Rådgivar/seniorrådgivar - miljøoppfølging næringsliv

Vi har ledig ei fast stilling som rådgivar/seniorrådgivar innan miljøoppfølging av næringsverksemd. Du vil arbeide med regulering av miljøpåverknad frå ulike bransjar og bidra til at forureiningsregelverket blir følgt i praksis.
 

Om seksjonen og fagmiljøet

Stillinga er plassert i seksjon for forureining, som har ansvar for oppgåver knytt til forureiningslova. Seksjonen består av åtte engasjerte medarbeidarar med brei fagleg kompetanse. Vi ser etter deg med utdanning innan til dømes marinbiologi, VA-teknologi, kjemi, toksikologi, forureiningsbiologi, naturforvaltning, forureiningsjus, akvakultur, ingeniørfag eller næringsmiddel.
Hos oss får du faglege utfordringar og høve til utvikling i eit kompetent og tverrfagleg arbeidsmiljø. Du vil samarbeide med næringsaktørar, konsulentselskap, kommunar og andre statlege etatar, og bidra med rettleiing og oppfølging innan dine fagområde.

Arbeidsoppgåver

Du vil arbeide med oppgåver som krev god forståing for både regelverk og miljøpåverknad frå ulike typar verksemd. Døme på arbeidsoppgåver:

• Behandle søknader om utsleppsløyve etter forureiningslova
• Gjennomføre tilsyn med verksemder for å sikre etterleving av krav til utslepp til luft og vatn, støy og avfallshandtering
• Rettleie kommunar og næringsaktørar innan regelverket
• Bidra i arbeidet med å førebyggje og redusere forureining
• Samarbeide med andre fagmiljø og forvaltningsnivå

Aktuelle bransjar og område inkluderer akvakultur, avfallsanlegg, skipsverft, avløpsanlegg, næringsmiddelindustri, biogass, mineralsk industri, samt tiltak som mudring og utfylling i sjø. Det er sannsynleg at den som blir tilsett vil arbeide særleg med akvakultur.
 
Du må også vere budd på å ta del i andre oppgåver innanfor Statsforvaltaren sitt ansvarsområde for berekraftig naturbruk, avhengig av prioriteringar og din kompetanse.

 

Kvalifikasjonar

Vi søkjer deg som har

• relevant høgare utdanning innan tekniske eller naturvitskaplege fag (mastergrad, sivilingeniør eller tilsvarande)
• god kunnskap om miljøpåverknader frå utslepp til det ytre miljøet
• evne til å arbeide sjølvstendig, strukturert og målretta
• gode skriftlege og munnlege formidlingsevner
• god vurderingsevne og forståing for samfunnsoppdraget
• gode samarbeidsevner og evne til å kommunisere med ulike aktørar

Førarkort klasse B er ein føresetnad. Det blir lagt vekt på personlege eigenskapar. Du må meistre norsk både skriftleg og munnleg.
 
 

​Hos oss får du

• ein utfordrande jobb i eit utviklande og godt fag- og arbeidsmiljø
• løn som 1434 rådgivar med lønsspenn frå kr 590 000,- til kr 695 000,- eller 1364 seniorrådgivar med lønsspenn frå kr 655 000,- til kr 760 000,-. Stillings- og  lønsinnplassering avheng av kvalifikasjonar, erfaring og lokal lønspolitikk. I særskilte tilfelle kan høgare løn vurderast. Stilling som seniorrådgivar har større ansvar og særskilte krav til kompetanse innan fagområdet.
• ein stabil arbeidsgivar med fleksibel arbeidstid
• tilsetting etter gjeldande lover, instruksar og reglement. Dei første seks månadene er prøvetid
• medlemskap i ei av landets beste pensjonsordningar, Statens pensjonskasse (SPK). Vi trekker 2 prosent av løna di, og i tillegg betaler vi eit innskot til pensjonsordninga di. I SPK får du særs gode pensjons- og forsikringsordningar samt gunstige vilkår for lån til bustad (https://spk.no/Medlemskap-i-SPK)
• moglegheit for noko heimekontor når det er føremålsteneleg
• høve til å trene i arbeidstida

 
Les meir om godane ved å jobbe i staten på Arbeidsgiverportalen (https://arbeidsgiver.dfo.no/lonn-goder-og-reise) 
Utviklinga av organisasjonen vår er ein kontinuerleg prosess, og den som vert tilsett må vere open for endringar i organisering, oppgåver og ansvarsområde.

Mangfald

Eit godt arbeidsmiljø er prega av mangfald. Vi ønskjer medarbeidarar med ulike kompetansar, fagkombinasjonar, livserfaring og perspektiv for å bidra til ei enda betre oppgåveløysing. Vi oppfordrar difor alle kvalifiserte kandidatar til å søkje utan omsyn til alder, kjønn, funksjonsevne eller etnisk bakgrunn. Du er også velkomen til å søkje sjølv om du ikkje kan vise til ein samanhengande yrkeskarriere. Vi legg til rette for medarbeidarar som har behov for det.

Har du ei funksjonsnedsetting, hol i CV-en eller innvandrarbakgrunn, kan du bli positivt særbehandla om du set kryss for dette når du søkjer stillinga. Du kan lese meir om dette på arbeidsgivarportalen (https://arbeidsgiver.dfo.no/positivsaerbehandling).

 
Praktisk informasjon om søknadsprosessen

Alle som søkjer stillinga må søkje digitalt. Når søknadsfristen går ut, vurderer vi søknaden din på bakgrunn av informasjonen du har sendt oss. Det er difor viktig at du både i søknadsbrevet og CV-en, viser korleis kompetansen din fyller krava som er satt i utlysinga.
 
Det er viktig at du registrere all relevant utdanning og erfaring i profilen du opprettar i rekrutteringssystemet (sjølv om du legg ved ein ferdigutfylt CV). Dette er mellom anna nødvendig for å ivareta kravet om fullstendig søkjarliste.
 
Relevante vitnemål og attester lastar du opp. Vitnemål og/eller karakterutskrifter kan du gjerne hente frå vitnemålsportalen. Har du utdanning frå utlandet, legg du ved godkjenning frå NOKUT/Direktoratet for høyere utdanning og kompetanse. Vedlegg lastar du opp i PDF-format.
 
Offentleg søkjarliste blir utarbeidd etter søknadsfristens utløp. Om du ønsker å reservere deg frå den offentlege søkjarlista, må du grunngje dette særskilt. For at vi skal kunne vurdere ønsket ditt om reservasjon, må du grunngje konkret kva for ulempe det vil ha for deg å stå på den offentlege søkjarlista. Du vil bli varsla om ønsket ditt ikkje vert tatt til følgje. Vi gjer merksam på at søkjarlista kan bli offentleg sjølv om du som søkjar ber om anonymitet jf. offentleglova § 25.  
 

Om oss

Statsforvaltaren er Kongen og Regjeringa sin fremste representant i fylket. Vi har ansvaret for å informere om statleg politikk og sette handlingsplanar ut i livet. Oppgåvene er i hovudsak rettleiing, tilsyn og klagebehandling retta mot enkeltpersonar, kommunar og bedrifter. Dette gjeld innan kommuneøkonomi og forvaltning, sosial- og familierettslege saker, samfunnstryggleik og beredskap, helse, utdanning, landbruk og miljøvern. Vi er ein kompetansearbeidsplass med om lag 150 medarbeidarar som jobbar for visjonen vår «Trygg framtid for folk og natur».
Har du spørsmål om stillinga? Ta gjerne kontakt med rekrutterande leiar Christian Dahl på telefon (Norge +47) 97008661.
 
Søknadsfrist: 14. september 2025 
​