Overingeniør

Kunnskap som formar samfunnet

UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.

Video: https://youtu.be/M5n6RnScNgA

Overingeniør 

Ved Institutt for geovitskap er det ledig ei fast stilling som overingeniør innan stabil-isotopgeokjemi. Stillinga er knytt til «Fasilitet for avansert isotopforsking og overvaking av vær, klima og biogeokjemiske syklusar» (FARLAB). 

Arbeidsoppgåver:

Stillinga inngår i ei teknisk gruppe (laboratoriegruppa) som støtter opp under forskinga ved instituttet. Arbeidet omfattar hovudsakleg analysar og dagleg oppfylging av instrument. Kandidaten vil preparere prøvar, utføre isotopanalysar på ulike instrument, samt bidra til datahandtering og kvalitetskontroll. I tillegg vil kandidaten vere ansvarleg for forbruksmateriell, rutinar, protokollar og prosedyrar i prepareringslaboratoriet. Kandidaten vil også ha ansvar for opplæring og oppfølging av brukarar på preparasjonslaboratoriet, og etter kvart i bruk av måleinstrumenta. Aktiv deltaking i feilsøking og vidareutvikling av eksisterande metodar og protokollar er ønskeleg. 

Hovuddelen av arbeidet vil være innan marin geologi, paleo-oseanografi, fysisk/kjemisk oseanografi og meteorologi, men analysar i petroleumsgeologiske, geodynamiske og geobiologiske studiar vil òg utførast. Den som vert tilsett vil også kunne delta i andre tekniske oppgåver. 

Kvalifikasjonar og eigenskapar:

• Oppnådd mastergrad i geovitskap/biologi/meteorologi/oseanografi eller eit liknande fagområde er eit krav. 
• Betydeleg erfaring med eksperimentelt og analytisk arbeid er eit krav.
• Førstehandserfaring med målingar av stabile lette isotopar (O, C, N, eller S) på massespektrometer er eit krav.
• Tidlegare erfaring med prøvepreparering av vatnprøvar, gassprøvar og/eller geologiske prøvar for isotopanalyse er eit krav. 
• Erfaring med isotopmålingar gjennom ”cavity ring-down” spektroskopi er ein føremon. 
• Erfaring med handtering av små prøvar (f. eks. mikroskopering, veging) er ein føremon.
• Utmerkte ferdigheiter i teknisk problemløysing er ein føremon.
• Søkjarar må ha god organisasjonsevne og kommunisere godt med leiarar og brukarar av laboratoriet.
• Søkjarar må kunne arbeide sjølvstendig, vere strukturert og ha gode samarbeidsevner. Fleksibilitet, evne til problemløysing, og til å setje seg inn i ny instrumentering og utvikle og bruke denne i samarbeid med vitskapeleg stab, vil vere sentralt.
• Søkjarar må ha gode engelskkunnskapar, skriftleg og munnleg.

Vi kan tilby:

• eit godt og fagleg utfordrande arbeidsmiljø. 
• Stilling som overingeniør (kode 1087) i årsløn kr. 615 000 – 660 000 det statlege lønsregulativet, avhengig av tenesteansiennitet og kvalifikasjonar. For særleg kvalifiserte søkjarar kan det vere aktuelt å vurdere høgare løn. 
• medlemsskap i Statens pensjonskasse
• gode velferdsordningar

Generell informasjon:

Utfyllande opplysningar om stillinga kan ein få ved å vende seg til: 

Professor Ulysses Ninnemann (vitskapeleg ansvarleg for FARLAB) tlf. +47 55583521, e-post ulysses.ninnemann@uib.no eller senioringeniør Olav Audun Bjørkelund (leiar for laboratoriegruppa), tlf. +47 41667033, e-post olav.bjorkelund@uib.no.

For HR-relaterte spørsmål kan du kontakte rådgjevar Mathilde Høgalmen, e-post mathilde.hogalmen@uib.no. 

 

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder. 

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.  

 Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.  

Nærare om tilsettingsprosessen her.