• Assistere med empirisk forsking.
• Forskingsassistanse. Arbeidet vil inkludere tekstbearbeiding, bibliografiske oppgåver, planlegging og arbeidsstøtte til faglege arrangement, assistanse ved empiriske undersøkingar m.m.
• Vedlikehalde og oppdatere prosjektets nettside i WordPress.
• Assistere med andre kommunikasjons- og formidlingsaktivitetar (inkludert nyheitsbrev).
• Andre oppgåver kan også bli aktuelle.

Kvalifikasjonar og eigenskapar:

• Søkjarar må ha mastergrad innan felt som inkluderer miljøsamfunnsvitskap og humaniora, med særleg fokus på tverrfaglegheit og tema rundt berekraft og styring.
• Erfaring med litteraturgjennomgang, inkludert systematiske søk i store litteraturdatabasar som WebOfScience.
• Det blir sett krav til svært gode språkkunnskapar i norsk og engelsk, munnleg og skriftleg.
• Det er ein føremon med relevant praksis og IT-kompetanse, som Microsoft Office (Word, Excel og MS-Forms), Zotero, NVivo, VosViewer og Bibliometrix, WordPress.
• Det er ein føremon med erfaring frå forsking på dei menneskelege dimensjonane av pollinator-tap.

I vurderinga av søknadene blir det lagt vekt på vitskaplege kvalifikasjonar. Det vert vidare lagt særleg vekt på søkaren sin evne til å både kunne arbeide sjølvstendig og i team, og som kan vise til gode initiativ-, organisasjons- og samarbeidsevner.

Vi tilbyr:

• Eit godt og fagleg utfordrande arbeidsmiljø.
• Løn som vitskapeleg assistent (1020) på 525 000 kr i full stilling før skatt. For særleg kvalifiserte søkjarer kan det bli aktuelt å vurdere høgare løn
• Medlemsskap i Statens pensjonskasse.
• Stilling i ei inkluderande arbeidslivsverksemd (IA-verksemd).
• Gode velferdsordningar

Slik søkjer du stillinga

Søknaden skal sendast elektronisk via lenkja «SØK STILLINGA» på denne sida. Søkjaren må
nytte det elektroniske CV-skjemaet.

• Ei kort utgreiing om søkjaren sine forskingsinteresser og motivasjonen for å søkje stillinga.
• CV.
• Karakterutskrift og vitnemål for bachelor- og mastergrad (skanna originalar eller stadfesta
  kopiar). Dersom omfanget på masteroppgåva ikkje er oppgitt i karakterutskrifta eller
  vitnemålet for mastergraden, må det leggjast ved stadfesting frå den gradgjevande
  institusjonen som spesifiserer oppgåva sitt omfang i ECTS.
• Relevante attestar.
• Kopi av masteroppgåve
• Liste over eventuelle faglege publikasjonar (publikasjonsliste).
• Eventuelle publikasjonar (inntil tre).
• Namn og kontaktinformasjon til to referansepersonar, ein av desse må vere
  hovudrettleiaren frå masteroppgåva eller tilsvarande oppgåve.

Søknad og vedlegg må vere på norsk, eit anna skandinavisk språk eller engelsk. Dokumentasjon på andre språk må følgjast av attestert omsetjing. Vedlegga kan vere i Word- eller PDF-format, og må lastast opp i Jobbnorge innan søknadsfristen.

Generell informasjon:

Utfyllande opplysningar om stillinga kan ein få ved å vende seg til:
Nilgun Kulan, Senter for vitskapsteori (SVT), nilgun.kulan@uib.no tlf 55 58 37 34 eller administrasjonssjef Tone Lund-Olsen på e-post Tone.Lund-Olsen@uib.no eller tlf. 55 58 33 12

Spørsmål om den elektroniske søknadsprosessen kan rettast til Det humanistiske fakultet på epost: fakadm@hf.uib.no

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Universitetet i Bergen nyttar meirinnsyn ved tilsetjing i vitskaplege stillingar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.

Nærare om tilsettingsprosessen her.