Tolletaten har ei viktig rolle som samfunnsbeskyttar, og samfunnsoppdraget vårt er å sikre etterleving av lover og reglar for grensekryssande vareførsel. I tråd med verksemdsstrategien til etaten skal digital dialog og tidleg informasjonsinnhenting gi rask, effektiv og korrekt handtering av varestraumane. Brei og målretta verkemiddelbruk skal bidra til auka etterleving før, under og etter grensepassering.    
Vareførselsdivisjonen (VD) skal leggje til rette for korrekt og effektiv inn- og utførsel av varer for både næringslivet og privatpersonar og er etablert med hovudkontor i Bergen. Divisjonen står framfor mange utviklingsoppdrag, og vi er i gang med fleire endrings- og utviklingsprosjekt. 

Oppfølgingsavdelinga består av sju seksjonar (lokaliserte i Oslo, Drammen, Bergen, Kongsvinger og Tromsø) og har nasjonalt fagansvar for kontroll med inn- og utførsel av varer for næringsliv og privatpersonar.

Tolletaten er inne i ei tid med store og spennande endringar knytte til deklarasjonsbehandlinga. Vi søkjer etter ein koordinator for deklarasjonsbehandlinga i oppfølgingsavdelinga og vil gjerne høyre frå deg som blir motivert av å bidra til best mogleg samarbeid og effektiv bruk av ressursane på området. Den som blir tilsett, vil få ei sentral rolle i vidareutviklinga av fagområdet. Ei viktig oppgåve er å bidra til eit godt samarbeid med einingar internt i etaten og med eksterne samarbeidspartnarar der det er relevant.

Stillinga rapporterer til avdelingsdirektøren i oppfølgingsavdelinga.

Sentrale arbeidsoppgåver:

• Koordinere innsatsen til avdelinga på fagområdet deklarasjonsbehandling i samarbeid med leiargruppa
• Vere sentral i utviklinga og dokumentasjonen av arbeidsmetodikken på fagområdet for å sikre effektiv ressursutnytting og leggje til rette for gode arbeidsprosessar
• Vere ein sentral representant i samarbeidet med etterretningsdivisjonen når det gjeld utvikling av objektutveljing på området
• Utarbeide grunnlag for rapportering på området
• Vere vareførselsdivisjonens kontaktpunkt mot etterretningsdivisjonen for fagområdet og delta i arbeidet med å utarbeide beskrivingar av behov for etterretnings- og analysestøtte
• Delta i arbeidet med mottak og vurdering av etterretnings- og analyseprodukt for formålstenleg verkemiddelbruk i vareførselsdivisjonen
• Leie og/eller delta i prosjekt- og utviklingsarbeid

I periodar kan det vere aktuelt med undervisnings- og foredragsoppgåver, og du må rekne med noko reiseaktivitet.

Kvalifikasjonskrav:

• Fullført mastergrad innanfor relevant fagområde. Bachelor innanfor relevant fagområde kombinert med meget god realkompetanse eller bestått fordypningsnivå på Tolletatens kompetansesenter  kombinert med svært god realkompetanse kan erstatte kravet om mastergrad
• Relevant erfaring med å leie og delta i prosjekt- og utviklingsarbeid
• Relevant arbeidserfaring

Vi legg stor vekt på relevant arbeidserfaring og personlege eigenskapar. 

Det er ønskjeleg med

• Erfaring med tverrfagleg samarbeid og koordinering av oppgåver på tvers av einingar
• Erfaring med kontrollarbeid frå offentleg verksemd

• Er nytenkjande og initiativrik, og som blir motivert av å bidra til at oppgåver blir løyste på ein best mogleg måte, med god og effektiv ressursforvalting
• Er analytisk og har evne til å setje deg raskt inn i nye problemstillingar og til å tenkje heilskapleg
• Leverer med jamt høg kvalitet innanfor gitte tidsfristar og rammer
• Er sjølvstendig, men òg fungerer godt i team
• Er fleksibel og viser vilje til å ta på deg nye utfordringar og oppgåver
• Ønskjer å bidra til eit positivt arbeidsmiljø

• Ei viktig rolle i utviklinga av fagområdet
• Eit positivt arbeidsmiljø med engasjerte kollegaer og samarbeid på tvers av einingar
• Fagleg samarbeid både internt og med andre offentlege myndigheiter
• Lønn som rådgivar, førstetollinspektør eller seniorrådgivar, avhengig av bakgrunn og kvalifikasjonar, lønnsspenn frå 600 000–700 000 kroner (for spesielt kvalifiserte søkjarar kan høgare lønn vurderast)
• Pensjons-, forsikrings- og låneordningar i Statens pensjonskasse
• Fleksibel arbeidstidsordning og høve til å bruke ein time i veka til aktivitet og bevegelse i arbeidstida
• Arbeidsstad Bergen – i særskilde tilfelle kan ein annan arbeidsstad der oppfølgingsavdelinga er lokalisert, vurderast.

Du må kunne sikkerheitsklarerast for «hemmeleg» og levere uttømmande politiattest ved tilbod om tilsetjing.

Meir informasjon om stillinga får du ved å kontakte avdelingsdirektør Åge Skår på tlf. 976 99 792.  

Til deg som søker jobb i Tolletaten
Vi nyttar Semac bakgrunnssjekk i samband med våre tilsetjingar.
Du må fylle ut felta «Utdanning» og «Arbeidserfaring» og laste opp relevante vitnemål og eventuelle attestar.
I Tolletaten meiner vi at mangfald og inkludering er ei styrke, og vi har nulltoleranse for trakassering og diskriminering. Vi er avhengige av medarbeidarar med ulik bakgrunn, kompetanse og erfaringar for å løyse vårt samfunnsoppdrag. Dersom du har hol i CV-en, funksjonsnedsetting eller innvandrarbakgrunn, oppmodar vi deg til å krysse av for dette då du kan ha rett til positiv særbehandling. Les meir om dette på arbeidsgivarportalen.