Stipendiatstilling (ph.d.) innan læringsdesign, KI-literacy og kompetanseutvikling i bibliotek

Om stillinga

Ved Institutt for pedagogikk, avdeling for Humanistiske fag og Lærarutdanning ved Høgskulen i Volda er det ledig ei 3-årig stipendiatstilling (ph.d.) innan læringsdesign, kunstig intelligens (KI), KI-literacy, kritisk tenking og kompetanseutvikling i bibliotek.

Stillinga er knytt til forskingsprosjektet “AI trust Libraries: Empowering Adults with Civic AI literacy for Democratic Trust through Learning, Dialogue and Co-Creation in Public Libraries”, og Norsk senter for påliteleg kunstig intelligens (The Norwegian Centre for Trustworthy AI), TRUST.  Kandidaten som får stillinga skal søkje opptak på Høgskulen i Volda sitt doktorgradsprogram Utdanning, språk og kultur .

Stipendiaten skal utvikle eit sjølvstendig forskingsprosjekt innanfor rammene av AI trust Libraries og bidra til kunnskapsutvikling om læringsdesign, KI-literacy og demokratisk deltaking gjennom offentlege bibliotek som læringsarena.

Prosjektet AI trust Libraries

Stillinga er knytt til “AI trust Libraries: Empowering Adults with Civic AI literacy for Democratic Trust through Learning, Dialogue and Co-Creation in Public Libraries” som er eit Erasmus+-prosjekt etablert mellom Høgskulen i Volda, Møre og Romsdal fylkesbibliotek, og to nasjonale KI-senter, TRUST og AILearn for perioden 2026-2029. Prosjektet har partnarar i Finland, Frankrike og Ungarn og dei tre vestlandsfylka Rogaland, Vestland og Møre og Romsdal. Prosjektet har som mål å utvikle og forske på ulike læringsdesign knytt til kritisk bruk av kunstig intelligens gjennom samskaping, innan spelbasert læring, dialogbasert læring og læring i makerspace. AI trust Libraries tek tak i det demokratiske imperativet ved å transformere offentlege bibliotek til knutepunkt for vaksen samfunnsbasert KI-kompetanse. I ei tid med KI-generert desinformasjon fungerer bibliotek som viktige «tredje rom» der innbyggarar, spesielt dei som er i faresona for digital ekskludering, kan bygge digital og samfunnsmessig robustheit som er nødvendig for demokratisk handlekraft. Prosjektet utviklar forskingsinformert og praksisvalidert læringsrammeverk og verktøysett som fokuserer på handlekraft og samarbeid for å forstå KI. Læringsarenaen er i første omgang folkebibliotek med ulike brukargrupper i ulike europeiske land, og målet med prosjektet er å etablere ulike forskingsbaserte læringsdesign om kritisk og demokratiorientert bruk av kunstig intelligens som kan nyttast i ulike samfunnssektorar. 

KI-senteret TRUST

TRUST (The Norwegian Centre for Trustworthy AI) er eitt av Noregs nasjonale forskingssenter for kunstig intelligens. Senteret samlar forskarar frå ei rekkje fagområde for å utvikle kunstig intelligens som er trygg, påliteleg, rettferdig og samfunnstenleg. TRUST er ein samarbeidspart for prosjektet AI trust Libraries, så gjennom TRUST får stipendiaten tilgang til eit breitt nasjonalt og internasjonalt forskarnettverk og moglegheiter for samarbeid på tvers av institusjonar og fagområde.

Høgskulen i Volda sitt doktorgradsprogram

Høgskulen i Volda er ein statleg høgare utdanningsinstitusjon med sterke fagmiljø innan lærarutdanning, humaniora, kulturfag, samfunnsvitskap og media. Høgskulen har lange tradisjonar innan lærarutdanning og fagdidaktisk forsking, og tilbyr eit aktivt forskings- og studiemiljø med omfattande nasjonale og internasjonale samarbeid.

Den som blir tilsett i stillinga, må få opptak i ph.d.-programmet Utdanning, språk og kultur ved Høgskulen i Volda. Programmet har ei tverrfagleg innretning med mellom anna fagdidaktiske og tverrfaglege perspektiv. Programmet kvalifiserer kandidatane til forsking, undervisning og formidling på høgt internasjonalt nivå.

Ph.d.-prosjektet skal ta utgangspunkt i prosjektramma til AI trust Libraries som er skissert i utlysinga. Det skal leverast eiga prosjektskisse for ei artikkelbasert ph.d.-avhandling knytt til prosjektet AI AI trust Libraries ved søknad. Planlagd oppstart er så snart som mogleg etter tilsetjing.

Om prosjektet

Kunstig intelligens blir tematisert i skule, opplæring og i delar av arbeidslivet. Likevel er det store samfunnsgrupper som ikkje har tilgang til å utvikle ei kritisk forståing av kva KI er og gjer med vår samfunnsforståing og demokratiske prosessar. Prosjektet tek utgangspunkt i vaksne sin samfunnsretta KI-kompetanse for demokratisk tillit gjennom læring, dialog og samskaping som er relevante for utvikling, bruk og forståing av KI. Den som blir tilsett, skal utvikle eit sjølvstendig doktorgradsprosjekt innanfor denne overordna ramma. 

Moglege tema for doktorgradsprosjektet omfattar:

• utvikling av samfunnsretta KI-literacy for vaksne
• læringsdesign og læringsressursar for kritisk forståing av KI
• samskapingsprosessar mellom bibliotek, forskarar og brukarar
• folkebibliotek som læringsarena for demokratisk deltaking
• overføring av læringsdesign frå bibliotek til andre samfunnssektorar
• KI-literacy som grunnlag for inkludering, deltaking og demokratisk robustheit

 

Prosjektet skal ta utgangspunkt i folkebibliotek som læringsarena, men kan også undersøkje korleis utvikla læringsdesign kan overførast til andre samfunnssektorar. Endeleg problemstilling, forskingsspørsmål, teoretisk rammeverk og forskingsdesign kan bli justert i samarbeid med rettleiarane etter tilsetjing.

Arbeidsfelt

Stipendiaten skal mellom anna:

• Gjennomføre forskaropplæring ved doktorgradsprogrammet Utdanning, språk og kultur ved Høgskulen i Volda
• gjennomføre eit sjølvstendig doktorgradsprosjekt
• planleggje og gjennomføre forskingsaktivitetar og datainnsamling
• analysere forskingsdata og publisere forskingsresultat
• formidle forsking gjennom vitskaplege publikasjonar, konferansar og andre relevante arenaer
• delta aktivt i forskingsmiljø ved Høgskulen i Volda og i aktuelle aktivitetar knytte til AI trust Libraries og TRUST 
• bidra til gjennomføring og vidareutvikling av forskingsaktivitetar innan AI trust Libraries
• delta i internasjonale møte, seminar og forskingsaktivitetar knytte til prosjektkonsortiet
• samarbeide med nasjonale og internasjonale forskings- og praksispartnarar

Kvalifikasjonar

Søkjarar må ha:

• mastergrad eller tilsvarande (120 studiepoeng) innan utdanningsvitskap, pedagogikk, læringsdesign, profesjonsfagleg digital kompetanse, medievitskap, bibliotek- og informasjonsvitskap, informasjonsvitskap eller andre relevante fagområde
• eit fagleg grunnlag som kvalifiserer for opptak til ph.d.-programmet Utdanning, språk og kultur ved Høgskulen i Volda
• normalt karakter B eller betre på mastergraden eller tilsvarande dokumentert fagleg nivå
• gode ferdigheiter i skriftleg og munnleg engelsk
• gode ferdigheiter i norsk eller eit anna skandinavisk språk

Kandidaten må ha fullført mastergrad for å bli vurdert til stillinga.

Ønskt kompetanse

Ved vurdering av søkjarane vil det bli lagt vekt på om kandidaten kan dokumentere eitt eller fleire av følgjande forhold:

• erfaring med forsking eller utviklingsarbeid knytt til læring, undervisning, læringsdesign eller kompetanseutvikling
• kunnskap om kunstig intelligens, KI-literacy, digital literacy eller profesjonsfagleg digital kompetanse
• kunnskap om bibliotek som læringsarena, livslang læring eller vaksenopplæring
• erfaring med samarbeidsbaserte forskingsdesign, designbasert forsking (DBR), samskapingsprosessar eller forskar-praktikar-samarbeid
• erfaring med kvalitative, kvantitative eller mixed methods-tilnærmingar
• vitskapleg publisering eller deltaking i forskingsprosjekt
• erfaring frå internasjonalt forskingssamarbeid eller prosjektarbeid

Personlege eigenskapar

Vi søkjer ein kandidat som:

• er fagleg nysgjerrig og motivert for forskarutdanning
• arbeider sjølvstendig og systematisk
• har gode samarbeids- og kommunikasjonsevner
• ønskjer å bidra aktivt i eit tverrfagleg forskingsmiljø

Vi tilbyr

• ei fullt finansiert 3-årig stipendiatstilling
• eit aktivt miljø av ph.d.-kandidatar knytte til ph.d.-programmet Utdanning, språk og kultur
• eit sterkt humanistisk, utdanningsvitskapleg og samfunnsfagleg forskingsmiljø ved Høgskulen i Volda
• deltaking i forskingsaktivitetar og nettverk knytte til TRUST
• gode moglegheiter for nasjonalt og internasjonalt forskingssamarbeid
• løn etter statens lønsregulativ og medlemskap i Statens pensjonskasse. Sttartlønn er kr. 580.000 med automatisk lønnsutvikling i inntil 4 år med 3 % årleg stigning

Generell informasjon

Ved HVO er vi opptatt av mangfald. Medarbeidarar med ulik livserfaring vil gjere oss i stand til å finne  gode løysingar på arbeidet vårt. Vi oppmodar difor alle til å søke stillinga utan omsyn til alder, kjønn, funksjonsevne eller etnisk bakgrunn. Du er også velkommen til å søke sjølv om du ikkje kan vise til ei samanhengande yrkeskarriere. Lokala er universelt utforma, og vi legg tilhøva til rette for personar med nedsett funksjonsevne.

Dersom du har nedsett funksjonsevne, innvandrarbakgrunn eller hol i CV kan du bli positivt særbehandla om du kryssar av for dette når du søker stillinga. Vi vil invitere minst éin kvalifisert søkar i kvar av desse gruppene til intervju. For å bli positivt særbehandla på denne måten, må du oppfylle visse krav. Les meir om dette på arbeidsgiverportalen.

Tilsetjing skjer på dei vilkåra som følgjer av lov om offentlege tenestemenn, regulativ, reglement og instruksar som til ei kvar tid gjeld for stillinga, mellom anna lovfesta innskot i Statens pensjonskasse.

Aktuelle kandidatar vert innkalla til intervju. Søkjarar som vert kalla inn til intervju, må ta med originalar av vitnemål og attestar for å dokumentere dei elektronisk innsende vedlegga.

Om søknaden

Alle som søker stillinga må søke digitalt gjennom rekrutteringsportalen Jobbnorge. Du må laste opp relevante vitnemål og attestar. Vi gjer merksam på at søknaden blir vurdert ut frå informasjon som ligg føre ved utløp av søknadsfristen. Det er viktig at du viser korleis din kompetanse fyller kriteria for stillinga

Offentleg søkarliste blir utarbeidd etter at søknadsfristen er ute. Dersom du ønsker å reservere deg frå oppføring på offentleg søkarliste, må dette grunngjevast i Jobbnorge. Du vil bli varsla om reservasjon ikkje blir tatt til følge.

Søknaden skal innehalde:

• prosjektskisse for artikkelbasert avhandling. Prosjektskissa (maks 10 sider inklusive referanseliste) skal presentere:
  • førebels problemstilling og forskingsspørsmål
  • teoretisk rammeverk
  • forslag til forskingsdesign og metodiske tilnærmingar
  • framdriftsplan
  • korleis prosjektet er knytt til AI trust Libraries
• søknadsbrev og motivasjonsnotat på 1–2 sider, der søkjaren gjer greie for motivasjon og korleis eigen fagleg bakgrunn og kompetanse er relevant for stillinga
• CV
• vitnemål og karakterutskrifter
• namn og kontaktinformasjon til 2–3 referansar
• Vitskapleg tekst, til dømes masteroppgåva eller publisert artikkel

Søknaden kan skrivast på engelsk eller norsk, eller andre skandinaviske språk.

Ved vurdering av søkjarane vil det bli lagt vekt på:

• kvaliteten på prosjektskissa
• den akademiske styrken i masteroppgåva
• relevant forskings- og utviklingserfaring
• karaktergrunnlag
• kandidaten sitt potensial for å gjennomføre doktorgradsutdanninga innan normert tid

 

Kontakt

For meir informasjon om stillinga kan du kontakte:

• Synnøve H. Amdam, Førsteamanuensis ved Institutt for pedagogikk, sha@hivolda.no  
• Siv M. Gamlem, Professor ved Institutt for pedagogikk, sivmg@hivolda.no

Studiebygda Volda

Midt mellom fjord og fjell på spektakulære Sunnmøre finn du Høgskulen i Volda, med sine lange tradisjonar.

Les meir på www.hivolda.no

Video: https://www.youtube.com/watch?v=wSlL1WkuUXc