Prosjektstilling knytt til design, kunst og handverk - st. nr. 3/2020
Jobbnorge ID: 182524
Om stillinga
Ved Høgskulen i Volda, Avdeling for kulturfag, Seksjon for design, kunst og handverk, er det ledig ei prosjektstilling i 50% stilling knytt til prosjekta desentralisert kompetanseheving, Kompetanse for kvalitet og pedagogisk utvikling av Skaparverkstaden frå 1.8.2020-31.7.2022.
Arbeidsoppgåver
Arbeidsoppgåver for den utlyste stillinga er undervisning og rettleiing innan fagområda tre og leire i tilknyting til prosjekta Dekomp, desentralisert kompetanse i samband med fagfornyinga, vidareutdanning for lærarar/KfK, samt ansvar for pedagogisk utvikling av Skaparverkstaden, vår nye digitalteknologiske læringsverkstad.
Kvalifikasjonar
Denne stillinga har ein tydeleg fagdidaktisk profil og søkjaren må ha faglærarutdanning i kunst og handverk. For tilsetjing som høgskulelektor må søkjaren ha hovudfag/mastergrad i kunst og handverk. For tilsetting som førsteamanuensis må søkaren ha doktorgrad i kunst og handverk. For tilsetning som førstelektor må søkar ha dokumentert kompetanse i kunst og handverk på nivå med norsk doktorgrad, og med tilsvarande relevanskrav.
Søkjaren må ha relevant nyare undervisningserfaring frå grunnskule. Det er ein fordel om søkjar i tillegg har undervisningserfaring frå vidaregåande skule. Søkjaren bør i tillegg ha erfaring frå undervisning og rettleiing frå høgskulesektoren og dette er eit fortrinn. Seksjonen er i stadig utvikling og arbeidsoppgåvene kan bli endra etter nærare avtale.
Vi ser etter deg som har faglærarbakgrunn og har relativ fersk undervisningserfaring, og som:
- har allsidig erfaring med ulike teknikkar og materiale knytt til fagområde trearbeid
- har allsidig erfaring med ulike teknikkar og materiale knytt til fagområde leire/keramikk,
både skulpturale uttrykk og ferdigheite i dreiing - har god kunnskap om HMS innan alle material- og verktøyområder som tre- og leireverkstadane disponera.
- kan bruke og halde ved like avanserte maskiner og verktøy i ein leire, tre- og metallverkstad
- kan bruke og halde ved like avanserte maskiner og verktøy i vår profesjonelle Skaparvekstad
- er interessert i å utvikle og formidle eit pedagogisk tilbod i Skaparverkstaden
- er interessert i å utvikle og formidle faginnhald og rettleie studentar i faglege utviklingsarbeid
- er innovativ og trivast med å tileigne deg ny kunnskap om eit fagfelt i stadig fornying
- har gode samarbeids- og kommunikasjonsevner
- har evne til å ta initiativ og arbeide sjølvstendig.
Personlege eigenskapar blir vektlagt ved vurdering av søkjarane.
Den som vert tilsett må ha dokumentert relevant praktisk-pedagogisk kompetanse på grunnlag av utdanning eller undervisning og rettleiing. Ein viser elles til krav til vitskaplege og pedagogiske kvalifikasjonar i Forskrift om ansettelse og opprykk i undervisnings- og forskerstillinger: https://lovdata.no/dokument/SF/forskrift/2006-02-09-129.
For meir informasjon om kva som ligg i kravet til pedagogisk kompetanse i Forskrift om ansettelse og opprykk i undervisnings- og forskerstillinger, sjå Universitets- og høgskolerådet sine nasjonale retningslinjer for pedagogisk basiskompetanse: www.uhr.no/temasider/karrierepolitikk-2/nasjonale-veiledende-retningslinjer-for-uh-pedagogisk-basiskompetanse.
Søkjar som ikkje innfrir krava til pedagogisk kompetanse kan bli tilsett i stillinga dersom det ikkje melder seg kvalifisert søkjar som innfrir krava.
Søkjaren må ha gode norsk- og engelskkunnskapar, både skriftleg og munnleg. Undervisings- og administrasjonsspråket ved høgskulen er norsk.
Vi tilbyr
Vi kan tilby eit inkluderande arbeidsmiljø med høve til fagleg og personleg utvikling og gode pensjonsordningar.
Stillinga er løna etter kompetanse og kvalifikasjonar i statens lønsregulativ med normal årsløn i desse stillingskodene ved Høgskulen i Volda: Førsteamanuensis 1011/førstelektor 1198 frå kr 583 900 - 789 200/ høgskulelektor 1008 frå kr 488 000 - 679 000/ høgskulelærar 1007 frå kr 402 600 - 573 100.
Generell informasjon
Den statlege arbeidsstyrken skal i størst mogleg grad spegle mangfaldet i folket. Det er difor eit personalpolitisk mål å oppnå ei balansert alders- og kjønnssamansetjing og rekruttere personar med innvandrarbakgrunn. Høgskulen praktiserer moderat kjønnskvotering. Vi gjer søkjarar som oppgir at dei har nedsett funksjonsevne eller hol i CV merksam på at denne opplysinga kan verte brukt til statistikkføremål knytt til regjeringa sin inkluderingsdugnad.
Tilsetjing skjer på dei vilkåra som følgjer av lov om offentlege tenestemenn, regulativ, reglement og instruksar som til ei kvar tid gjeld for stillinga, mellom anna lovfesta innskot i Statens pensjonskasse.
Søkjarar kan verte kalla inn til intervju og/eller prøveundervisning. Søkjarar som vert kalla inn til intervju, må ta med originalar av vitnemål og attestar for å dokumentere dei elektronisk innsende vedlegga.
I samsvar med Offentleglovas § 25 kan søkjar be om å ikkje bli oppført på offentleg søkjarliste. Søkjarar som ønskjer å reservere seg, må under <<søknad>> hake av for <<Er det grunnlag for å bli unntatt offentligheit, jfr. Offentlighetsloven>> samt grunngi søknaden. Høgskulen kan likevel avgjere at namnet på søkjaren skal offentleggjerast. Søkjaren blir varsla dersom ønsket om unntak ikkje blir tatt til følge.
Om søknaden
Søknad og all dokumentasjon skal sendast elektronisk igjennom rekrutteringssystemet Jobbnorge der du registrerer søknaden, vedlegg og informasjon om utdanning og arbeidserfaring. Vi ber også om at du oppgir referansar med kontaktinformasjon. Søknaden skal gi eit fullstendig oversyn over utdanning og tidlegare praksis. Søknader eller vedlegg kan ikkje sendast på e-post eller i vanleg postgang til høgskulen.
Det er søkjar sitt ansvar å sørge for at alle dokument/filer er lasta opp innan søknadsfristen. Søknaden vert vurdert med den informasjonen som ligg føre elektronisk i Jobbnorge. Vedlegg skal lastast opp som separate filer i eit format som kan leggjast ved elektronisk; PDF, PMG, JPEG, ODF, DOC. Dersom vedlegga samla overstig 30 MB, må dei komprimerast før dei vert lasta opp. Vedlegga skal ha namn som samsvarar med innhaldet i fila.
Følgjande dokument/filer skal leggjast ved den elektroniske søknaden:
- vitnemål og attestar, samla i ei fil
- CV
- fullstendig publikasjonslise over alle vitskapelege arbeid
- inntil 10 vitskapelege arbeid, inkludert master-/hovudfagsoppgåve og eventuell doktorgradsavhandling
Dei faglege kvalifikasjonane til søkjarane kan verte vurdert av eit sakkunnig utval. Viser til Forskrift om ansettelse og opprykk i undervisnings- og forskerstillinger, KD 9.2.2006. www.lovdata.no/dokument/SF/forskrift/2006-02-09-129. Alle innkomne søknader blir først vurderte av avdelinga. Søknader frå klart ikkje-kvalifiserte søkjarar blir ikkje sende vidare til vurdering i sakkunnig utval.
Søknadsfrist: 20. februar 2020.
Kontakt
Nærare opplysningar om stillinga kan ein få ved å vende seg til Seksjon for design, kunst og handverk ved seksjonsleiar Sissel Midtlid 70075292/92038832.
Om Seksjon for design, kunst og handverk
Seksjon for design, kunst og handverk tilbyr bachelorgradstudium og årsstudium i Kunst og handverk. Seksjonen driv også kunst- og handverksfaglege emne i grunnskule- og barnehagelærarutdanningane, praktisk-pedagogisk utdanning, samt vidareutdanning og kursing for lærarar(KfK).
Om Avdeling for kulturfag
Avdeling for kulturfag (AKF) samlar fagområda i fire seksjonar, Design, kunst og handverk, Drama og teater, Idrett og friluftsliv og Musikk. Avdelinga tilbyr kulturfag og praktiske og estetiske fag på bachelornivå, grunnutdanning, fag- og vidareutdanning for lærarar og barnehagelærarar. Vi har om lag 550 studentar og 35 tilsette.
Det beste med Volda
Studentar og bygdefolk fortel kva dei synest er det beste med Volda. Produksjon: Chris-Håvard Berge
Video: https://www.youtube.com/watch?v=61Me2JOrMgQ&feature=youtu.be
Se annonsen og søk på stillingen www.jobbnorge.no
Om bedriften
Høgskulen i Volda er høgskulen for humaniora og samfunnsvitskap i Møre og Romsdal. Vi er ein spennande kompetanseorganisasjon i vekst med om lag 4500 studentar og 350 tilsette. Vi gjev undervisning i ei rekkje fagområde, yrkesretta utdanningar og etter- og vidareutdanningar i nært samarbeid med samfunns- og næringsliv. Høgskulen i Volda driv mykje forsking og utviklingsarbeid og satsar på forskaropplæring og kompetanseoppbygging for dei tilsette i samarbeid med universitet i inn- og utland.