Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

. Video: https://www.youtube.com/watch?v=vtJLmcUJ3-w

PROFESSOR ELLER FØRSTEAMANUENSIS I MEDISINSK KUNSTIG INTELLIGENS

Ved Det medisinske fakultet er det ledig ei fast stilling (100 %) som professor eller førsteamanuensis i fagområdet medisinsk kunstig intelligens (KI) ved Institutt for biomedisin.

Personen vi søkjer er i ein aktiv fase av karrieren, og har fagleg tyngde innanfor KI og medisinsk eller helsefagleg forsking. Vi søkjer ein medarbeidar som saman med tilsette ved instituttet og resten av fakultetet vil bidra til framifrå forsking og undervising.

Det medisinske fakultet har nyleg oppretta eit senter for medisinsk KI. Senteret er oppretta i samarbeid med fleire andre institusjonar i Bergensområdet. I stillinga som no lysast ut inngår å verke som leiar av dette senteret.

Forskinga på Institutt for biomedisin er sentrert rundt grunnleggjande spørsmål innan humanmedisin og biomedisin. Dei viktigaste fokusområda inkluderer kreftforsking, nevrovitskap, legemiddelutvikling, metabolisme, proteomikk og strukturbiologi. Undervisinga ved instituttet er i hovudsak retta mot legestudiet og tannlegestudiet, og mot masterprogram i biomedisin.

Arbeidsoppgåver/forskingsområde:

Den som vert tilsett skal leie og initiere forskingsprosjekt, undervise og rettleie studentar og stipendiatar, i tillegg ta på seg administrative oppgåver etter rettleiande tidsmessige rammer. Det vert forventa at den tilsette regelmessig sender søknadar tilrelevante nasjonale og internasjonale kjelder for forskingsfinansiering.

Undervisingsplikta i stillinga er i utgangspunktet knytt til Institutt for biomedisin, men den tilsette pliktar å undervise i høve til dei undervisingsbehova fakultetet/instituttet til ei kvar tid har.

Det vert venta høge ambisjonar og god kvalitet med omsyn til forsking og undervisning, samt aktiv deltaking i instituttet og fakultetet sitt strategiarbeid ogfaglege aktivitetar.

Som leiar av senteret for medisinsk kunstig intelligens, skal den som blir tilsett mellom anna utforme og implementere strategiar for senteret, koordinere aktivitetar mellom ulike samarbeidspartnarar og andre relevante aktørar, etablere og styrke nettverk med relevante nasjonale og internasjonale forskingsmiljø, og promotere senteret sitt arbeid gjennom publikasjonar, konferansar og samhandling med samfunnet.

Arbeidsstaden er til dagleg i instituttets eller fakultetets lokalar.

Kvalifikasjonar og eigenskapar:

Kvalifiserte søkjarar har norsk doktorgrad i eit relevant fagfelt, eller tilsvarande kompetanse og fyller krav til utdanningsfagleg kompetanse (sjå under).

Den ideelle kandidaten publiserer på høgt internasjonalt nivå, kan vise til søknader og tilslag frå nasjonale og internasjonale finansieringskjelder for forsking og utdanningsarbeid, og har erfaring med å leie andre forskarar.

Resultat oppnådd dei siste 5-7 år vil bli særleg vektlagt ved bedømminga.

Den ideelle kandidaten har også erfaring med undervisning på bachelor- og masternivå eller i profesjonsutdanningar, og frå rettleiing av ph.d.-kandidatar.

Erfaring frå ulike nasjonale og internasjonale forskingsinstitusjonar, og evne til å etablere internasjonale nettverk vil telje positivt ved bedømminga, og det same gjer også erfaring av og interesse for innovasjon.

Personlege eigenskapar blir vektlagd ved vurderinga.

Utdanningsfagleg kompetanse er eit krav for stillinga, sjå retningsliner for oppretting av ei pedagogisk mappe på Eining for læring. Dersom søkjaren ikkje kan dokumentere slik kompetanse ved tilsetjing, må vedkomande skaffe seg dette innan to år. Søkjar vil få tilbod om opplæring dersom kravet ikkje er oppfylt før tilsetjing.

Undervisningsspråket er i hovudsak norsk. Det blir kravd at den som blir tilsett har ferdigheiter i norsk eller eit anna skandinavisk språk på nivå B2 innan tre år etter tilsetjinga. UiB tilbyr norskopplæring og vil legge til rette for at språkkravet kan stettast.

Vi tilbyr:

Eit godt og internasjonalt arbeidsmiljø og spanande arbeidsoppgåver i eit fakultet med fagmiljø som hevdar seg godt nasjonalt og internasjonalt
Faglege utfordringar med gode høve for personleg utvikling og kompetanseutvikling
Professor:
Løn er for tida kr 919 200 (kode 1013), eller løn for spesialist kr 942 700 (kode 1013). Løn er brutto pr. år for ei fulltidsstilling i lønsregulativet til staten ved tilsetjing. For særleg kvalifisert søkjar kan det verte aktuelt å vurdere høgare løn.
Førsteamanuensis:
Løn er for tida kr 720 100 – 745 000 (kode 1011), eller løn for spesialist kr 745 000 – 777 900 (kode 1011). Løn er brutto pr. år for ei fulltidsstilling i lønsregulativet til staten ved tilsetjing. For særleg kvalifisert søkjar kan det verte aktuelt å vurdere høgare løn.
Gode velferdsordningar

Søknaden skal innehalde:

Søknadsbrev som fortel kvifor du søkjer stillinga
Utfyllande CV samt relevante vitnemål og attestar
Plan for eiga forsking dei neste fem åra (maks 5 A4-sider)
Fullstendig publikasjonsliste
Pedagogisk mappe
Ei liste over vitskaplege arbeid du vil det skal takast omsyn til ved vurderinga (høgst 10 for førsteamanuensis, høgst 15 for professor). For kvart arbeid skal det følgje med eit kort samandrag som omtalar dei viktigaste funna i arbeidet
Dei vitskaplege arbeida frå punktet over i pdf-format
Namn og kontaktinformasjon til minst to referansar
Det er særs viktig at kvart av dei vitskaplege arbeida som det skal takast omsyn til ved vurderinga i sin heilskap vert lasta opp som vedlegg til søknaden.

Søknad og vedlegg med attesterte omsetjingar til engelsk eller eit skandinavisk språk må lastast opp i Jobbnorge.

Generell informasjon:

Utfyllande opplysningar om stillinga kan ein få ved å kontakte Dekan Per Bakke.

Universitetet i Bergen er underlagt regelverket for eksportkontroll og regelverket gjeld ved behandling av søknader til stillinga.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Universitetet i Bergen nyttar meirinnsyn ved tilsetjing i vitskaplege stillingar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju. Nærare om tilsettingsprosessen her.

Informasjonskapsler på arbeidsplassen.no

Rapporter annonse