Driftsingeniør IT Ny-Ålesund 80%

Spennande stilling som ingeniør i Arktis!

Vi har ledig ei 80 % åremålsstilling som ingeniør ved Sverdrup i Ny-Ålesund for ein periode på tre år. Arbeidet er organisert i turnus med tidleg-, normal- og kveldsvakt, samt helgevakt. Du vil inngå i ein 4-månaders rotasjonssyklus, med tre månader arbeid i Ny-Ålesund og ein månad fri.

Stillinga høyrer til seksjonen i Ny-Ålesund under Avdeling for operasjon og logistikk. Avdelinga har ansvar for planlegging, koordinering og gjennomføring av Norsk Polarinstitutt sine operasjonar i Arktis og Antarktis, og for å sikre trygg og effektiv logistikk til støtte for forsking og miljøovervaking. Seksjonen har det operative ansvaret for drift og utvikling av instituttet si verksemd i Ny-Ålesund, og samarbeider tett med forskarar, teknisk personell og partnarar i forskingssamfunnet.

Ny-Ålesund forskingsstasjon er ein internasjonal møteplass for forskarar som studerer klimaendringar, miljøprosessar og utviklinga av isbrear og økosystem i Arktis. Forskinga går føre seg under krevjande arktiske forhold, og stillinga krev gode samarbeids- og planleggingsevner, teknisk innsikt og evne til å arbeide sjølvstendig i eit lite, tverrfagleg team.

Som ingeniør ved Sverdrup forskingsstasjon vil du bidra til trygg, effektiv og stabil drift av infrastruktur og støttefunksjonar som gjer det mogleg å gjennomføre forsking i Ny-Ålesund.

Legg inn informasjon om stillingen

Arbeidsoppgåver

Som ingeniør ved Sverdrup blir du ein del av eit team på åtte tilsette med ansvar for drift, vedlikehald og installasjon av teknisk og vitskapleg utstyr til permanente overvakings- og forskingsprogram. Du vil i hovudsak:

• delta i daglege og vekentlege datainnsamlingar og målingar
• delta i dagleg innhenting av meteorologiske verobservasjonar
• drifte, feilsøke og vedlikehalde vitskaplege instrument
• bistå feltbaserte forskingsprosjekt innan atmosfære, glasiologi, marin- og terrestrisk biologi ved behov 
• vere ein del av teamet som opererer og varetek sikkerheita for taubanen som går til observatoriet på Zeppelinfjellet
• følgje opp fast teknisk infrastruktur på Zeppelin, spesielt oppgåver med problemstillingar innanfor nettverk og signaltilgang.
• ivareta mottak og sending av gods til og frå Ny-Ålesund

Kvalifikasjonar

For stillinga krevst:

• relevant ingeniørutdanning på minimum bachelornivå, fortrinnsvis innan IT og/eller nettverk. Omfattande arbeidserfaring frå det aktuelle fagområdet kan i spesielle tilfelle kunne vege opp for utdanningskravet
• gyldig førarkort for bil
• at du består eksamen for drift av taubane i løpet av dei fyrste 6 månadene i stillinga
• gode språkferdigheiter i norsk/anna skandinavisk språk og engelsk

Vi ønskjer at du har røynsle med:

• vitskaplege instrument, og vedlikehald av desse
• datahandsaming og programmering
• vedlikehald og reparasjon av elektroniske instrument
• prosjektarbeid

Vi verdset engasjement for og kunnskap om datainnsamling og kvalitetsutvikling. 

Ny-Ålesund er eit lite, tett samfunn med mange ulike menneske. Når vi vel vår neste ingeniør, legg vi derfor stor vekt på personlege eigenskapar. Måten vi arbeider på krev at du blant anna må vere sjølvstendig, er god på å arbeide systematisk, ha gode samarbeidsevner og yte god sørvis. I Ny-Ålesund er du langt frå allfarveg, så du må vere allsidig og kanskje litt kreativ og initiativrik for å finne gode løysningar saman med kollegaene dine. Arbeidsforholda i Arktis kan vere utfordrande og krev god fysisk form og helse, du må derfor også bestå helsesjekk etter retningslinjene våre

Vi tilbyr

• åremålsstilling i eit unikt samfunn.
• interessante og spanande arbeidsoppgåver i eit internasjonalt miljø.
• lønn etter statens regulativ i kode 1085 avdelingsingeniør. For spesielt godt kvalifiserte søkarar kan kode 1087 overingeniør vurderast. Det blir trekt 2% til Statens pensjonskasse.
• polartillegg, p.t. kr 5.340,00 per månad.
• fast godtgjering for uhøveleg arbeidstid, p.t. kr 4.900,00 per månad.
• svalbardskatt, p.t. 15,7%.
• dekt losji og kost med mat i messe (fordelsskatting).
• dekt reiser til/frå det norske fastlandet i tråd med gjeldande vilkår (fordelsskatting).

• gode pensjons- og forsikringsordningar gjennom Statens pensjonskasse (SPK.no)

  Mangfald er viktig for oss. Om du er kvalifisert for stillinga, er du velkommen som søkar uansett kjønn, alder, kulturell bakgrunn, nedsett funksjonsevne eller hol i CV-en. Vi oppfordrar kvinner til å søke.

  Det er spesielle helsekrav til denne stillinga, blant anna fordi jobben skal utførast under litt unormale forhold. Det gjer at moglegheitene våre for tilrettelegging av arbeidsplassen kan vera vanskeleg, men vi vurderer det alltid. 

  Ver merksam på at det er ikkje er høve til å ha familie busett i Ny-Ålesund.

Søknaden

Søknad med relevante kvalifikasjonar og erfaring, CV, kopi av sertifikat, vitnemål og attestar, namn på minst tre referansar og vedlegg må registrerast i Jobbnorge.

For å sikre ein god rekrutteringsprosess samarbeider vi med Semac (www.semac.no) om elektronisk referansesjekk og bakgrunnssjekk. Det er med på å sikra at vi rekrutterer rett kompetanse og bidrar til ei rettvis evaluering av søkarane. Bakgrunnssjekken består ofte av verifisering av oppgitte opplysningar i søknad, CV, vitnemål, osv.

All informasjon blir behandla konfidensielt fram til søknadsfristen går ut. Instituttet utarbeider så ei offentleg søkarliste. Søkarar som ikkje ønskjer å stå på lista, må grunngje dette særskilt i søknaden. Etter offentleglova kan opplysningar om søkaren gjerast offentlege sjølv om søkaren har bedt om å ikkje bli ført opp på søkarlista, jf. offentleglova § 25, andre leddet.