Vil du arbeide på stasjonen?
Om stillinga
Ved forskingsstasjonen vår i Austevoll har vi ei ledig fast stilling som 1275 ingeniør.
Denne stillinga er knytt til biologisk og teknisk avdeling. Du som vert tilsett vil utføre oppgåver knytt til administrativt arbeid ved stasjonen, du vil også delta i biologisk drift og ha oppgåver i det biologiske arbeidet.
Om forskingsstasjonen
Forskingsstasjonen Austevoll blei etablert i 1978, og er ein av Europas største og mest avanserte forskingsstasjonar innan marine arter. Med 5 000 m2 bygg og hallar og 300 - 400 kar av ulik storleik, har forskingsstasjonen som mål å leggje til rette for aktuell og framtidsretta forsking innan marin fisk og organismar. I tillegg til velferd og åtferd knytt til fisk, legg stasjonen til rette for forsøk knytt til miljørelaterte utfordringar, klimaspørsmål og ulike eksponeringsforsøk for fisk og biologisk materiale.
Det er i dag 48 tilsette som har forskingsstasjonen Austevoll som sin arbeidsplass.
Sentrale arbeidsoppgåver
Dette er ei stilling for deg som ønskjer å jobbe med biologisk drift og administrative oppgåver. Arbeidsoppgåvene gjer det nødvendig å vere fysisk til stades på stasjonen.
Du vil vere gjestane våre sitt første møte med forskingsstasjonen gjennom arbeid i resepsjonen. Vidare vil du få varierte arbeidsoppgåver som blant anna for innkjøp av rekvisita, post, varemottak, kantinedrift og oppfølging og reservasjon av hybelhusa våre.
Biologiske oppgåver vil blant anna vere oppfølging av forsøk ved stasjonen, dagleg røkting og arbeid knytt til fiskehald både på sjø- og landanlegget vårt.
Kvalifikasjonskrav
Vi ser etter deg som har relevant fagutdanning knytt til arbeidsoppgåvene, eksempelvis gjennom fagbrev. Relevant erfaring med arbeidsoppgåvene kan kompensere for det formelle utdanningskravet.
Du som vert tilsett må beherske norsk og engelsk, munnleg og skriftleg. Det er vidare eit krav at du har førarkort klasse B.
Ønskjeleg kompetanse
Det er ein fordel om du har
- erfaring frå biologisk drift av landbasert akvakulturanlegg
- truck- og båtførarbevis
- erfaring med bruk av Microsoftpakka
Personlege eigenskapar
På Havforskingsinstituttet meiner vi at personlege eigenskapar spelar ei rolle i korleis vi arbeider, kommuniserer og trivst på arbeidsplassen.
Til denne stillinga ser vi etter deg som
- har evne til å planlegge arbeidet for deg sjølv opp mot gjeldande fristar og arbeidsoppgåver
- har evne til å omprioritere når arbeidet krev det
- er opptatt av å yte god service og sjå løysingar på utfordringar i kvardagen
Inkludering, mangfald og positiv særbehandling
Havforskingsinstituttet har fokus på mangfald, og vi oppmodar alle kvalifiserte kandidatar til å søkje jobb hos oss, uavhengig av alder, kjønn, funksjonsevne, nasjonalitet eller etnisk bakgrunn. Havforskingsinstituttet er ei IA-bedrift, og vi ønskjer å legge forholda til rette for søkjarar
med redusert funksjonsevne.
Dersom det finns kvalifiserte søkjarar med funksjonsnedsetting, hol i CV eller innvandrarbakgrunn, vil vi kalle inn minst éin søkjar i kvar av desse gruppene til intervju. For å bli vurdert som søkjar med rett til positiv særbehandling, må du oppfylle visse krav. Du kan lese meir om krava her.
For å synliggjere at du ønskjer å bli vurdert som søkjar med rett til positiv særbehandling ber vi deg krysse av for dette i jobbportalen når du søkjer.
Vi tilbyr
- arbeid i ein leiande forskingsinstitusjon, med stor samfunnsmessig verdi
- eit spanande og solid fagmiljø
- fleksitidsordning, med sommar- og vintertid
- offentleg tenestepensjonsordning i Statens Pensjonskasse
- bedriftshytter
- bedriftsidrettslag
Ytterlegare informasjon
Stillinga vert lønt som 1275 ingeniør i samsvar med Hovedtariffavtalen i staten. Frå lønna vert det trekt 2 % innskudd til Statens pensjonskasse.
Søknad må sendast elektronisk via Jobb Norge. CV, relevante attestar og vitnemål må leggast ved i søknaden.
Vi gjer merksam på at opplysningar om søkjarar kan bli offentleggjorde, sjølv om søkjaren har bedt om å vera unnateken søkjarlista. Søkjaren vil bli orientert om dette på førehand.
Ønskjer du fleire opplysningar om stillinga kan du kontakte Stasjonsleiar Kjetil Stensland på telefon 480 11 667, eller e-post: kjetil.stensland@hi.no .
Besøk gjerne våre nettsider på www.hi.no .
Havforskingsinstituttet feirar 120 år!
Me feirar over hundre år med havforsking!
Om bedriften
Om Havforskingsinstituttet
Havforskingsinstituttet (HI) er eitt av dei største marine forskingsinstitutta i Europa, med vel tusen tilsette og ei rekkje forskingsfasilitetar og laboratorium av høg internasjonal standard. Hovudaktivitetane våre er forsking, rådgjeving og overvaking. Havforskingsinstituttet eig og driv seks forskingsfartøy. Hovudkontoret vårt ligg i Bergen. Vi har også avdeling i Tromsø, og forskingsstasjonar i Matre, Austevoll og Flødevigen.
Havforskingsinstituttet skal vere ein leiande kunnskapsleverandør for å sikre ei bærekraftig forvalting av ressursane i dei marine økosystema, både nasjonalt og internasjonalt, og for heile kjeda frå hav til mat, inkludert det marine miljøet, fiskeernæring og trygg og sunn sjømat.