Rådgjevar/seniorrådgjevar i kriminalomsorgas  kompetansesenter

Om stillinga

Ønskjer du å bidra til å forme framtidas kriminalomsorg ved å utvikle kompetansetilbod som styrkjer kunnskapsbasert straffegjennomføring?

Vi søkjer ein fagleg engasjert rådgjevar/seniorrådgjevar som likar å ta ansvar og som blir motivert av å bidra til ein tryggare og meir kunnskapsbasert kriminalomsorg.

Kompetansesenteret ved KRUS er ein sentral aktør i utviklinga av straffegjennomføringa i Noreg. Hos oss får du vere med på å styrkje kompetansen i heile kriminalomsorga – gjennom etterutdanning, fag- og erfaringsbaserte samlingar, samt nasjonale konferansar for tilsette i kriminalomsorga og etaten sine samarbeidspartnarar. Andre viktige arbeidsområde er utviklingsarbeid, utgreiingar og evalueringar som speglar etaten sine viktigaste utfordringar.

For å møte kriminalomsorga sitt aukande behov for kompetanse innan rusproblematikk – samt ulike tiltak for ivaretaking av tilsette, og for å bidra til å styrkje vår deltaking i internasjonale aktivitetar gjennom EØS-prosjekt – har KRUS oppretta ei ny stilling. Som rådgjevar/seniorrådgjevar vil du få ansvar for å utvikle og levere kompetansetiltak innanfor desse områda, både nasjonalt og internasjonalt.

Hos oss får du moglegheita til å vere med på å utvikle framtidas kriminalomsorg. Du vil jobbe tett på praksisfeltet, med både kompetanseheving og utviklingsarbeid. Vi ser etter deg som trivst med å jobbe på tvers av fagområde, i samarbeid med andre så vel som sjølvstendig. Det kan òg bli aktuelt å bidra i undervisning på høgskulekandidat- og/eller bachelorstudiet i straffegjennomføring.

Arbeidsoppgaver

• Prosjektleiing og fagansvar
  • Prosjektleiar for overdoseførebyggjande kompetansetiltak og prosjekt
  • Fagansvarleg for Russamtalen og straffereaksjonen Program mot ruspåverka køyring, med ansvar for vidareutvikling, opplæring og kvalitetssikring
  • Prosjektleiar for tiltak som skal førebyggje belastningsreaksjonar hos tilsette
     
• Kompetanseutvikling og undervisning
  • Utvikle og forbetre undervisnings- og kursmateriell til kompetansetiltak, etterutdanning, fag- og erfaringssamlingar og nasjonale konferansar
  • Delta i, og eventuelt leie, arbeidsgrupper
     
• Utviklings- og analysearbeid
  • Utføre utgreiings-, utviklings- og evalueringsoppgåver knytt til etaten sine behov
  • Delta i nasjonale og internasjonale prosjekt

Utdanning og erfaring

Du må ha:

• For rådgjevarstilling: Relevant høgskule- eller universitetsutdanning på bachelornivå og relevant erfaring. Lang og relevant erfaring kan unntaksvis kompensere for utdanningskravet.
  For seniorrådgjevarstilling: Relevant høgskule- eller universitetsutdanning på masternivå og lang relevant erfaring. Bachelorgrad kombinert med lang og relevant erfaring kan unntaksvis erstatte kravet om mastergrad. Særleg relevant og spesifikk erfaring kan òg kompensere for utdanningskravet.
• Relevant erfaring frå kriminalomsorga eller tilsvarande etatar som arbeider målretta med tilbakeføringsarbeid.
• Oppdatert fagkompetanse innan rusførebyggjande arbeid generelt, og overdoseførebygging og alternative straffereaksjonar spesielt.
• Erfaring med prosess- og prosjektleiing eller utdanning innan prosjektleiing.
• Gode kommunikasjonsevner, både skriftleg og munnleg, på minimum norsk og engelsk.

Det er ein fordel om du har:

• God kjennskap til straffegjennomføring i samfunnet
• God kjennskap til andre aktørar innan rusmiddelfeltet, inkludert brukar- og pårørandeorganisasjonar mm.
• Arbeidserfaring med førebygging av sjukefråvær og ivaretaking av tilsette
• Språkferdigheiter som er relevante for kommande EØS-prosjekt
• Pedagogisk erfaring og interesse for undervisning, herunder erfaring med nettbasert undervisning og bruk av digitale læringsverktøy

Personlige egenskaper

• Fagleg oppdatert og engasjert, med ein systematisk og strukturert arbeidsstil
• God gjennomføringsevne og oppteken av å følgje opp oppgåver frå start til mål
• Løysingsorientert og initiativrik, både i møte med faglege og praktiske utfordringar
• Fleksibel og omstillingsdyktig, med evne til å handtere komplekse og varierte oppgåver

Vi tilbyr

• Meiningsfulle oppgåver i ein etat med eit viktig samfunnsoppdrag
• Godt arbeidsmiljø og kollegaer med høgt fagleg engasjement, i tillegg til eit tverrfagleg nettverk innanfor eit spennande fagfelt.
• Fast stilling som rådgjevar, kode 1434, med løn frå kr 600 000 til 760 000, eller seniorrådgjevar, kode 1364, med løn frå kr 650 000 til 850 000. Stillingstittel og løn blir fastsett etter ei individuell vurdering av erfaring og kompetanse. For særleg godt kvalifiserte søkjarar kan høgare løn vurderast. Det blir trekt 2 % innskot til Statens pensjonskasse. For særleg godt kvalifiserte kan høgare løn vurderast.
• Gode pensjons- og forsikringsordningar og moglegheit for bustadlån i Statens pensjonskasse
• Kantine
• Sentralt plassert midt i Lillestrøm, med få minuttar å gå frå Lillestrøm stasjon
• Treningsrom og moglegheit for trening i arbeidstida

Generell informasjon

Vi meiner at inkludering og mangfald er ein styrke, og ønskjer oss medarbeidarar med ulik kompetanse, livserfaring og perspektiv for å kunne bidra til betre oppgåveløysing. Dersom det er kvalifiserte søkjarar med funksjonsnedsetjing, hol i CV-en eller innvandrarbakgrunn, skal det kallast inn minst éin søkjar frå kvar gruppe til intervju. Du kan lese meir om dei ulike gruppene her, og dersom du kjenner deg att, kan du krysse av for rett gruppe i jobbsøkarportalen vår.

Vi gjer merksam på at det skal leverast uttømmande politiattest før tilsetjing, og at denne ikkje kan innehalde merknader på vandel for den som blir tilsett. Vi gjer samstundes merksam på at opplysningar om søkjarar kan bli offentleggjort, sjølv om søkjar har bede om å bli unnateken frå søkjarlista. Søkjar blir i så fall varsla på førehand, og får moglegheit til å trekkje søknaden sin. Den som blir tilsett, må rette seg etter organisatoriske eller andre endringar som blir bestemt for arbeidsområdet.

For å søkje på denne stillinga skal søknad og CV sendast elektronisk via lenka «Søk stillinga» i Jobbnorge. Alle opplysningar om relevant utdanning og arbeidserfaring skal leggjast inn i det elektroniske skjemaet. Både utdanning og arbeidserfaring skal dokumenterast med vitnemål og attestar. Vi ber om at du hentar digitalt vitnemål frå Vitnemålsportalen direkte i Jobbnorge når du søkjer.

Ved spørsmål om elektronisk utfylling av CV eller andre tekniske utfordringar kan Jobbnorge kontaktast på 75 54 22 20. Dersom du har spørsmål som gjeld stillinga, kan du ta kontakt med ansvarleg for tilsetjinga, avdelingsleiar Hege C. Lauritzen på telefon +47 984 65 818.