Førstekonsulent (jurist)

Om stillinga og arbeidsstaden

Vi søkjer etter ein dyktig jurist til ei fast stilling som førstekonsulent i avdelinga vår for internasjonal rett. Det er ønskjeleg med snarleg tiltreding.

Bufdir har ei sentral rolle i arbeidet med fleire internasjonale konvensjonar, og avdelinga arbeider både med konkrete saker og juridiske problemstillingar i skjeringspunktet mellom nasjonal og internasjonal rett.

Du vil først og fremst arbeide med handtering av konkrete saker på tvers av landegrenser og juridiske vurderingar knytte til internasjonal rett. Vi bistår i og handterer internasjonale barnebortføringssaker, barnevernssaker på tvers av landegrenser, barnelovsaker på tvers av landegrenser og saker der barn blir etterlatne i utlandet. Arbeidet gir deg ein spennande og utfordrande arbeidskvardag der du mellom anna får samarbeide direkte med ei rekkje utanlandske styresmakter, i tillegg til ulike norske styresmakter som Utanriksdepartementet, Kripos og kommunale barneverntenester. Du vil òg bistå privatpersonar som treng hjelpa vår.

Du må vere innstilt på ein jobb med jamt høgt arbeidstempo, og du må vere motivert for å kunne få arbeidsoppgåver innan alle områda vi arbeider med. Hos oss får du dyktige og engasjerte kollegaer. Vi gler oss til å ta imot deg!

Kva bakgrunn har du?

• Du må ha juridisk embetseksamen eller master i rettsvitskap med gode resultat.
• Det blir stilt krav om god kunnskap om forvaltningsrett og god rolleforståing.
• kunnskap om internasjonal privatrett eller andre særleg relevante rettsområde vil vere ein fordel.
• Det blir kravd svært gode skriftlege og munnlege framstillingsevner, både på norsk og engelsk. Det er sentralt at du er komfortabel med å bruke engelsk som arbeidsspråk, og at du meistrar dette godt. Kan du òg andre språk, er det ein fordel.

Personlege eigenskapar

For å lukkast i denne rolla må du ha evne til å handtere juridiske problemstillingar med både grundigheit og heilskapsforståing.
Vi ser i tillegg etter deg som:

• har stor arbeidskapasitet og meistrar å handtere eit jamt høgt arbeidspress og korte tidsfristar med fleksibilitet og ro
• arbeider godt på eige initiativ, men forstår når du må involvere andre i oppgåveløysinga
• er god til å planleggje gjennomføringa av eigne arbeidsoppgåver
• kan analysere komplekse faglege problemstillingar og utarbeide gode avgjerdsgrunnlag
• kommuniserer godt, tydeleg og tillitvekkjande med andre
• opptrer profesjonelt samstundes som du viser empati i dialog med personar som står i ein vanskeleg livssituasjon
• har gode samarbeidsevner og er medviten om eige bidrag til ein god kultur på arbeidsplassen
• deltek i faglege diskusjonar og deler kunnskap og erfaringar

For oss er det svært viktig korleis du som person eignar deg for stillinga. Dette vil bli teke med i den samla vurderinga.

Hos oss ønskjer vi ein kultur der vi bistår kvarandre på tvers av oppgåver og ansvarsområde når det er nødvendig. Det er derfor ein føresetnad at du både er innstilt på og motivert for å bidra til handtering av andre oppgåver i divisjonen eller elles i organisasjonen ved behov.

Kva får du hos oss?

Du vil bli ein del av ei avdeling med hyggelege, engasjerte og fagleg dyktige kollegaer, og få eit meiningsfullt arbeid for deg som ønskjer å vere med og jobbe for det viktige samfunnsoppdraget vårt, med varierte arbeidsoppgåver.

Stillinga er plassert i det statlege lønnsregulativet i stillingskode 1408 førstekonsulent, med ei lønnsramme på kr 550 000–600 000 per år. Stillingskode og lønn blir fastsette etter ei samla vurdering av kvalifikasjonar og erfaring. For særleg kvalifiserte søkjarar kan høgare lønn vurderast.

Du får òg medlemskap i Statens pensjonskasse, jf. lov om Statens pensjonskasse. Dette inneber ei god tenestepensjonsordning, høve til å få tilbod om bustadlån på konkurransedyktige vilkår, samt yrkesskade- og gruppelivsforsikring.

I tillegg får du alle godane ved å vere tilsett i staten. Det vil mellom anna seie fleksitid, sommartid og høve til trening i arbeidstida i inntil éin time per veke.

Opplysningar til deg som søkjar

• Vi søkjer etter dei beste hovuda uavhengig av kulturell bakgrunn, alder, hol i CV eller funksjonsevne, og oppmodar alle kvalifiserte kandidatar til å søkje jobb hos oss.
• Du kan be om å ikkje bli oppført på den offentlege søkjarlista. Dette må i så fall grunngivast. Vi kontaktar deg dersom ønsket ditt ikkje blir teke til følgje.
• Prøvetid i samsvar med Statens personalhandbok.
• Opplever du tekniske utfordringar når du fyller ut søknaden, tilrår vi at du tek kontakt med teknisk support hos Grade Jobbnorge.