Prosjektstilling på ungdomsklubben - 20% i to år

Om stillinga

• Osterøy Ungdomsklubb er ein gratis, open og inkluderande møteplass for ungdommar i alderen 12-19 år. 
• Klubben er populær, og besøket på ein kveld kan variera mellom 30 og 60 ungdommar.

• Klubben held til på Kultursmia i Lonevåg, saman med bibliotek og utstyrssentral. 

   

   

• Osterøy kommune har fått tilskot til å vidareføra og utvikla ungdomsklubben på Osterøy. Som del av prosjektet skal klubben utvida til opning kvar veke. Me lyser derfor ut ei mellombels prosjektstilling i 20 % for ein periode på to år.
• Målet med prosjektet er å vidareutvikla ungdomsklubben i tråd med ungdomane sine behov og ønskje, styrkja ungdomsmedverknaden og leggja til rette for aktivitet og fellesskap. Stillinga inneber arbeid på ungdomsklubben kvar veke, samt deltaking i utviklingsarbeid. Stillinga inngår i eit team og har ikkje aleineansvar for tilbodet.

Arbeidsoppgåver

• delta i ordinær drift av ungdomsklubben
• bidra til å skapa ein trygg, inkluderande og attraktiv møteplass for ungdom
• planleggja og gjennomføra aktivitetar, arrangement og enkle verkstader saman med ungdomane
• leggja til rette for ungdomsmedverknad og bidra til at ungdom får påverka innhaldet i tilbodet
• bidra i utviklingsarbeid knytt til ungdomsklubben
• delta i arrangement og aktivitetar i Kultursmia ved behov

Arbeidstid:

• klubben har fast aktivitet kvar veke
• arbeid på ettermiddag og kveld må påreknast
• noko arbeid i helg kan bli aktuelt
• arbeidsstad og arbeidstid kan bli justerte etter behov.

Krav og forventingar

Kvalifikasjonar

• Det er ønskjeleg med fagbrev som barne- og ungdomsarbeidar, eller anna relevant utdanning. Relevant erfaring frå arbeid med ungdom kan kompensere for utdanningskravet.
• Du må kunne kommunisere godt på norsk.
• Du kan arbeida både sjølvstendig og saman med andre.
• Du må kunne vise godkjent politiattest før tilsetjing.

Personlege eigenskapar

Me ser etter deg som:

• er trygg, tydeleg og god til å byggja relasjonar
• er engasjert i ungdomsarbeid
• tek initiativ og bidreg til aktivitet og fellesskap
• er fleksibel og samarbeider godt med andre

Personlege eigenskapar vil bli vektlagde.

Om Kultursmia og ungdomsklubben

På Osterøy kultursmie i Lonevåg finn du bibliotek, utstyrssentral og ungdomsklubb. Me er eit hus i full utvikling, med stort spenn i kompetanse og oppgåver. 

Dette er ein arbeidsplass for deg som vil få ting til å skje og som likar å treffe nye menneske kvar dag, til samvær, service og samskaping.

Om ungdomsklubben

Ungdomsklubben er ein lågterskel møteplass der ungdom kan møtast utan krav om deltaking i faste aktivitetar. På klubben blir det servert gratis måltid, og ungdomane kan mellom anna delta i dataspel, brettspel, bordtennis, kreative aktivitetar og sosiale arrangement. Klubben skal vidareutviklast i tett dialog med ungdomane.

Video: https://youtu.be/5TIhcmaLglY