Er du vår nye samfunnsøkonom/samfunnsvitar?

Om stillingane

Ønsker du deg interessante og utfordrande oppgåver innanfor eit fagområde med høg politisk merksemd? Vi har ledig ei fast stilling og eit vikariat i seksjon for budsjett og busetting i Integreringsavdelinga som førstekonsulent eller rådgivar.

Avdelinga har ansvar for å utvikle og samordne regjeringa sin integreringspolitikk. Du vil få spennande arbeidsoppgåver i skjeringspunktet mellom fag og politikk. Arbeidet involverer samhandling med mange aktørar og blir gjort i nær dialog med den administrative og politiske leiinga i departementet.

Arbeidsoppgåver

Seksjonen har mellom anna ansvar for regjeringa sin politikk for busetting av flyktningar, oppfølging av frivillige organisasjonar på integreringsfeltet og avdelinga sitt arbeid med statsbudsjettet. Du vil arbeide med utgreiing av aktuelle forslag, budsjettinnspel til regjeringa og dagsaktuelle saker innan seksjonens ansvarsområde. Vi arbeider ofte med korte tidsfristar. Du må kunne bruke fagbakgrunnen din til å sette deg raskt inn i komplekse saker, og kunne vurdere og presentere desse klart og kortfatta. Arbeidsoppgåvene omfattar mellom anna å

• gi faglege råd og innspel i politiske, økonomiske og administrative prosessar
• medverke til kunnskapsutvikling, greie ut om faglege spørsmål og utforme verkemiddel
• medverke i koordineringa av arbeidet med statsbudsjettet og tilskotsordningar, i tett dialog med mellom anna Integrerings- og mangfaldsdirektoratet

Avdelinga opplever ofte store svingningar i arbeidsmengde, og er oppteken av å bruke ressursar på tvers. Andre arbeidsoppgåver innanfor avdelinga sitt ansvarsområde vil òg bli aktuelt, avhengig av avdelinga sine behov og personlege ønsker og kvalifikasjonar. 

Ei av stillingane vil bidra i arbeidet med oppfølging av frivillige organisasjonar.

Kva slags bakgrunn har du?

Du må ha relevant høgare utdanning på masternivå med gode resultat, fortrinnsvis innan samfunnsøkonomi eller annan samfunnsvitskapleg utdanning.

Det er i tillegg ein fordel om du har

• erfaring frå utviklings- og utgreiingsarbeid, gjerne frå ei statleg verksemd.
• erfaring med samfunnsøkonomiske analysar eller frå statleg budsjettarbeid

Kven ser vi etter?

Vi ser etter deg som

• har interesse for samfunnsspørsmål og integreringspolitikk
• har evne til å ta initiativ og arbeide sjølvstendig, strukturert og planmessig med god gjennomføringsevne
• er imøtekommande og god til å samarbeide
• kan tenke kritisk og kreativt og argumentere godt for faglege vurderingar både munnleg og skriftleg
• evner å handtere korte fristar
• er komfortabel med å jobbe med tall og statistikk og å finne fram til relevante data

Som medarbeidarar i departementet er vi fagleg engasjerte, tar ansvar, er gode lagspelarar og utvikler og forbetrer.

Kva får du hos oss?

• Du blir ein del av eit sterkt fagmiljø med engasjerte og hyggelege kollegaar. Vi legg vekt på å gje ansvar og tillit, men òg rettleiing i eit godt arbeidsfellesskap.
• Du vil få nærleik til politiske avgjerder.
• Om du blir tilsett som førstekonsulent eller rådgivar, avheng av kvalifikasjonane dine og erfaringa di. For å bli tilsett som rådgivar må du ha relevant erfaring.
• Lønn vil ligge mellom 580 000 og 720 000 kroner  avhengig av kvalifikasjonane dine. Er du særleg godt kvalifisert til stillinga, kan vi vurdere høgare lønn.
• Som tilsett i staten får du mellom anna fleksitid, sommartid og pensjons- og forsikringsordning  gjennom Statens pensjonskasse som òg har eit av dei rimelegaste bustadlåna i marknaden. 
• Du får også høve til å trene i arbeidstida

Les dette før du søker

•  Inkludering og mangfald er ein styrke som gjer at vi kan løyse oppgåvene våre enda betre. Derfor ønsker vi oss medarbeidarar med ulike kompetansar, fagkombinasjonar, livserfaringar og perspektiv. Har du nedsett funksjonsevne, hol i CV-en eller innvandrarbakgrunn, oppfordrar vi deg som søkar til å krysse av i jobbsøkarportalen. Er det kvalifiserte søkarar, kallar vi inn minst éin søkar i kvar gruppe til intervju, og får du jobben, legg vi til rette for deg om du treng det. Utanom å velje ut riktige kandidatar brukar vi ikkje avkryssingane til noko anna enn anonymisert statistikk.
• Du kan be om å bli unnateken frå den offentlege søkarlista. Dette må i så fall grunngjevast. Vi kontaktar deg dersom ønsket ditt ikkje blir tatt til følge.
• Arbeidsspråket er norsk.

• Alle søkarar må laste opp vitnemål og attestar. Vi ber om at du bruker vitnemålsportalen til å laste opp vitnemål.
• For å bli tilsett må du kunne bli autorisert for behandling av informasjon gradert AVGRENSA etter tryggingslova.
• Vi bruker Semac bakgrunnssjekk i utvalde rekrutteringsprosessar.