Rådgivar/seniorrådgivar - Landbruk

Vil du jobbe med agronomi og vassforvaltning innan landbruket?

 
For å styrke vår kapasitet har vi no ledig ei fast stilling som rådgjevar/seniorrådgjevar i seksjon landbruk.
 

Om seksjon, fagmiljøet og arbeidsoppgåver

Statsforvaltaren skal medverke til å gjennomføre den gjeldande landbrukspolitikken, med rom for regionale tilpassingar. Hovudtyngda av oppgåvene innanfor landbruksområdet er forvaltning av juridiske og økonomiske verkemiddel, kompetansesenter for kommunal landbruksforvaltning, næringsutvikling og samfunnsplanlegging. Aktuelle oppgåver for stillinga er informasjon og sakshandsaming knytt til tilskot til klimarådgjeving og drenering av jordbruksjord, iverksetjing av den nye gjødselbrukforskrifta, vassforvaltning og elles andre prioriterte oppgåver innanfor landbruksområdet. Arbeidet vil innebere utstrekt samarbeid med kommunane, Fylkeskommunen og organisasjonane i landbruket.
Stillinga ligg i verksemdsområde berekraftig naturbruk og er plassert i seksjon landbruk. Du må rekne med å kunne bli tillagt andre oppgåver innanfor Statsforvaltaren og seksjon landbruk sitt ansvarsområde, avhengig av kva oppgåver som til ei kvar tid er prioriterte og kva erfaring/kompetanse du har.

 Til å utføre desse oppgåvene søkjer vi etter deg som har

• landbruksfagleg utdanning frå universitet eller høgskule, med minimum bachelor eller tilsvarande
• god kunnskap om agronomi og vassforvaltning
• evne til å ta initiativ, vere proaktiv og arbeide sjølvstendig og målretta
• evne til skriftleg formidling
• gode samarbeids- og kommunikasjonseigenskapar
• førarkort kl B
• behersker norsk både skriftleg og munnleg. Begge målformene må kunne nyttast. Vi brukar som hovudregel nynorsk som skriftspråk.

 
Det vil bli lagt vekt på personlege eigenskapar. Det er ønskeleg, men ikkje eit krav, om kjennskap til offentleg forvaltning. Vi er opne for tilsette både du som er nyutdanna og du som har erfaring. Du må pårekne å kunne gjennomgå sikkerheitsklarering.
 For å bli tilsett som seniorrådgivar må du i tillegg ha

• relevant arbeidserfaring innanfor eitt eller fleire av avdelinga sine fagområde
• god kompetanse innanfor sakshandsaming, rettleiing, utgreiing eller utviklingsoppgåver.

 

​Hos oss får du

• ein stabil arbeidsgivar med fleksibel arbeidstid
• løn som 1434 rådgivar eller 1364 seniorrådgivar med lønsspenn frå kr 550.000,- til kr 750.000,-for rådgivar og frå kr 650.000,- til kr 800.000,- for seniorrådgivar. Stillings- og lønsinnplassering avheng av kvalifikasjonar, erfaring og lokal lønspllitikk. I særskilte tilfelle kan høgare løn vurderast. Stillinga som seniorrådgivar har større ansvar og særskilte krav til kompetanse innan fagområdet.
• tilsetting etter gjeldande lover, instruksar og reglement. Dei første seks månadene er prøvetid
• medlemskap i ei av landets beste pensjonsordningar, Statens pensjonskasse (SPK). Vi trekker 2 prosent av løna di, og i tillegg betaler vi eit innskot til pensjonsordninga di. I SPK får du særs gode pensjons- og forsikringsordningar samt gunstige vilkår for lån til bustad (https://spk.no/Medlemskap-i-SPK)
• moglegheit for noko heimekontor når det er føremålsteneleg
• høve til å trene i arbeidstida

Les meir om godane ved å jobbe i staten på Arbeidsgiverportalen (https://arbeidsgiver.dfo.no/lonn-goder-og-reise) 
Som vår nye kollega vil du få ein utfordrande jobb i eit utviklande og godt fagmiljø
Utviklinga av organisasjonen vår er ein kontinuerleg prosess, og den som vert tilsett må vere open for endringar i organisering, oppgåver og ansvarsområde.
 

Mangfald

Eit godt arbeidsmiljø er prega av mangfald. Vi ønskjer medarbeidarar med ulike kompetansar, fagkombinasjonar, livserfaring og perspektiv for å bidra til ei enda betre oppgåveløysing. Vi oppfordrar difor alle kvalifiserte kandidatar til å søkje utan omsyn til alder, kjønn, funksjonsevne eller etnisk bakgrunn. Du er også velkomen til å søkje sjølv om du ikkje kan vise til ein samanhengande yrkeskarriere. Vi legg til rette for medarbeidarar som har behov for det.

Har du ei funksjonsnedsetting, hol i CV-en eller innvandrarbakgrunn, kan du bli positivt særbehandla om du set kryss for dette når du søkjer stillinga. Du kan lese meir om dette på arbeidsgivarportalen (https://arbeidsgiver.dfo.no/positivsaerbehandling).

 
Praktisk informasjon om søknadsprosessen

Alle som søkjer stillinga må søkje digitalt. Når søknadsfristen går ut, vurderer vi søknaden din på bakgrunn av informasjonen du har sendt oss. Det er difor viktig at du både i søknadsbrevet og CV-en, viser korleis kompetansen din fyller krava som er satt i utlysinga.
 
Det er viktig at du registrere all relevant utdanning og erfaring i profilen du opprettar i rekrutteringssystemet (sjølv om du legg ved ein ferdigutfylt CV). Dette er mellom anna nødvendig for å ivareta kravet om fullstendig søkjarliste.
 
Relevante vitnemål og attester lastar du opp. Vitnemål og/eller karakterutskrifter kan du gjerne hente frå vitnemålsportalen. Har du utdanning frå utlandet, legg du ved godkjenning frå NOKUT/Direktoratet for høyere utdanning og kompetanse. Vedlegg lastar du opp i PDF-format.
 
Offentleg søkjarliste blir utarbeidd etter søknadsfristens utløp. Om du ønskjer å reservere deg frå den offentlege søkjarlista, må du grunngje dette særskilt. For at vi skal kunne vurdere ønskjet ditt om reservasjon, må du grunngje konkret kva for ulempe det vil ha for deg å stå på den offentlege søkjarlista. Du vil bli varsla om ønsket ditt ikkje vert tatt til følgje. Vi gjer merksam på at søkjarlista kan bli offentleg sjølv om du som søkjar ber om anonymitet jf. offentleglova § 25.  
 

Om oss

Statsforvaltaren er Kongen og Regjeringa sin fremste representant i fylket. Vi har ansvaret for å informere om statleg politikk og sette handlingsplanar ut i livet. Oppgåvene er i hovudsak rettleiing, tilsyn og klagebehandling retta mot enkeltpersonar, kommunar og bedrifter. Dette gjeld innan kommuneøkonomi og forvaltning, sosial- og familierettslege saker, samfunnstryggleik og beredskap, helse, utdanning, landbruk og miljøvern. Vi er ein kompetansearbeidsplass med om lag 150 medarbeidarar som jobbar for visjonen vår «Trygg framtid for folk og natur».
Har du spørsmål om stillinga? Ta gjerne kontakt med rekrutterande leiar Brit Kari Eidseflot Hauger på telefon (Norge +47) 97082965.
 
Søknadsfrist: 12.oktober 2025 
​