Rådgjevar

Om stillinga

Kultur- og likestillingsdepartementet (KUD) søkjer ein rådgjevar til fast stilling i seksjonen for musikk- og scenekunstfeltet og kunstnarpolitikken. Seksjonen er plassert i medie- og kunstavdelinga i KUD.

KUD er eit relativt lite departement med stor offentleg merksemd rundt sakene vi arbeider med. Hos oss får du ein variert og dynamisk arbeidskvardag med høg aktualitet og tett kontakt med både politiske prosessar og kultursektoren. Som rådgjevar blir du ein viktig del av eit tverrfagleg fagmiljø med engasjerte og kompetente kollegaer.

Arbeidsoppgåver

Vi søkjer deg som vil arbeide med eit breitt spekter av oppgåver på musikk og scenekunstområdet og kunstnarpolitikken. Stillinga inneber å utarbeide grunnlag for avgjerder og å gje faglege råd til den politiske leiinga, samt å bidra i løpande forvaltnings- og utviklingsarbeid på feltet. Dette omfattar mellom anna:

• utarbeiding av saksgrunnlag, notat, analysar og faglege råd til politisk leiing
• tilskotsforvaltning og behandling av søknader 
• bidrag til meldings- og strategiarbeid, utgreiingar og utkast til talar 
• saksbehandling, enkelthenvendelser og vurdering av møteførespurnader
• oppgåver innan eigarforvaltning og etatsstyring
• dialog og samarbeid med underliggjande etatar og aktørar i kultursektoren

Du vil òg kunne få oppgåver for andre seksjonar i avdelinga og i KUD.

Kvalifikasjonar

Du må ha:

• fullført mastergrad, gjerne innan samfunnsvitskap eller økonomi
• minimum to års relevant arbeidserfaring
• god forståing av samanhengen mellom politikk og forvaltning 
• god evne til å uttrykkje deg klart og presist på norsk, både skriftleg og munnleg

Det er ein fordel om du har

• erfaring frå offentleg forvalting, gjerne frå eit departement
• kunnskap om kultursektoren 

Personlege eigenskapar:

Vi ser etter deg som:

• er positiv og tek initiativ
• samarbeider godt og gjerne deltar i faglege diskusjonar
• er analytisk, samfunnsorientert og løysingsorientert
• arbeider sjølvstendig
• er fleksibel og effektiv i arbeidsutføringa

Vi vil leggje vekt på om du er personleg eigna til stillinga og kva motivasjon du har for stillinga og arbeidsområdet.

Vi bruker bakgrunnssjekk frå Semac i rekrutteringsprosessane våre. Godkjend bakgrunnssjekk er ein føresetnad for tilsetjinga.

Den som blir tilsett i stillinga, må kunne autoriserast for tilgang til informasjon som er gradert som BEGRENSET etter sikkerhetsloven.

Vi tilbyr

• innplassering som rådgjevar med ei brutto årslønn frå 600 000 til 710 000 kroner 
• fleksibel arbeidstid, med sommar- og vintertid
• høve til å trene i arbeidstida, tilgang til treningsrom og treningstilbod
• medlemskap i Statens pensjonskasse (SPK) med gode vilkår for pensjon, bustadlån og forsikring
• introduksjonsprogram for nytilsette og gode høve til kompetanseutvikling gjennom KUD-skolen og Departementsakademiet
• eit kunnskapsrikt, inkluderande og uformelt arbeidsmiljø

Vi held til midt i Oslo sentrum og skal våren 2026 flytte inn i det nye Regjeringskvartalet.

Kvardagen i departementsfellesskapet er prega av varierte og utfordrande arbeidsoppgåver. Vi har eit omfattande og viktig samfunnsoppdrag, og hos oss får du høve til å vere med på å utvikle den statlege politikken og forvaltninga av våre politikkområde.

Kultur- og likestillingsdepartementet er del av eit departementsfellesskap som er miljøsertifisert, og vi jobbar aktivt og systematisk med berekraftsansvaret i sektorane våre.

Inkluderande arbeidsliv og mangfald

Vi meiner at mangfald er ein styrke. Vi ønskjer medarbeidarar med ulik kompetanse og livserfaring og ulike fagkombinasjonar og perspektiv slik at vi kan løyse oppgåvene våre endå betre.

Kultur- og likestillingsdepartementet har som mål å tilsetje fleire personar frå underrepresenterte grupper. Les meir om krava for positiv særbehandling på Arbeidsgiverportalen.

Vi vil leggje til rette for medarbeidarar som har særskilde behov. Aktuelle tiltak kan til dømes vere å skaffe tekniske hjelpemiddel, tilpasse møblar eller endre rutinar, arbeidsoppgåver og arbeidstid.

Offentleg søkarliste og kontakt

Dei som søker, må vere merksame på at opplysningar om dei kan bli offentleggjorde sjølv om søkarane ber om ikkje å bli oppførte på den offentlege søkarlista. Departementet vil svare på krav om unntak frå den offentlege søkarlista før ho blir offentleggjord.

Vil du vite meir om stillinga, kan du ta kontakt med Martin Schjerven på telefon +47 22 24 80 17.

Om avdelinga og seksjonen

Seksjonen har ansvar for musikk, scenekunst og kunstnarpolitikk og for oppfølging av regionreformen på kulturområdet. Seksjonen har òg ansvar for etatsstyringa av Kulturdirektoratet og Riksteatret og eigarstyring av Den Norske Opera & Ballett AS, Nationaltheatret AS, Den Nationale Scene AS, Trøndelag teater AS, Rogaland Teater AS, Carte Blanche AS og Talent Norge AS.

Medie- og kunstavdelinga har ansvar for utvikling av den nasjonale politikken innanfor felta ytringsfridom, medium, pengespel, stiftingar, opphavsrett, kulturell og kreativ næring, film, dataspel, musikk, scenekunst og kunstnarpolitikk. Avdelinga forvaltar lover og regelverk innanfor dei nemnde felta, og løyvingar og tilskot til statlege og ikkje-statlege organ og institusjonar på området.